Rôm 5:7-8
“Na kơplah bơ̆n oei pơm yoch, lăp minh ‘nu Yêsu Krist đĕch lôch tang bơ̆n. ‘Noh boih bơ̆n băt kơ ‘Bok Kei-Dei ‘mêm kơ kon bơngai bơ̆n tơpă.” (Rôm 5:8)
Nơ̆r jet tơchĕng pơwao:
– Kơplah ayơ đe wă lôch tang?
– Ayơ jơ̆ jơ năr gĭt kăl lăm tơdrong ‘Bok Krist lôch tang?
– Bơ̆n mơn thoi yơ gah tơdrong ‘mêm ‘Bok Kei-Dei?
Lôch tang kơ bơngai nai noh tơdrong gĭt kăl dêh. Rŏ lăng bơ̆n kư̆m đei đŏk ‘bơ̆t hla bơar ayơ ‘nei tơdrong hơ’mon gah minh ‘nu bơngai, bơngai ‘bă wă chu iŏk tơdrong pơmat lôch wă dŏng kon hơ’lơ̆p kơdih; minh ‘nu linh chu lôch wă dŏng yŏng sư, dŏng lu khul linh. Jing bơngai mă bu bu kư̆m ‘mêm gĭt dêh kơ tơdrong arih bơ̆n. mă khan lei ră lăm minh ‘bar tơdrong gĭt kăl thoi kơ tơdrong wă đei yua kơ hnam dơnŏ, kon pơlei, yua kơ wă dŏng tơdrong arih lu bơngai pơm ‘lơ̆ng lei na oei đei bơngai lôch tang ăn, mălei tơpă noh bơih lu tơdrong mă anat dêh wă kơ đei thoi nơ̆r ‘bok Pôl lăng. “Mă-lei dah kon bơngai bơ̆n, bơ̆n băt kơ buăl bơ̆n ưh kơ đei pơm yoch kiơ ră, mă-lei đe wă phak pơlôch sư, bơ̆n hui bơngai tơpă wă lôch tang buăl bơ̆n.” (Rôm 5:7 BTTHĐ).
Mă khan lei ră, đei minh tơdrong lôch tang pha ‘biơ̆, noh bơih Kră YangYêsu lôch tang kon bơngai “Na kơplah bơ̆n oei pơm yoch, lăp minh ‘nu Yêsu Krist đĕch lôch tang bơ̆n. ‘Noh boih bơ̆n băt kơ ‘Bok Kei-Dei ‘mêm kơ kon bơngai bơ̆n tơpă.” (trong 5:8). Lăm kơplah đe ưang kơ bơngai mă pơ̆n nuih chu lôch kơ tơdrong gĭt, tơplih tơdrong arih kơ lu bơngai mă trŏ kơ arih, lei na tơdrong Kră Yang Yêsu lôch tang phara tơpă. Yua kơ lu bơngai mă sư lôch tang noh tă kơ lu bơngai yoch, oei lăm tơdrong arih ayăt kơ Kră Yang ‘Bok Kei-Dei! “Na kơplah bơ̆n oei pơm yoch”. ‘Noh bơih tơdrong yoch pơang, pơm ưh kơ ‘lơ̆ng, hưch ham, pơm kiơ̆ kơdih, areh.v.v… păng tơdrong trăp hloh noh sơngah kơ ‘Bok Kei-Dei lei na sư đei tơ’bôh tơdrong ‘mêm Sư kơ lu bơ̆n. Kră Yang ưh kơ gô bơ̆n pơm ‘lơ̆ng tôm ‘mơ̆i na Sư ‘mêm kơ bơ̆n ôh. Kră Yang ưh kơ gô bơ̆n tơplih tơdrong bơ̆n lăng gah Sư ‘mơ̆i na Sư ‘mêm kơ bơ̆n ôh. Tơpă bơ̆n ưh kơ đei layơ ‘lơ̆ng tôm, păng bơngai yoch trŏ kơ lôch, lei na Kră Yang ‘Bok Kei-Dei đei tơ’bôh tơdrong ‘mêm Sư đơ̆ng tơdrong Kră Yang Yêsu huai iŏk tơdrong yoch thoi Yôhan đei khan: “Âu boih tơdrong ‘Bok Kei-Dei ‘mêm mơnat kơ bơ̆n: Sư ‘mêm mơnat kơ bơ̆n mah ăn Kon pôm Sư lôch tang bơ̆n, pơklaih bơ̆n đơ̆ng tơdrong yoch. Bơ̆n ‘mêm kơ Sư ưh kơ đei dang noh ôh.” (I Yôhan 4:10).
Lu bơngai mă iŏk tơdrong ‘mêm tih să noh, bơ̆n ưh pă gơh pơm thoi bơngai yoch dơ̆ng, ưh pă arih ayăt kơ Kră Yang ‘Bok Kei-Dei dơ̆ng bơih. Mălei bơ̆n athei lê̆ kơ tơdrong ‘mêm Kră Yang tơplih pơđĭ tôm tơdrong lăm bơ̆n, wă kơ rim năr ‘mêm kơ Kră Yang rai hloh. ‘Noh hăm trŏ kơ tơdrong tơchĕng rim ‘nu bơ̆n lăm bơyan ‘blŏk kơ Kră Yang Yêsu chu pơmat ‘nâu ưh?
Kơkuh kơ Kră Yang ‘Bok Kei-Dei mă ‘mêm, inh bơnê kơ Ih ling lang yua tơdrong ‘mêm tih Ih đei tơ’bôh ăn kơ inh đơ̆ng tơdrong Kră Yang Yêsu lôch. Apinh Ih tơgŭm kơ inh gơh tơplih rim năr wă kơ arih trŏ hăm tơdrong ‘mêm Sư, păng wă tơ’bôh tơdrong ‘mêm noh kơ lu bơngai jum dăr, krao khan yua anăn Kră Yang Yêsu Krist, Amen!
Bơ̆n gô pơm tơwih tơdrong ‘mêm Sư thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: II Lu Pơtao 10
Kênh Youtube BHKTHN:
