Galati 4:4-5
Trong tơm: “Mă-lei truh boih năr ‘Bok Kei-Dei pơkă, Sư wơh Kon Sư jur tơ ala teh âu. Kon bơngai bơ̆n tơpŭ kơ Sư, thoi noh na Sư kiơ̆ tôm tơdrong juăt kon bơngai.” (Galati 4:4)
Nơ̆r jet tơchĕng pơwao:
– “Trŏ kơ jơnăr hơgăt” wă khan thoi yơ?
– Kră Yang ‘Bok Kei-Dei đei hơmet ‘măn lê̆ jơnăr thoi âu liơ bơih?
– Tơdrong Kră Yang Yêsu jur lăm teh đak “trŏ kơ jơnăr” tơgŭm bơ̆n thoi yơ?
Sơ̆p hla bơar Nơ̆r ‘Bok Kei-Dei pơdah hơđăl kơ Kră Yang Yêsu, noh jơ̆ Kon ‘Bok Kei-Dei, đei rơneh “trŏ kơ jơnăr”. Noh jơ̆ jơnăr mă Kră Yang ‘Bok Kei-Dei đei hơmet đơ̆ng tam mă pơjing plĕnh teh sơ̆. Dôm tơdrong jang Kră Yang Yêsu đei hơmet lê̆ đơ̆ng hơdrol kơ pơjing plĕnh teh sơ̆ (Tơ’bôh 13:8), đơ̆ng hrĕng sơnăm, rơbâu sơnăm đơ̆ng sơ̆, ‘Bok Kei-Dei đei pơkă ăn ‘Bok Mê-si, tơngla mă Kră Yang đei rơih iŏk, wă dŏng pơklaih hơdrĕch mă Kră Yang đei rơih bơih (Êsai 7:14,9:5-6; Mika 5:1). Nâu bơih trŏ kơjơ mă Kră Yang wă đei bơ̆jang, ưh kơ hrôi dah mă klui mă lei trŏ kơ jơnăr ‘lơ̆ng rŏ.
Kră Yang ‘Bok Kei-Dei đei hơmet lê̆ dôm tơdrong lăm chăl mă Kon Sư đei jur lăm teh đak, wă dŏng pơklaih kon bơngai bơ̆t jơnăr ‘lơ̆ng trŏ thoi Sư wă. Gah tơdrong pơgơ̆r, lu bơngai Rôm đei pơgơ̆r lơ teh đak păng să dêh teh đak lu sư păng pơtao Sêsar Ôgut wă kơ băt kơ tơdrong sư pơgơ̆r na athei chih măt đĭ đăng tơring sư pơgơ̆r păng lu sư athei brŏk tơ pơlei lu sư kơdih kơdih na chih tơmơ̆t măt tơnoh (Luka 2:1). Thoi noh, na Yôsep păng Mari athei brŏk tơ pơlei sư Bêtlêhem “wă chih tơmơ̆t măt sư păng Mari đei sơkơ̆t bơih păng sư mă oei hơnăp” (Luka 2:5), thoi noh jơ̆ ‘blep trŏ thoi Sơ̆p hla bơar ‘Bok Kei-Dei đei khan lê̆ hơdrol (Mika 5:1). Gah lăm tơdrong lui, nâu jơ̆ jơnăr mă lu bơngai Israel đei chang gô dêh ‘bok Pơtao đơ̆ng ‘Bok Kei-Dei ăn wă dŏng pơklaih lu sư, bơngai mă Sơ̆p hla bơar ‘Bok Kei-Dei đei chih lăm rim kơ lu bơngai pơtruh nơ̆r ‘Bok Kei-Dei pah so. Gah tơdrong hŏk pơhrăm, jơ’nâu jơ̆ chư Grĕk đei yua kơ lơ teh đak wă kơ Kră Yang Yêsu đei rơneh na wă kơ Tơdrong ‘Nao ‘Lơ̆ng đei roi jơ̆p jang ăn kơ kon bơngai.
Lu bơ̆n apinh tơdrong kiơ? Tơdah lu bơ̆n chang gô bơih ră mă lei ưh tam mă đei tơl nơ̆r bơ̆n apinh, athei chơ̆n jơhngơ̆m yua kơ Kră Yang ưh kơ đei layơ mă hiơ̆ kơ nơ̆r Sư pơkă. Kră Yang oei hơmet jơnăr ‘lơ̆ng rŏ ‘nei kơnh. Năr mă Kră Yang Yêsu đei rơneh ‘nâu jơ̆ pơsĭt kơ tơdrong noh. Păng bơ̆n mă oei chang hơmĕng tơdrong kiơ, nĕ kơ hiơt Kră Yang ăn kơ bơ̆n tơdrong ‘lơ̆ng hloh kơ lu bơ̆n- yua kơ đei Kră Yang Yêsu đei rơneh lăm teh đak âu, na lu bơ̆n gơh jing kon ‘Bok Kei-Dei. Jơnăr Nôel noh jơ̆ jơnăr Kră Yang ‘Bok Kei-Dei đei hơgăt kơ Kon Sư jur lăm teh đak păng “dŏng pơklaih lu bơngai oei kiơ̆ kơ khôi juăt, păng ăn kơ lu bơ̆n jing kon Sư” (Galati 4:5)
Bơ̆n đei mơn kơ tơdrong mă Kră Yang đei pơm lăm tơdrong ‘lơ̆ng rŏ trŏ thoi sư pơkă sư thoi yơ?
Ơ Kră Yang, Inh bơnê kơ Ih yua kơ ih jơ̆ Kră Yang ‘Bok Kei-Dei kơ dôm lu mă pơkă sĭt păng pơm trŏ kơ jơnăr pơkă noh. Inh bơnê kơ Ih yua kơ tơdrong Kră Yang Yêsu đei jur lăm teh đak tơblŏk ăn kơ inh băt Kră Yang ưh kơ đei layơ mă hiơt kơ inh, Kră Yang Yêsu đei jur bơih wă kơ inh gơh jing kon Ih. Apinh ih tơgŭm inh oei chang gô tơdrong mă Ih đei pơkă păng gô pơm keh. Yua anăn Kră Yang Yêsu Krsit, Amen.
Đŏk Sơ̆p Hla bơar ‘Bok Kei-Dei lăm pêng sơnăm: I Samuel 21
Kênh Youtube BHKTHN:
