Klei Aê Diê Blŭ: Y-Mathiơ 18:21-22
Êlan kliăng: “Leh anăn Y-Pêtrôs nao lač kơ Ñu, “Ơ Khua Yang, dŭm blư̆ kâo srăng pap brei kơ ayŏng adei kâo tơdah ñu ngă soh hŏng kâo? Djŏ mơ̆ tơl kjuh blư̆?” Yêsu lač kơ gơ̆, “Kâo amâo lač kơ ih kjuh blư̆ ôh, ƀiădah kjuh pluh blư̆ kjuh” (Y-Mathiơ 18:21-22)
Klei êmuh ksiêm mĭn: Ya ngă Khua ƀĭng kna Y-Pêtrôs êmuh Khua Yang kơ klei dŭm blư̆ srăng pap brei? Si Khua Yang Yêsu lŏ wĭt lač kơ Khua ƀĭng kna Y-Pêtrôs? Mơ̆ng kbiă hriê klei ktang čiăng kơ drei mâo klei thâo pap brei nanao?
Leh hmư̆ Khua Yang Yêsu mtô kơ klei mkra mjuăt hlăm Phung Sang Aê Diê (Y-Mathiơ 18:15-20), Khua ƀĭng kna Y-Pêtrôs thâo kơ klei jing anak mnuih jing êdu awăt leh anăn khăng ngă soh. Ñu êmuh Khua Yang tơdah mâo sa čô mnuih ngă soh hŏng ñu leh anăn gơ̆ ngă nanao klei soh anăn lu blư̆ snăn dŭm blư̆ ñu srăng pap brei? Leh anăn ñu bi êdah klă kơ blư̆ srăng pap brei jing “kjuh blư̆” čiăng êmuh Khua Yang Yêsu. Tơdah lač srăng pap brei kjuh blư̆, Khua ƀĭng kna Y-Pêtrôs bi êdah leh klei mĭn jăk ñu kyuadah tui si klei rabi phung Yuđa mtô, tơdah lŏ ngă soh truh kơ blư̆ tal pă amâo lŏ dưi pap brei ôh. Snăn yơh, mkă hŏng klei bhiăn phung Yuđa, klei srăng pap brei tui si Khua ƀĭng kna Y-Pêtrôs năng kơ phung rabi bi mni, ƀiădah Khua Yang Yêsu lŏ wĭt lač, “Kâo amâo lač kơ ih kjuh blư̆ ôh, ƀiădah kjuh pluh blư̆ kjuh” (êlan 22). Snăn djŏ mơ̆ srăng pap brei knŏng pă êtuh dua păn pluh blư̆? Hơăi, amâo djŏ snăn ôh, kyuadah boh klă gơ̆ amâo mâo pô ngă soh truh dŭm anăn ôh. Khua Yang Yêsu čiăng bi hriăm Y-Pêtrôs đăm bi kdriêl ôh kơ klei ñu pap brei, Khua Yang čiăng ñu pap brei leh anăn pap brei nanao yơh, čiăng lač brei ñu pap brei kơ phung akâo klei pap mñai kơ ñu hŏng klei sĭt wăt tơdah êlâo tinăn digơ̆ tuôm ngă soh leh hŏng ñu lu blư̆ dưn.
Boh nik gơ̆, pap brei kơ phung ayŏng adei pô kjuh blư̆ dưi lač klei ngă anăn jing sa bruă ngă yuôm bhăn snăk, ƀiădah tui si klei Khua Yang mtô, Khua ƀĭng kna Y-Pêtrôs ăt mâo sa klei soh čhuai mơh tơdah bi kdriêl kơ klei ñu pap brei. Hŏng Khua Yang, pap brei kluôm dhuôm amâo mâo knhal ôh.
Hlăm Phung Sang Aê Diê grăp čô phung đăo mâo klei jing mdê mdê, hdĭp leh anăn bi kƀĭn mbĭt hlăm sa boh ƀuôn snăn amâo dưi weh đuĕ ôh kơ klei bi keh koh, klei amâo bi djŏ. Wăt tơdah klei pap brei amâo djŏ jing sa klei ênưih ôh hŏng anak mnuih kyuadah knuih kđeh drei dleh snăk pap brei kơ pô mkăn, ƀiădah Khua Yang Yêsu čiăng drei khăp leh anăn pap brei nanao kơ phung ayŏng adei ngă klei bi êka kơ drei. Klei ktang kơ klei pap brei amâo kbiă hriê mơ̆ng ai ktang drei pô ôh ƀiădah mơ̆ng knuih mrâo Khua Yang brei. Phung amâo đăo dê ya klei arăng ngă kơ pô – pô lŏ wĭt ngă kơ arăng msĕ snăn mơh, ƀiădah brei Phung Sang Aê Diê thâo bi êdah klei pap brei êbeh dlai, leh anăn bi tŭ tơdah mâo phung ayŏng adei ngă soh leh ƀiădah lŏ kmhal sĭt kơ klei soh. Hŏng klei anăn drei srăng bi đru hdơ̆ng drei hlăm klei mă bruă leh anăn bi guh kơang kơ Anăn Khua Yang ti krah jih jang mnuih.
Kơ hlei pô Khua Yang čiăng drei pap brei mtam hruê anei?
Wah lač: Ơ Khua Yang Yêsu jing Khua Yang klei khăp, đru kâo dưi hŏng klei čuôt klih, klei đuôm ai čiăng kâo dưi pap brei nanao kơ phung ayŏng adei kâo, čiăng kơ Anăn Ih mâo klei mpŭ mni kyua klei kâo thâo pap brei. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Bi Hriêng 15
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
