Klei Aê Diê Blŭ: Y‑Luk 22:39-43
Êlan kliăng: “Kăp răng leh anăn wah lač bĕ, čiăng kơ diih amâo lĕ hlăm klei mplư ôh. Mngăt čiăng snăk, ƀiădah kđeh jing awăt.” (Y‑Mathiơ 26:41)
Klei êmuh ksiêm mĭn: Ya jing klei mplư? Si yang jhat mplư Khua Yang Yêsu? Si drei ngă čiăng đăm lĕ hlăm klei mplư ôh?
Klei mplư jing mta klei grăp čô phung đăo kơ Krist tlă anăp grăp hruê, anăn jing “Jih jang mnơ̆ng hlăm lăn ala, klei kđeh tluh, klei ală tluh, klei mgao hlăm klei hdĭp” (I Y‑Yôhan 2:16). Klei mplư kčưm mơ̆ng klei drei thâo kral msĕ si klei mnâo ƀâo mngưi, ƀơ̆ng jăk, ală dlăng siam, leh anăn truh kơ klei bi mĭn hing ang soh čhuai djă pioh nanao hlăm klei mĭn, leh anăn mơ̆ng klei bi mĭn truh jing kơ bruă ngă soh. Tơl wăt ƀĭng kna Khua Yang, Y‑Yuđas Iskariôt, ăt yang jhat ktŭng ngă soh hŏng Khua Yang mơh (Y‑Luk 22:3). Yang jhat pô ăt mplư Khua Yang drei mơh. Hlăk Khua Yang kčưm dơ̆ng ngă bruă, yang jhat yua mnơ̆ng ƀơ̆ng, klei hing ang leh anăn wăt yua Klei Aê Diê Blŭ mơh čiăng mplư, ƀiădah Khua Yang dưi hĭn kluôm dhuôm leh. Hlăm war djam Gêtsêmanê, lŏ sa blư̆ dơ̆ng, yang jhat duah êlan čiăng mplư Khua Yang brei lui êlan klei bi mtlaih. Khua Yang wah lač leh hŏng jih ai tiê, kraih ktang, tơl êa kơhŏ Ñu jing msĕ si kdrah êrah leh anăn Ñu dưi hĭn leh. Khua Yang bi kdơ̆ng klei êgah êmăn hlăm asei mlei kđeh hŏng klei wah lač lu blư̆, wah lač nanao, hŏng klei kwưh akâo djŏ msĕ si Ñu mtô leh phung ƀĭng kna Ñu: ƀiădah tui si Ama čiăng, amâo djŏ tui si Kâo čiăng ôh! (êlan 42). Mnơ̆ng bi blah bŏ hŏng klei ktang kơ Khua Yang Yêsu jing klei wah lač hŏng jih ai tiê hlăm klei Ama čiăng.
Čiăng dưi găn klei mplư, brei phung đăo kơ Krist dôk răng, wah lač, leh anăn weh đuĕ kbưi mơ̆ng klei mplư, khut khat hŏng klei soh msĕ si klei Khua Yang Yêsu mtô: “Tơdah kngan hnuă ih bi msoh kơ ih, khăt hwiê hĕ gơ̆ ti tač; jăk hĭn ih luč sa ƀĕ kngan kơ asei mlei ih hrông dôk hlăm war pui.” (Y‑Mathiơ 5:30). Klei dluh lĕ tơdah mâo klei mplư srăng atăt drei truh kơ klei ngă soh, luč klei êđăp ênang, klei jăk mơak ti lăn ala. Tơdah ăt kdlŭt êlam hĭn nanao hlăm klei soh, amâo čiăng kmhal kơ klei soh ôh, snăn srăng hlŏng luč wăt mngăt hlăm ênuk hlŏng lar yơh. Ti djiêô anăn, grăp čô drei brei thâo snei, hŏng klei ktang drei pô, amâo mâo pô tuôm dưi hĭn hŏng klei mplư ôh, kyuanăn yơh brei drei wah lač hŏng jih ai tiê, akâo kơ Yang Mngăt Jăk brei klei pap, klei ktang myang čiăng drei dưi hĭn hŏng klei mplư. Brei hdơr snei, mnuih jing grăp čô drei amâo kdlưn hĭn hŏng phung ƀĭng kna Khua Yang mphŭn dô ôh, “Mngăt čiăng snăk, ƀiădah kđeh jing awăt.” (Y‑Mathiơ 26:41). Kyuanăn, Khua Yang Yêsu mtô leh drei brei wah lač bi kdơ̆ng hŏng klei mplư êlâo kơ klei soh ngă kơ drei ngă soh: “Đăm atăt ba hmei hlăm klei mplư ôh, ƀiădah bi mtlaih hmei mơ̆ng Pô Jhat!” (Y‑Mathiơ 6:13). Akâo kơ Khua Yang brei grăp čô drei kpĭ mjuăt klei hdĭp myang drei pô, hŏng jih ai tiê wah lač čiăng dưi găn jih jang klei mplư hlăm klei hdĭp grăp hruê.
Ya mta klei soh drei akâo kơ Khua Yang brei drei lui hĕ, weh đuĕ kbưi, leh anăn hriăm mjuăt si ai mĭn wah lač čiăng dưi hĭn hŏng klei mplư?
Wah lač: Ơ Ama kâo khăp! Kâo thâo kâo jing awăt êdu, amâo klă kluôm ôh leh anăn dôk tlă anăp nanao hŏng klei mplư jŭm dar. Akâo Khua Yang đru kâo weh đuĕ kbưi mơ̆ng klei mplư leh anăn hŏng jih ai tiê wah lač, knang kơ Khua Yang čiăng dưi hĭn hŏng klei kđeh tluh, klei luar yang jhat, čiăng kơ klei Ama čiăng srăng jing hlăm klei hdĭp kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y‑Êsai 62
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
