Klei Aê Diê Blŭ: Rôm 9:30-33
Êlan kliăng: “…Phung tue amâo tuôm tui duah ôh klei kpă ênô mâo leh klei kpă ênô, anăn jing klei kpă ênô mơ̆ng klei đăo.” (Rôm 9:30)
Klei êmuh ksiêm mĭn: Ya klei Y-Pôl čiăng mñă tơdah lač kơ klei mdê plah wah phung ƀuôn sang Aê Diê ruah Israel leh anăn phung tue? Ya klei yuôm bhăn bruă Aê Diê dưm sa boh tâo bi gun lŏ wĭt ti Siôn leh anăn ngă bi têč hnêč? Si ngă čiăng drei dưi yap jing kpă ênô?
Khua ƀĭng kna Y-Pôl lač kơ sa klei msĕ si bi mklăk, anăn jing phung ƀuôn sang amâo tui duah ôh klei kpă ênô snăn diñu mâo leh klei kpă ênô, anăn jing klei kpă ênô mơ̆ng klei đăo (êlan 30). Hlăk êjai anăn, phung ƀuôn sang Israel mâo Aê Diê brei klei bhiăn čiăng dưi yap jing kpă ênô. Wăt tơdah kjăp hlăm klei hlue ngă klei bhiăn dưn, diñu ăt srăng kăn mâo mơh hnơ̆ng čuăn čiăng dưi yap kpă ênô (êlan 31). Mta phŭn kyua diñu amâo hlue ngă ôh klei Aê Diê mtă čiăng dưi yap kpă ênô kyua klei đăo, jing klei Aê Diê mâo leh hdră kơ anak mnuih mơ̆ng ênuk mphŭn dơ̆ng “Hŏng klei đăo Y-Aƀel myơr kơ Aê Diê mnơ̆ng ngă yang jăk hĭn kơ Y-Kain. Hŏng klei đăo anăn Aê Diê tŭ ñu jing kpă, hưn bi êdah klei anăn êjai tŭ mnơ̆ng ñu myơr. Ñu djiê leh, ƀiădah hŏng klei ñu đăo ñu ăt dôk blŭ” (Hêbrơ 11:4). “Y-Abram đăo kơ Khua Yang, leh anăn Ñu yap klei anăn jing klei kpă ênô kơ Y-Abram” (Klei Mphŭn Dơ̆ng 15:6). Grăp thŭn, khua ngă yang prŏng mdjiê mnơ̆ng myơr čuh, mă êrah mjing mnơ̆ng bi tui klei soh kơ phung ƀuôn sang (Bruă Lêwi 16). Mnơ̆ng myơr čuh doh arăng mdjiê jing rup Khua Yang Yêsu, Pô tuh êrah čiăng bi doh klei soh anak mnuih.
Hlăm êlan 33, Khua ƀĭng kna Y-Pôl mă hlăm Y-Êsai 8:14 leh anăn Y-Êsai 28:16 čiăng bi mklă hĭn kơ boh tâo Aê Diê dưm ti Siôn jing Khua Yang Yêsu, Aê Diê Pô Tal Dua, jing boh tâo kiêng, jing tur kjăp kơ hlei pô đăo. Ênguôt snăk! Phung ƀuôn sang Israel hngah leh kơ Aê Diê. Diñu amâo dưm Khua Yang Yêsu djŏ anôk jing boh tâo kiêng, jing tur kơ klei đăo ôh ƀiădah hwiê ti êngao. Boh tâo prŏng anei ngă bi têč hnêč jơ̆ng diñu kyua ƀuh Khua Yang Yêsu amâo msĕ ôh hŏng Yang Mêsi diñu dôk čang hmăng, kyua klei bi mtlaih kyua klei đăo msĕ si amâo djŏ guôp ôh hŏng bruă djă pioh klei bhiăn, kyua ênoh yuôm Aê Diê mtô bi hriăm mdê hŏng klei mĭn lăn ala… Anăn jing mta phŭn phung ƀuôn sang Israel amâo tŭ jing ôh hlăm bruă tui duah klei kpă ênô. Diñu gĭr duah ƀiădah amâo tuôm ôh!
Khua ƀĭng kna Y-Pôl hưn sa klei sĭt nik: Klei kpă ênô amâo dưi mâo ôh kyua djă pioh klei bhiăn ƀiădah knŏng kyua klei pap Aê Diê brei, leh anăn kyua klei đăo drei mă. Klei đăo yuôm bhăn snăk hlăm bruă tŭ mă klei pap Aê Diê. Hlei pô đăo kơ Khua Yang Yêsu snăn srăng mâo Aê Diê yap jing kpă ênô leh anăn mâo klei hdĭp hlŏng lar (Y-Yôhan 3:16). Akâo kơ Aê Diê brei kơ drei hŏng klei đăo tŭ mă klei pap Khua Yang Yêsu Pô Bi Mtlaih leh anăn jih ai tiê hiu hưn klei Aê Diê pap kơ lu mnuih.
Drei dôk yua bruă ngă čiăng dưi yap jing kpă ênô mơ̆?
Wah lač: Ơ Khua Yang, bi mni kơ Ih kyua kâo dưi yap kpă ênô kyua klei pap Khua Yang leh anăn kyua klei đăo kâo dưi tŭ mă! Kâo đăo sĭt kâo amâo srăng hêñ ôh tơdah bi tuôm hŏng Ih. Akâo kơ Ih đru kâo lŏ dơ̆ng êbat kyua klei đăo leh anăn atăt lu mnuih hriê mă klei pap Aê Diê. Kâo wah lač hlăm anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Rôm 8
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
