II Hơ’mon 29:25-30
“Păng bơ̆n athei hơri bơnê kơ Kră Yang hăm đĭ jơhngơ̆m, mă bơ̆n hơri tơdrong ‘Bok Kei-Dei hơdai hăm bơngai tơpôl, mă bơ̆n hơri tơdrong lu bơngai kră sơ̆, mă bơ̆n hơri tơdrong lu bơngai dang ei, mă bơ̆n hơri kiơ̆ kơ đon bơ̆n tơchĕng kơdih.” Êphêsô 5:19)
Nơ̆r jet tơchĕng pơwao:
– Pơtao Hesekia proh dan tơdrong akŭm kơkuh kơ Kră Yang hăm tơdrong reh hơri thoi yơ?
– Kon pơlei mơn ‘bôh thoi yơ kơplah lu sư đĭ jơhngơ̆m hơri bơnê ư-ang kơ Kră Yang?
– Rim ‘nu kơ bơ̆n dang ei tŏk-bŏk kơkuh kơ Kră Yang hăm tơdrong reh hơri thoi yơ?
Pơtao Hesekia hlôh tơdrong kơkuh mă Kră Yang lăp đon drơ̆ng iŏk, noh athei kơkuh kiơ̆ kơ tơdrong Sư tơ’bôh ăn . Yua kơ thoi noh pơtao ăn lu bơngai Lêwi chĕp dôm lu tơmam reh dơ̆ng kơtă lăm Hnam akŭm, na lu ‘bok soi chĕp keng, kiơ̆ kơ tơdrong juăt đơ̆ng ‘bok Đawit hăm lu bơngai pơtruh nơ̆r ‘Bok Kei-Dei đei pơm sơ̆ “yua kơ tơdrong ‘noh đơ̆ng Kră Yang athei, na Sư yua lu bơngai pơtruh nơ̆r Sư bơtho kon pơlei Sư. (tr.25). Kơkuh kơ Kră Yang hăm tơdrong reh brŏ hơri noh tơdrong Kră Yang wă, ‘bok Đawit hlôi pơm kiơ̆ bơih đơ̆ng sơ̆.Pơtao Hesekia pơm kiơ̆ trŏ thoi tơdrong juăt Kră Yang dan, lu keng, noh lê̆ lu ‘bok soi hlôm. Lăm lu tơmam re ‘nâu pôm keng đĕch đơ̆ng ‘Bok Kei-Dei athei Môis pơm păng tơmơ̆t yua lăm tơdrong kơkuh kơ Kră Yang. (Jô̆ bơngai 10:1-10), na lu tơmam re nai ‘noh đơ̆ng Đawit pơm păng tơmơ̆t yua lăm tơdrong kơkuh kơ Kră Yang,
Lei na đe krao “tơmam reh đơ̆ng ‘bok Đawit” ‘Bơ̆t jơ pơtơm kơkuh kơ Kră Yang, pơtao Hesekia athei lu ‘bok soi pơyơ̆r tơmam soi ‘buh mă khan lu sem dơrong wă pơm tơmam soi noh đe pơlôch lê̆ adrol kơ ‘noh bơih ră. Kơplah đe pơyơ̆r tơmam soi, đei khul hơri lu bơngai Lêwi, lu sư hơri bơnê ư-ang kơ Kră Yang, đe hlôm keng, păng reh dôm tơmam reh nai đơ̆ng Đawit pơm noh tơmơ̆t hơdai hăm nơ̆r hơri. Tơmam soi ‘bâu phu păr truh tơ Kră Yang; nơ̆r hơri, hlôm keng, reh brŏ jơwa truh tơ Kră Yang. Đĭ-đăng kon pơlei drap kơkuh kơ Kră Yang, khŭl hơri, reh brŏ kư̆m oei hơnơ̆ng kơ hơri, reh dĭng lu ‘bok soi pơyơ̆r tơmam soi ‘buh keh đang. Lăp lu tơmam soi khôi đĭ bơih, pơtao Hesekia hăm đĭ-đăng lu bơngai tơ ei tơ̆m kŭl tăng kơkuh kơ Kră Yang. Lăm anih pơyom ‘nâu, pơtao hăm lu kuan tih athei lu bơngai Lêwi hơri bơnê ư-ang kơ Kră Yang hăm lu nơ̆r Hơri So đơ̆ng ‘bok Đawit păng ‘bok Asap chih. Thoi noh lu sư hơri bơnê ư-ang păng drap kơkuh kơ Kră Yang hăm jơhngơ̆m hiôk chơt tơpă.
Kơkuh kơ Kră Yang, kơkuh hăm reh brŏ, kơkuh đĭ jơhgơ̆m kiơ̆ kơ Kră Yang wă, noh ba ăn kon pơlei hiôk chơt ‘nă hal. (tr.30; I Hơ’mon 15:16; II Hơ’mon 23:18). Đơ̆ng tơdrong reh brŏ hơri, lu sư tơ’bôh tơdrong lu sư kơkuh pơyom kơ Kră Yang,tơ’bôh tơdrong lu sư tơbral tơdrong yoch glăi, tơ’bôh jơhngơ̆m lu sư chu yom păng tơ’bôh jơhngơ̆m lu sư băt bơnê kơ Kră Yang v.v…wă năm ‘bơ̆t anăp Kră Yang. Tơ pơlei ‘lơ̆ng, dôm lu bơngai lui, bơngai gah Kră Yang bơih kư̆m gô kơkuh kơ Kră Yang hăm tơdrong reh hơri (Tơdrong tơ’bôh 14:1-5).
Đơ̆ng sơ̆ khơ̆ dang ei, kơkuh kơ Kră Yang hăm tơdrong reh hơri, tơdrong noh Kră Yang ling-lang lăp đon. Bơ̆n bơngai mĕ’bă, bơ̆n athei pơpôi tôm tơdrong ăn kơ kon hơ’lơ̆p bơ̆n pơhrăm nôt hơri, pơhrăm reh gitar, reh brŏ. Dah bơ̆n bơngai gơh reh gitar, gơh reh brŏ, bơ̆n athei mơ̆t hơdai khul reh brŏ. Bơ̆n kon pơlei Kră Yang , bơ̆n athei mơ̆t lăm khŭl hơri lăm Khul lui jơ’bôt. Lu bơngai mă pŭ iŏk tơdrong jang, hăm lu bơngai wei jơ akŭm hai, đĭ-đăng athei hơmet lê̆ adrol mă pơ ’lơ̆ng, mă tôm ‘mơ̆i wă hơri ư-ang kơ Kră Yang. Khul Lui athei hơri hăm đĭ jơhngơ̆m bơnê ư-ang kơ Kră Yang kơplah jơ akŭm kơkuh.Kră Yang gô ăn hiôk chơt ‘nă hal mưh lu bơ̆n đĭ jơhngơ̆m kơkuh kơ Sư hăm tơdrong reh brŏ hơri.
Lu bơ̆n wang pơdŏng hơdai thoi yơ lăm tơdrong kơkuh kơ Kră Yang hăm tơdrong reh brŏ hơri?
Kơkuh kơ Ih Kră Yang, apinh Ih ăn kơ inh đĭ jơhngơ̆m lăm tơdrong akŭm kơkuh păng bơ̆jang kơ Ih hăm tơdrong reh brŏ hơri wă ư-ang kơ Ih, pơm kiơ̆ kơ Ih wă, păng wă kơ lu bơngai nai kư̆m băt kơ Ih,kơkuh, hơri bơnê ư-ang kơ Ih mơ̆n. Inh krao khan yua anăn Kră Yang Yêsu Krist, Amen!
Đŏk Sơ̆p hla bơar ‘Bok Kei-Dei lăm pêng sơnăm: II Samuel 13
Kênh Youtube BHKTHN:
