Nehemis 4:6, 15-23
Nqe cim.
“Yog li ntawd, peb thiaj li koomtes txhim kho tus ntsa yeej tuaj sib cob, thiab qhov siab twb ua txog nrab lawm, rau qhov cov neeg sawvdaws rau siab ua haujlwm kawg li” (Nehemis 4:6)
Lus nug rau sawvdaws xav.
– Nrog rau kev thov Vajtswv, Nehemis tseem ua dabtsi ntxiv?
– Peb kawm tau tej txojcai sab ntsujplig tseemceeb twg los coj hauv tus kheej lubneej?
Txojkev ntseeg muab cob txhua yam rau tus Tswv tau txhawb Nehemis rau siab thov Vajtswv, thiab txojkev ntseeg ntawd kuj pab Nehemis nrog rau cov pejxeem sawv ua haujlwm tomqab thov Vajtswv, lawv muaj lub siab tawv ua tes haujlwm tus Tswv muab cob. Qhov no qhia pom hais tias kev thov Vajtswv yuav tsum yog yam xub ua tiamsis yuav tsum ua haujlwm tomqab ntawd thiab. Tus Tswv yuav ua haujlwm thaum tus ntseeg Nws taij thov thiab kuj nqis tes ua haujlwm. Nehemis cia siab ntsoov rau Vajtswv tus uas muaj hwjchim, nws kuj sawv los ua haujlwm hauv lub hwjchim ntawd (nqe 20). Nehemis ua tas dag tas zog, tiamsis nws kuj zeem paub hais tias tus Tswv yog lawv lub zog, thiab kev muaj yeej yog tus Tswv pub. Peb saib kev thov Vajtswv tseemceeb tiamsis kuj yuav tsum siv zog ua haujlwm raws li lub tswvyim tus Tswv pub. Qhov txhaum tsis yog thaum thov Vajtswv thiab ua haujlwm; tiamsis yog thaum tsuas ua haujlwm ho tsis thov Vajtswv pab.
Peb kuj zeem paub hais tias tshwj qhov uas raug tawmtsam vim ua yuamkev, ces lwm yam kev tawmtsam kuj tsis yog vimchiv ua rau peb tso haujlwm tseg. Nehemis tsis tso tes haujlwm txhim kho tus ntsa yeej tseg mus tawmtsam yeebncuab. Dhau qhov ntawd, Nehemis paub tus Tswv heev dua qub: Nws paub tias tus Tswv yog tus nyob ze nws thiab hnov nws tej lus thov (nqe 4, 9); tus Tswv yog tus ncaj ncees, rau txim rau cov neeg phem (nqe 4); yog tus Vajtswv muaj hwjchim loj kawg nkaus thiab txaus ntshai (nqe 14); tus Tswv yog tus tswjkav txhua yam, thiab kov yeej yeebncuab “lub tswvyim ua phem” (nqe 15); thiab “peb tus Vajtswv yuav pab peb tua peb cov yeebncuab.” (nqe 20).
Yeebncuab xav kom peb khiav ntawm peb qhov chaw thiab tawm ntawm tus Tswv txojkev nqua hu mus; vim li ntawd, yim ntsib kev txomnyem, Pawg Ntseeg yim yuav tsum koom siab hauv kev thov Vajtswv thiab ua Vajtswv haujlwm. Txhob xav hais tias thaub rov qab ces teebmeem yuav xam mus. Yog peb totaub hais tias tej kev sim siab, tawmtsam uas tus Tswv pub los raug thaum peb ua Nws haujlwm yog pab kom peb loj hlob tiav, paub tus Tswv tseeb, ntseeg ruaj khov, ces qhov uas thaub rov qab yog ib txojkev swb loj. Peb muaj peevxwm thaub ntawm kev ua tus Tswv haujlwm los tseg sijhawm taij thov Vajtswv lossis ua tus Tswv lwm yam haujlwm… tiamsis tsis txhob tso haujlwm tseg vim ntsib kev txomnyem lossis kev tawmtsam.
Gregory Brown sau hais tias: “Tseeb tiag, Nehemis thiab cov Yixalayees muaj cuabkav tso tes haujlwm tseg thaum lawv cov yeebncuab chim, kom lawv tsis raug yeebncuab tua. Tiamsis, tso haujlwm tseg tsis ua rau lawv tau nyob kaj siab. Tus uas tsis npuab siab yog tus ntsib teebmeem loj dua ntais. Xatas txojkev ntshaw yog tuaj nyiag, tuaj tua, thiab ua kom puastsuaj (Yauhas 10:10). Qhov chaw nkaum qab siab tshajplaws yog niaj hnub nyob hauv Vajtswv dej siab”.
Thov Vajtswv,
Tus Tswv, thov ua Koj tsaug vim Koj nyob nrog nraim nyuam yaus, yog tus tswjkav uas muaj hwjchim thiab zoo kawg nkaus. Thov coj nyuam yaus kev, pub tswvyim thiab lub siab tawv rau nyuam yaus ua raws Koj tej lus. Nyuam yaus tuav Yexus Khetos lub npe thov, Amees.
Peb puas sawv ua haujlwm tomqab thov Vajtswv lawm tau?
Nyeem Vajluskub hauv peb lub xyoos: Lukas 6
Kênh Youtube BHKTHN:
