Teev Npe 11:7-23
Nqe cim:
“Vim Yexus Khetos txhawb kuv lub zog, kuv thiaj tiv taus txhua tsav yam huv tibsi” (Filipis 4:13)
Lug nug rau sawvdaws xav:
– Mauxes ua licas thaum cov pejxeem muaj lub siab tawv?
– Nyob ntawm no koj zeem paub dabtsi txog tes haujlwm ntawm tus thawjcoj sab ntsujplig?
– Peb ua tau dabtsi los pab lawv tes haujlwm thiab lawv lubneej?
Kev txhaum ibtxwm kis tau deb dav. Cov pejxeem lub siab tawv thiab tes haujlwm thawjcoj hnyav heev ua rau Mauxes “nyuaj siab kawg li” thiab nws thov tus Tswv tua nws povtseg. Mauxes nug tus Tswv tias: “Vim li cas koj thiaj ua nruj ua tsiv rau kuv?” Lossis, nws tabtom yws tus Tswv hais tias “Kuv twb tso txhua yam tseg, ua raws li Koj lub suab hu tiamsis Koj tsis foom koob hmoov rau kuv, tsis pub kuv ua tes haujlwm yooj yim,…?” Mauxes tau xav yuamkev txog kev ua haujlwm lawm. Nws ntshaw tes haujlwm yoojyim thiab zoo ua (Mathais 16:24). Tus thawjcoj sab ntsujplig ntshaw yam dabtsi thaum ua tus Tswv tes haujlwm: Ntshaw tus Tswv pub koob hmoov lossis ntshaw tau pab yaj hwm? Thiab tus thawjcoj puas qaug zog thaum tsis txais tau tej yam ntawd?
Txuas ntxiv, tes haujlwm hnyav ua rau Mauxes tsis ntsia cov pejxeem los ntawm lub zeem muag hlub tshua lawm, nws tsuas saib pom nws tes haujlwm xwb (nqe 12). Nws zeem paub yuamkev txog kev ua haujlwm thiab tsis zeem paub hais tias tes haujlwm ua thawjcoj sab ntsujplig taij kom yuav tsum muaj kev tuag theej (Yauhas 10:11). Puas muaj zaug twg uas tus thawjcoj xam pom tias nws tus kheej ntxim khuvleej heev? Puas muaj zaug twg uas lwm tus tej lus hais thiab tes haujlwm ua rau tus thawjcoj mob siab thiab ua rau nws hnov qab tias lwm tus kuj yog cov uas cheemtsum tau hlub tau zamtxim?
Thiab Mauxes kuj yuamkev thaum saib mus rau tus kheej ntau dua thiab hnov qab tus Tswv lub hwjchim (nqe 13-14). Nrog cov pejxeem mus khaws manas txhua tagkis tiamsis vim licas sijhawm no nws ho hnov qab Vajtswv lub hwjchim? Nws hnov qab tias tus Tswv yog tus pub hwjchim thiab dag zog rau nws tes haujlwm (Ntawv Nkauj 121:1-2).
Saib mus rau ib seem, Mauxes tau yuamkev vim nws ua txhaum yws ib yam li cov pejxeem. Tiamsis, saib mus rau lwm seem, nws tsimnyog tau nkag siab totaub vim nws tau coj txojkev mob siab tuaj cuag tus Tswv. Dhau qhov no, peb pom hais tias yam zoo tshajplaws uas tus ntseeg muaj peevxwm ua los txhawb cov thawjcoj lub zog, ces yog qhov uas lawv yuav tsum loj hlob sab ntsujplig (Filemoos 4-7). Tsis muaj yam dabtsi ua rau cov ua Vajtswv haujlwm muaj kev zoo siab thiab tau txhawb zog npaum qhov uas pom cov ntseeg nyiam Vajtswv Txojlus, mob siab pehawm thiab ua tus Tswv haujlwm, sib hlub thiab txo hwjchim. Kuj yuav tsum nco hais tias xibhwb thiab cov thawjcoj kuj yog tibneeg uas muaj ntau yam kev qaug zog, ntau lub nrad hnyav cheemtsum tau lwm tus nkag siab totaub, thiab tseemceeb yog cheemtsum kev thov Vajtswv pab (I Thexalaunikes 5:25).
Vajtswv tau daws teebmeem los ntawm kev nrhiav lwm tus los pab Mauxes (nqe 16-17). Thaum ub kuj zoo li nim no, tus thawjcoj sab ntsujplig cheemtsum muaj neeg nrog sawv ua ke, koom ua tus Tswv tes haujlwm thiab tu tus Tswv pab yaj.
Thov Vajtswv,
Tus Tswv, thov pub nyuam yaus ua Koj tes haujlwm txhua lub tsamthawj. Thov pub nyuam yaus paub hlub tshua, nkag siab, thiab thov Vajtswv pab rau cov thawjcoj thiab pab lawv ua haujlwm. Nyuam yaus tuav Yexus Khetos lub npe thov, Amees.
Ib tsoom cov mloog uas hmov thiab tshua,
Peb puas nkag siab thiab thov Vajtswv pab rau cov thawjcoj lawm tau?
Nyeem Vajluskub hauv peb lub xyoos: Cov Thawjtswj 20
Kênh Youtube BHKTHN:
