Êsai 9:1
Trong tơm: “Kon pơlei năm lăm măng mu ‘bôh bơih tơdrong hơdah tih; păng tơdrong hơdah pơchrang bơih kơ lu bơngai oei lăm dêh măng mu gueo.” (Êsai 9:1)
Nơ̆r jet tơchĕng pơwao:
– Tơdrong arih kon pơlei Kră Yang thoi yơ păng Kră Yang đei pơkă kơ lu tơdrong kiơ?
– Hơdah tih noh jơ̆ bơngai bu?
– Tơdrong Kră Yang Yêsu đei tơpŭ pơm ‘blep trŏ kơ nơ̆r pơkă ‘nâu thoi yơ?
Hơdrol kơ Kră Yang Yêsu đei rơneh lăm teh đak hrĕng sơnăm, ‘Bok Êsai bơngai pơtruh nơ̆r ‘Bok Kei-Dei đei pơdah ăn kơ lu kon pơlei pơla Kră Yang. Lu sư “yak năm lăm mang mu” hăm “dêh mă thŭng yơ̆p tơdrong lôch”. “Anih măng mu” noh jơ̆ tơdrong yoch mă lu sư đei pơm, lôch răm, ataih đơ̆ng Kră Yang jơ̆ tơdrong hơdah ‘lơ̆ng. “Thŭng yơ̆p tơdrong lôch” noh jơ̆ tơdrong wă truh tih ăn kơ lu sư, wă khan lu bơngai nguaih bơngai ayăt kơ lu sư wă wang kơ dêh char lu sư păng tơdrong arih lu sư wă ‘bônh kơ hiong tôch, nhen thoi rup sơ’ngon lăm chăl arih, mă lei nơ̆r Kră Yang đei pơkă khan lu sư gô ‘bôh “hơdah tih” păng hơdah noh gô pơchrang kơ lu sư, păng krôp gom lu sư.
Tơdrong hơdah tih jơ’nâu wă khan tơdrong dŏng pơklaih đơ̆ng Kră Yang. Kră Yang ưh kơ lê̆ kon pơlei pơla sư ling lang jrok trong lăm tơdrong yoch lu sư. Kră Yang gô pơchrang hơdah kơ lu sư, ba lu sư tơ lăm tơdrong ‘lơ̆ng tơpăt Sư wă dui ba lu sư đơ̆ng lăm dêh lôch răm năm tơanih tơdrong arih. Lu bơngai Israel hlôh hơđăl kơ tơdrong hơdah tih noh jơ̆ ‘Bok Dŏng Pơklaih. Yua kơ lăm hơrĭ đơ̆ng lăm trong noh, Êsai đei pơma thoi âu: ““Đei tơpŭ ăn kơ lu bơ̆n minh ‘nu kon nge, ăn kơ bơ̆n minh ‘nu kon drŏ-nglo, tơdrong pơgơ̆r tơ kơpal hơngiĕng Sư, đe gô krao Sư Kră Yang pơlung tơgŭm Kră Yang ‘Bok Kei-Dei Mơsêh Mơyang, ‘Bă Arih Ling-Lang Kră Yang kon Pơtao Hiôk-Hian.” (Êsai 9:5)
Lăm minh măng hơdrol sơ̆ dang 2000 sơnăm, ‘Bok Dŏng Pơklaih đei jur jing kon bơngai. Minh măng hơđơ̆ng hiôk đei ‘bôh rang mơnhal hơdah yua kơ đei linh jang ‘lơ̆ng ‘Bok Kei-Dei tơpal plĕnh, roi tơbăt kơ đĭ đăng kon bơngai ‘Bok Dŏng Pơklaih đei jur bơih. Kră Yang Yêsu jur jing bơngai, arih hơdai hăm kon bơngai, Sư jơ̆ thoi hơdah pơchrang lăm măng mu. Kră Yang đei bơtho khan thoi âu: “Yêsu bơtho dơ̆ng thoi âu: “Inh pơchrang hơdah kơ kon bơngai jơ̆p-jang kơ teh đak wă kơ sư băt tơdrong ‘Bok Kei-Dei. Bơngai bu kiơ̆ Inh sư huay năm lăm măng mu kiơ̆ tơdrong yoch, sư gô đei Inh pơchrang hơdah kơ sư păng ăn sư arih ling-lang.” (Yôhan 8:12)
Rim truh bơyan Nôel, rim kơ phô̆ đei lơ ŭnh pơchrang, mă lei đơ̆ng gah rŏng kơ ŭnh ‘lơ̆ng rŏ noh đei lơ bơngai oei lăm tơdrong pơmat, lu bơngai mă yak năm ưh kơ đei băt đei tơdrong kơnhăm kiơ lăm chăl arih sư. Tơpă lu bơ̆n lăng hơ iă kơ lu ŭnh gơ̆p đei pơrŏ mă lei minh Kră Yang Yêsu đĕch gơh dŏng pơklaih lu bơ̆n đơ̆ng lăm anih măng mu lăm chăl arih. Hơpơi apinh lăm Nôel sơnăm ‘nâu lu bơ̆n đei sơng iŏk tơdrong hơdah tih đơ̆ng Kră Yang păng klah song ăn kơ lơ bơngai.
Lu bơ̆n ‘maih wă klah song tơdrong hơdah tih ăn kơ lơ bơngai oei arih lăm măng mu thoi yơ?
Ơ Kră Yang mă ‘mêm kơ eng, lăm tơdrong hơdah rang rŏ kơ lăm năr Nôel mă blŏk kơ Kră Yang Yêsu jur jing bơngai, tơ ‘nguaih to oei đei lơ bơngai wơ̆l kơ trong lăm tơdrong arih măng mu, ưh kơ đei tơdrong hơdah tơdrong arih. Apinh Ih tơgŭm inh băt kơ hơmet jơhngơ̆m wă kơ tơdrong hơdah Ih đei pơchrang, păng ăn kơ inh băt yua jơnăr na ba ăn tơdrong hơdah tơdrong dŏng pơklaih ăn kơ lu bơngai ưh tam mă băt kơ Kră Yang. Yua anăn Kră Yang Yêsu Krist. Amen.
Đŏk Sơ̆p Hla bơar ‘Bok Kei-Dei lăm pêng sơnăm: I Samuel 22
Kênh Youtube BHKTHN:
