Mathais 18:21-22
Nqe cim:
“Petus los nug Yexus hais tias: Tus Tswv, yog kuv ib tug kwvtij pheej ua txhaum rau kuv, kuv yuav zam txim rau nws pestsawg zaus? Zam xya zaus los? Yexus teb hais tias: Tsis yog xya zaus xwb, tiamsis yog xya zaus xya caum.” (Mathais 18:21-22)
Lug nug rau sawvdaws xav:
– Vim licas Timthawj Petus nug Tswv Yexus txog qhov uas zam txim pestsawg zaus?
– Tswv Yexus teb rau Timthawj Petus licas?
– Lub zog pab peb zam txim npluamias tawm qhov twg los?
Tomqab uas hnov Tswv Yexus qhia txog tej kevcai tswj hauv Pawg Ntseeg (Mathais 18:15-20), Timthawj Petus zeem paub hais tias tibneeg yog cov uas qaug zog thiab pheej ua yuamkev. Nws thiaj nug Tswv Yexus txog qhov uas thaum muaj neeg ua txhaum rau nws thiab pheej ua mus ua los qhov kev txhaum ntawd, ces nws yuav zam txim rau lawv pestsawg zaug? Tomqab ntawd nws muab tus lej txaus heev uas yog “xya zaus” los nug Tswv Yexus. Thaum hais tias yuav tsum zam txim xya zaus, Timthawj Petus tau qhia tshwm nws txojkev txaus hwm vim raws li cov xibhwb Yudais qhia, ces yog rov ua txhaum zaug thib plaub xwb ces twb tsis zam txim lawm. Yog li ntawd, raws li cov Yudais tej kevcai, Timthawj Petus kev zam txim tsimnyog tau cov xibhwb qhuas, tiamsis Tswv Yexus teb hais tias, “Tsis yog xya zaus xwb, tiamsis yog xya zaus xya caum.” (nqe 22). Ua li puas yog tsuas zam txim txog plaub puas cuaj caum zaug xwb? Tsis yog li ntawd, vim tseeb tiag tsis muaj leejtwg yuav ua txhaum ntau zaug li ntawd. Tswv Yexus xav qhia hais tias Timthawj Petus tsis txhob muab cej ciam rau nws txojkev zam txim, Nws xav kom Timthawj Petus yuav tsum zam txim thiab zam txim npluamias, txhais hais tias cia li zam txim rau cov uas tas siab lees kev txhaum txawm yog ua ntej ntawd lawv twb ua txhaum ntau zaug rau nws lawm.
Tseeb tiag, zam txim rau lwm tus xya zaug kuj yog ib tes haujlwm zoo lawm, tiamsis raws li Tswv Yexus tej lus qhia, Timthawj Petus tseem muaj ib qhov yuamkev uas yog muab cej ciam rau tus kheej thaum zam txim. Raws li Tswv Yexus, zam txim yeej tsis muaj nrim li.
Tus Tswv Pawg Ntseeg muaj cov neeg sib txawv ntau yam los nyob ua ke ua ib pab pawg, yog li qaij tsis dhau tej kev sib dawm, tsis sib haum, sib tawmtsam. Kev zam txim tsis yog yam xwbtim muaj nyob hauv tibneeg vim peb tus neeg sab nqaij tawv ua rau peb nyuaj zam txim rau lwm tus, tiamsis Tswv Yexus xav kom peb yuav tsum sib hlub thiab niaj hnub zam txim rau peb tej kwvtij uas ua tsis zoo rau peb. Lub zog pab peb zam txim tsis yog tuaj ntawm peb tus kheej tuaj tiamsis yog los ntawm tus neeg tshiab uas tus Tswv pub. Neeg ntiajteb ua phem pauj phem, tiamsis Tus Tswv Pawg Ntseeg yuav tsum qhia tshwm kev txaus siab hlo zam txim npluamias thiab sib txais yuav thaum muaj cov kwvtij ua txhaum uas tas siab lees txim. Yog ua li ntawd, peb yuav sib pab ua tau tus Tswv tes haujlwm thiab ua rau Nws tau koobmeej.
Thov Vajtswv,
Tswv Yexus uas yog tus Tswv ntawm txojkev hlub, thov pab nyuam yaus kovyeej tej kev qia dub, sib ntxub kom nyuam yaus zam txim tau rau lwm tus kom Koj tau koobmeej dhau ntawm nyuam yaus lubneej. Nyuam yaus tuav Yexus Khetos lub npe thov, Amees.
Ib tsoom cov mloog uas hmov thiab tshua,
Leejtwg yog tus uas tus Tswv xav kom peb zam txim kiag hnub no?
Nyeem Vajluskub hauv peb lub xyoos: Pajlug 15
Kênh Youtube BHKTHN:
