Loos 10:4-12
Nqe cim:
“Yog koj lub qhov ncauj lees hais tias Yexus Khetos yog tus Tswv thiab koj lub siab ntseeg hais tias Vajtswv twb tsa Yexus Khetos sawv hauv qhov tuag rov qab los lawm, koj yuav dim.” (Loos 10:9)
Lus nug rau sawvdaws xav:
– Timthawj Paulus muab qhov uas suav hais tias ncaj ncees ntawm txoj kevcai thiab ncaj ncees ntawm txojkev ntseeg Yexus sib piv zoo li cas?
– Peb kawm tau qhov tseeb twg hauv zaj kawm hnub no?
Hauv nqe 5, Timthawj Paulus hais raws li Levis Kevcai 18:5 “Nej yuav tsum xyaum thiab ua raws li tej kevcai thiab tej lus samhwm uas kuv muab cob rau nej lawm; yog leejtwg ua raws li no yuav cawm tau nws txojsia: Kuv yog tus Tswv”. Paulus lees paub Vajtswv Txojlus muaj hwjchim. Rau qhov ua ntej ntawd Timthawj Paulus twb txhais qhia, “Yexus Khetos twb los ua rau txoj kevcai ntawd tiav lawm” (nqe 4), yog li ntawd thaum muab Vajtswv Txojlus hauv II Kevcai 30:12-14 los, Paulus hloov lo lus “kevcai” los ua lo lus “Yexus Khetos” (nqe 6-8). Nov yog qhov uas suav tau hais tias ncaj ncees ntawm txojkev ntseeg uas Paulus thiab nws cov phoojywg twb qhia rau sawvdaws.
Hauv qhov uas suav hais tias ncaj ncees vim kev ntseeg Yexus Khetos, tibneeg tsis tas siv zog ua tej haujlwm dhau lub peevxwm xws li nce mus saum ntuj coj Yexus Khetos los hauv ntiajteb no lossis mus rau hauv tub tuag teb coj Yexus Khetos sawv hauv qhov tuag los (nqe 6-8), Yexus Khetos Nws los saum ntuj los nrog peb nyob thiab sawv hauv qhov tuag rov los lawm. Vim txojkev hlub thiab koob hmoov hlub, Vajtswv thiaj qhib muaj txojkev cawm dim uas txhua tus tibneeg yoojyim tau txais. Kev ntseeg, Vajtswv Txojlus, txojkev cawmdim nyob ze peb heev, nyob hauv peb lub qhov ncauj thiab hauv peb lub siab. Qhov uas yuav tau txais kev cawm dim tsuas yog siv kev ntseeg, kev cia siab hauv lub siab thiab lub qhov ncauj lees yuav xwb. “Yog koj lub qhov ncauj lees hais tias Yexus Khetos yog tus Tswv thiab koj lub siab ntseeg hais tias Vajtswv twb tsa Yexus Khetos sawv hauv qhov tuag rov qab los lawm, koj yuav dim. Rau qhov tus uas ntseeg hauv nws lub siab, Vajtswv suav hais tias nws yog tus uas ncaj ncees, thiab tus uas lees ntawm nws lub qhovncauj, Vajtswv suav hais tias nws yog tus uas dim txim .” (nqe 9-10).
Tom qab uas tibneeg poob rau txojkev txhaum, Vajtswv tsuas suav hais tias tibneeg ncaj ncees yog thaum los ntseeg Yexus Khetos lawm xwb. Vim yog kev ntseeg, Anpees muab tej khoom zoo dua Ka-ees fij rau Vajtswv, thiab Anpees tau suav hais tias ncaj ncees (Chivkeeb 4:4; Henplais 11:4). Tus Tswv muab kevcai ua yam uas ntsuas cov neeg Yixalayees txojkev nrog tus Tswv sib raug zoo, thiab ib leeg txhim kev sib raug zoo nrog ib leeg, thiab qhov tseemceeb yog cia kom lawv zeem paub hais tias lawv ua tsis tau zoo, rau qhov tsis muaj leejtwg coj tau zoo txaus nkaus raws li txoj kevcai kom tau Vajtswv tus uas dawbhuv suav hais tias ncaj ncees. Tus Tswv pub txojkev cawm dhau los ntawm kev tua tsiaj theej txhoj. Vim kev ntseeg, txhua lub xyoo cov Yixalayees thiaj niaj zaug ua rooj kevcai tua tsiaj theej txhoj. Anpees muab thawj tug menyuam yaj, tus tsiaj tua hlawv fij uas cov Yixalayees ua yog tus duab hais txog Yexus Khetos, Nws cov ntshav ntws los cawm tau ntau leej.
Ua Vajtswv tsaug, Vajtswv Txojlus qhia hais tias thaum peb ntseeg Tswv Yexus thiab hais tawm peb txojkev ntseeg, peb yuav tsis poob ntsejmuag hnub uas lub ntiajteb no kawg. Peb tsis raug txiav txim! Cia li los cuag tus Tswv ntawm txojkev ntseeg.
Thov Vajtswv,
Tus Tswv! Nyuam yaus ua Koj tsaug vim nyuam yaus tau suav hais tias ncaj ncees dhau los ntawm Koj txoj koob hmoov hlub uas yog kev cawm dim los ntawm Yexus Khetos. Thov Koj pab kom nyuam yaus paub ua Koj tsaug, niaj hnub ntseeg Koj thiab mloog Koj lus. Nyuam yaus tuav Tswv Yexus lub npe thov, Amees.
Peb los cuag tus Tswv ntawm txojkev ntseeg lossis yog ua haujlwm zoo?
Nyeem Vajluskub hauv peb lub xyoo: I Xamuyees 11
Kênh Youtube BHKTHN:
