Yaxayas 9:2
Nqe cim:
“Cov neeg uas taug kev tsaus ntuj nti tau pom kev kaj nrig. Lawv nyob hauv lub tebchaws uas tsaus ntuj nti, nimno tshav ntuj ci kaj nrig rau lawv lawm.” (Yaxayas 9:2)
Lus nug rau sawvdaws xav:
– Tus Tswv haivneeg lub neej zoo li cas thiab Nws coglus yuav pub yam dabtsi rau lawv?
– Pom kev kaj yog hais txog leejtwg?
– Qhov uas Tswv Yexus los yug ua tiav lo lus cog tseg no zoo li cas?
Ntau pua xyoo ua ntej thaum Tswv Yexus tsis tau los yug, tus cevlus Yaxayas twb hais txog tus Tswv haivneeg kev ua neej. Lawv “taug kev tsaus ntuj nti”, thiab “nyob hauv lub tebchaws tsaus ntuj”. “Kev tsaus ntuj” yog hais txog lub neej ua txhaum, puastsuaj, txav deb Vajtswv tus uas yog lub hauvpaus kaj nrig. “Tebchaws tsaus ntuj” yog hais txog tej kev txhawj ntshai uas lawv tabtom raug, xws li lub tebchaws yuav raug yeebncuab vij, yuav raug tua povtseg. Nyob rau lub tsamthawj tsaus ntuj nti no, Vajtswv coglus hais tias lawv yuav “pom kev kaj” thiab qhovkaj ntawd yuav ci tuaj rau lawv, yuav kav tagnrho lawv.
Pom kev kaj yog hais txog Vajtswv qhov kev cawm. Nws tsis cia Nws haivneeg tsau rawv rau hauv tej kev txhaum ntev. Nws yuav ua qhovkaj ci mus rau lawv, coj lawv rov qab los cuag qhov tseeb, kom lawv dim hauv lub tebchaws tsaus ntuj los nyob rau lub tebchaws pom kev. Cov neeg Yixalayees paub hais tias qhovkaj yog hais txog Yexus Khetos. Rau qhov cov nqe txuas ntxiv, tus cevlus Yaxayas hais tias, “Muaj ib tug menyuam twb los yug hauv peb cov lawm! Vajtswv muab ib tug tub pub rau peb! Thiab nws yuav ua tus kav peb, nws lub npe yuav hu ua “Tus Tuavxam tus uas muaj Txujci”, “Vajtswv tus muaj hwjchim”, “Vaj Leej Txiv tus uas nyob mus ibtxhis,” “Vajntxwv tus uas muaj kev thajyeeb.” (Yaxayas 9:6).
Nyob rau hmo uas tsaus ntuj nti 2.000 xyoo ua ntej, tus Cawmseej tau los yug ua neeg. Ib hmos uas nyob ntsiag to, twb muaj qhov kaj ci kaj nrig uas yog cov timtswv ceebtsheej los tshaj xo rau txhua haivneeg paub tias tus Cawmseej twb los yug lawm. Tswv Yexus los yug ua neeg, nrog neeg nyob, yog qhov pom kev kaj mus rau qhov tsaus. Tus Tswv hais tias, “Kuv yog qhov kaj rau neeg ntiajteb. Tus uas raws kuv qab yuav tsis taug txojkev uas tsaus ntuj nti, tiamsis nws yuav tau lub neej tshav ntuj nrig.” (Yauhas 8:12).
Txhua lub caij ua koob tsheej nco txog Tswv Yexus los yug, tej kev hauv nroog luag kho muaj teeb cig ntsais liab vog. Tiamsis tomqab tej teeb cig ntsais ntawd muaj cov neeg ua neej txomnyem ntsuav, muaj cov neeg taug kev mus tiamsis lawv tsis paub hais tias lawv mus rau qhovtwg. Peb zoo siab thaum muaj tej teeb cig, tiamsis tsuas yog Tswv Yexus tib leeg xwb thiaj cawm tau peb dim txojkev tsaus ntuj ntawm lub neej xwb. Thov Vajtswv pab kom dhau lub koob tsheej nco txog Tswv Yexus los yug xyoo no, peb tau txais qhov pom kev kaj ntawm tus Tswv thiab qhia pub rau lwm tus.
Thov Vajtswv,
Tus Tswv, peb nyob rau lub caij nyoog ua koob tsheej nco txog Tswv Yexus los yug kaj siab, tiamsis tseem muaj ntau leej tabtom taug txojkev tsaus ntuj nti, tsis pom kev kaj nrig. Thov Koj pab nyuam yaus npaj txhij lub siab txais yuav qhov kaj thiab siv lub sijhawm muaj nqis coj qhov kaj mus cawm cov neeg tsis tau paub Koj. Nyuam yaus tuav Tswv Yexus lub npe thov, Amees.
Peb xav qhia qhov kaj mus rau cov neeg uas tseem nyob hauv qhov tsaus ntuj nti zoo li cas?
Nyeem Vajluskub hauv peb lub xyoo: I Xamuyees 22
Kênh Youtube BHKTHN:
