Rôm 10:13-17
Trong tơm: “Gah lu bơ̆n, bơ̆n lui boih, noh đơ̆ng đe năm bơtho tơdrong ‘nao ‘lơ̆ng Yêsu Krist na bơ̆n lui.” (Rôm 10:17)
Nơ̆r jet tơchĕng pơwao:
– ‘Bok Pôl roi tơ’bôh tơdrong kiơ lăm trong 13?
– Sư oei tơ’bôh lu nơ̆r jet hơyơ păng hăm kơnhăm tơdrong kiơ?
– Kră Yang pơma tơdrong kiơ hăm lu bơ̆n lăm ‘bai pơhrăm năr ‘nâu?
Lăm trong 13, ‘bok Pôl tơ’bôh tơbăt tơdrong sĭt mă ‘bônh đĕch mălei kăl dêh tơpă. “Đĭ-đăng bơngai mă băt kơ apinh Sư, Kră Yang tơgŭm pơklaih lu sư lei-lăi đĕch.” ‘Nâu jơ̆ tơdrong kăl tơm Tơdrong ‘Nao ‘Lơ̆ng- Tơdrong dŏng pơklaih yua đơ̆ng đei đon lui lăm ‘Bok Dŏng Pơklaih Yêsu. Nơ̆r roi tơ’bôh tơbăt âu yua iŏk kơ đĭ-đăng bơngai, ưh kơ pơdê kơ adrĕch adrung, tơdrong jang dah đơ̆ng adrol sơ̆ kơ bơngai ‘noh. Đơ̆ng noh sư oei tơlĕch ăn lu nơ̆r jet pơnhen đơ̆ng lăm hơrĭ tơplơ̆ dơ̆ng wă bơtho tơ’bôh lu kơnao yak wă tơgŭm lu bơngai ‘măn đon lui lăm Kră Yang Yêsu Krist. “Mă-lei dah ưh kơ đei bơngai năm bơtho, thoi yơ đe gơh krao khan adrol? Ưh kơ đei bơngai năm bơtho, thoi yơ đe gơh kơtơ̆ng adrol? Kră Yang ưh kơ wơh đe chă năm bơtho, thoi yơ đe gơh năm bơtho adrol? Mă-lei Sư wơh đe năm bơtho bơih.” (trong 14-15). Thoi noh, wă kơ minh ‘nu bơngai lui păng sơng iŏk Kră Yang Yêsu, gơh jô̆ ‘lơ̆ng tơpăt. Adrol hloh kăl kơ đei bơngai pơm kiơ̆ nơ̆r Kră Yang krao wơh năm chă bơtho gah Kră Yang păng Tơdrong ‘Nao ‘Lơ̆ng wă dŏng pơklaih. Đơ̆ng rŏng kơ kơtơ̆ng Tơdrong ‘Nao ‘Lơ̆ng, đei minh ‘nu gô lui kơ Kră Yang Yêsu păng krao khan sơng iŏk tơdrong dŏng pơklaih.
Lăm trong 15b, ‘bok Pôl yua iŏk lăm Êsai 52:7 chih roi tơpang jơ̆ng ‘lơ̆ng dêh lu bơngai tŏk tơkông Siôn năm chă bơtho wă dŏng pơklaih lu bơngai mă đe pơjuă pơđep. Kư̆m thoi noh, lăm klong măt Kră Yang lăng, tơpang jơ̆ng lu bơngai chă năm bơtho Tơdrong ‘Nao ‘Lơ̆ng tơpă ‘lơ̆ng ưh kơ băt dang yơ! Tơpang jơ̆ng lu bơngai năm roi tơbăt pơm liơ wă kơ gơh pơhiôk sơlam ‘Bok Kei-Dei păng kon bơngai, chông hơnhăk lu bơngai yoch mă oei pŭ iŏk tơdrong lôch na gơh jô̆ khan huay pă jô̆ yoch bơih ‘noh ‘lơ̆ng dêh ưh kơ băt dang yơ. ‘Bok Kei-Dei ưh kơ wă minh ‘nu bơngai bu lôch hiong. Kră Yang Yêsu đei pơm keh bơih tơdrong jang dŏng pơklaih kon bơngai tơ kơpal ‘long pơglang păng ăn nơ̆r tơtă kơ lu bơngai pơhrăm păng Sư năm chă bơtho kơ rim ‘nu bơngai jơ̆p kơ teh đak (Mathiơ 28:19-20). Bơngai năm chă bơtho Tơdrong ‘Nao ‘Lơ̆ng athei năm lĕch hlôi đơ̆ng tơring bơ̆n kơdih, chu iŏk gleh glăn, pơmat tat wă rei Tơdrong ‘Nao ‘Lơ̆ng, Kră Yang pơkă khan gô apah tơmam gĭt găl dêh ăn kơ lu sư. “Lu bơngai hơgei gô thoi măt pơchră rang pơchrang hơdah đơ̆ng plĕnh păng dôm lu bơngai mă đei chông anhăk brŏk gah tơdrong tơpăt gô hơdah thoi sơnglŏng ling lang măng năr hlŏng hloi.” (Đaniel 12:3). Lei ră, ‘bok Pôl tơbăt ưh kơ sĭ đĭ-đăng bơngai Juđê kơtơ̆ng Tơdrong ‘Nao ‘Lơ̆ng khan lui đĭ hloi ôh thoi đei chih lăm Êsai 53:1.
‘Bok Pôl tơ’blŏk lăm trong 17, đe lui noh đơ̆ng sư kơtơ̆ng, păng lu sư kơtơ̆ng noh đơ̆ng bơngai chă năm bơtho nơ̆r Kră Yang. Rim ‘nu lu bơ̆n athei đĭ jơhngơ̆m năm chă bơtho Tơdrong ‘Nao ‘Lơ̆ng mă khan đe mơ̆ng dah ưh, adrin chă bơtho, wă kơ đei bơngai lui kơ Kră Yang păng wă kơ gơh klaih.
Bu ‘noh bơngai mă bơ̆n oei tơchĕng wă chông anhăk wih brŏk tơ Kră Yang? Lu bơ̆n athei pơm kiơ kơ lu sư tơ anăp?
Ơ Kră Yang, bơnê kơ Ih ăn pŭn hiôk kơ inh gơh năm pơm kơdranh. Apinh Ih ăn kơ inh đei jơhngơ̆m ‘mêm kơ lu bơngai wă hiong răm păng thim kơ inh đei jơhngơ̆m adrin wă kơ gơh yua jơ năr năm pơm kơdranh ăn kơ Ih. Yua anăn Kră Yang Yêsu Krist, Amen.
Đŏk Sơ̆p Hla bơar ‘Bok Kei-Dei lăm pêng sơnăm: I Samuel 12
Kênh Youtube BHKTHN:
