II Hơ’mon 20:1-13
“Tơpă lu nhôn ưh kơ đei jơhngơ̆m pran wă blah hăm lu lĭnh lơ kơdrâ̆m noh mă oei wă wang blah lu nhôn păng lu nhôn kư̆m đĭ pă băt wă pơm liơ; mă-lei măt lu nhôn lăng chang gô Ih đĕch”(II Hơ’mon 20:12b)
Nơ̆r jet tơchĕng pơwao:
– Kon pơlei Juđa tŏk-bŏk tơ’bơ̆p tơdrong truh anat anot kiơ?
– ‘Bơ̆t anăp tơdrong anat anot tih truh lăm dêh char sư, pơtao Jêhôsaphat hlôi pơm kiơ?
– Kơplah tơ’bơ̆p tơdrong anat anot tih, tơdrong adrol hloh bơ̆n athei tơchĕng păng pơm noh kiơ?
Kơplah ei bơngai tơmoi, char‘ngoaih ăn linh sư rơbâu rơbâu ‘nu năm blah tơgar dêh char Juđa. Lăp kơtơ̆ng tơdrong noh, Pơtao Jêhôsaphat hli tơpă. Na tơdrong mă blŭng a pơtao pơm noh sư “khŏm chơchă Kră Yang, păng krao athei đĭ-đăng kon pơlei lăm dêh char Juđa ơ̆t kơ sŏng sa.”(tr.3) Kon pơlei tơl tơwih hloi nơ̆r pơtao krao athei noh na đĭ jơhngơ̆m chơchă Kră Yang kơplah tơdrong anat tih truh lăm dêh char lu sư. Pơtao Jêhôsaphat băt krao chă Kră Yang ’Bok Kei-Dei lu’bok sư, wei răk pơm kiơ̆ dôm nơ̆r Kră Yang tơtă,ưh kơ pơm thoi kon pơlei Isơrael.”Pơtao Jêhôsaphat hlôi“đei jơhngơ̆m hiôk kơjăp kiơ̆ trong Kră Yang” đơ̆ng jơ năr sư ‘nao tŏk pơm pơtao.(II Hơ’mon 17:4-6). Jơ ‘nâu ‘bơ̆t sư tơ’bơ̆p tơdrong anat krưp krê truh lăm teh đak sư, sư ưh kơ hơmet tơdrong noh kiơ̆ kơ tơdrong gơh kĕ dah tơdrong tơchĕng sư kơdih ôh, mă-lei sư đĭ jơhngơ̆m krao chă tơdrong dŏng tơgŭm đơ̆ng Kră Yang’Bok Kei-Dei. Lăm nơ̆r sư krao khan apĭnh đĭ jơhngơ̆m noh sư băt kơnăl kơ KrăYang mă sư chă ei “‘Bok Kei-Dei lu ‘bok sư”; “Ih Kră Yang’Bok Kei-Dei wei pơgơ̆r đĭ kon bơngai, đĭ kơ teh đak”; “Lăm tơpang ti Ih đei tơdrong mơsêh pran kơtang ưh kơ đei bu kĕ tơblah hăm Ih.” (tr.6).Pơtao Jêhôsaphat jao kơ Kră Yang’bok Kei-Dei đĭ dôm tơdrong anat krưp krê truh lăm teh đak sư noh păng lui kơ minh ‘nu Kră Yang ’Bok Kei-Dei đĕch gơh dŏng pơklaih kon pơlei Kră Yang. Pơtao Jêhôsaphat tơ’blŏk dơ̆ng đêl tơdrong arih bơngai Isơrael đơ̆ng sơ̆ păng tơbral dôm tơdrong yoch glăi kon pơlei. Kơplah Jêhôsaphat ‘nâu kon pơlei Kră Yang khŏm pŭ iŏk tơdrong răm đơ̆ng tơdong ưh kơ chu mơ̆ng pơm kiơ̆ nơ̆r Kră Yang.(tr.7-11). Sư krao apĭnh Kră Yang lăng mơnat kon pơlei păng dŏng pơklaih lu sư. Dơ̆ng ‘bơ̆t anăp tơdrong gleh pơmat anat anot, pơtao Jêhôsaphat păng kon pơlei Juđa hlôi tơjur akâu iŏk đon ala chơchă Kră Yang’Bok Kei-Dei, ơ̆t kơ sŏng sa, krao apinh tơdrong dŏng pơklaih đơ̆ng Kră Yang. Sư drơ̆ng sư hăm kon pơlei sư rơdu tơrăn yoch kơnê̆, ưh kơ ‘lơ̆ng tôm tơdrong, ưh kơ đei jơhngơ̆m pran wă blah plơ̆ lu ayăt mă blah tơgar dêh char lu sư. Tuch luch sư, Kră Yang hlôi tơl tơwih nơ̆r sư krao apinh păng tơgŭm lu sư blah lu ayăt noh jei lu sư, jei hăm tơdrong ‘lơ̆ng rŏ ư-ang. (II Hơ’mon 20:14-26). Kơplah tơ’bơ̆p tơdrong gleh pơmat anat anot tih, bơ̆n ngăl tơchĕng inh wă pơm kiơ, păng bơ̆n ngăl pơpôi băl chă trong liơ wă pơjăng pơjăr hăm tơdrong truh anat noh.PơtaoJêhôsaphat hlôi tơ’bôh kơmĭl krao chă Kră Yang adrol hloh. Đĭ-đăng kon pơlei sư pơpôi băl ei ưh kơ khan wă pơđâu băl chă trong pơm liơ ‘nei ôh, mă-lei wă hơdai dih băl wei kơjăp đon lui lăm Kră Yang păng krao chă tơdrong dŏng tơgŭm đơ̆ng Kră Yang. Pơhrăm rok kiơ̆ ‘bok Jêhôsaphat, bơ̆n ưh kơ lăng tơ tơdrong truh anat anot noh wă pơjăng pơjăr kiơ̆ kơ tơdrong hlôh wao bơ̆n kơdih, kư̆m ưh kơ kơdâu ôn đơ̆ng tơdrong truh anat, mă-lei đĭ jơhngơ̆m krao khan, jao kơ Kră Yang’Bok Kei-Dei đĭ dôm tơdrong bơ̆n hli hiơ̆k păng lui gơnang kơ minh Sư đĕch dŏng tơgŭm bơ̆n. Jơhngơ̆m bơ̆n athei lui kơjăp kơ Kră Yang thoi âu: “Lăm tơpang ti Ih đei tơdrong mơsêh pran kơtang, ưh kơ đei bu kĕ tơblah hăm Ih”(tr.6)
Kơkuh kơ Ih Kră Yang, kơplah tơ’bơ̆p tơdrong truh anat‘bơ̆t anăp inh, apinh Ih tơ’blŏk kơ inh pơhrăm rok kiơ̆ kơmĭl pơtao Jêhôsaphat ling-lang băt krao chă Ih adrol hloh, apinh Ih tơgŭm inh tơwih jơhngơ̆m lăng tơ tơdrong mơsêh pran kơtang Ih, ưh kơ gơnang kơ tơdrong gơh hơgei dah jơhngơ̆m pran ĭnh kơdih. Inh krao khan yua anăn Kră Yang Yêsu Krist, Amen!
Bơ̆n ngăl chă trong wă pơjăng pơjăr hăm tơdong gleh anat truh dah mă bơ̆n krao chă Kră Yang adrol hloh?
Đŏk Sơ̆p Hla bơar ‘Bok Kei-Dei lăm pêng sơnăm: Luka 8
Kênh Youtube BHKTHN:
