0Tes Haujlwm 15:35-41
Nqe cim
“nkawd sib cav heev, ces nkawd nyias txawm ncaim mus nyias lawm,…” (Tes Haujlwm 15:39a)
Lus nug rau sawvdaws xav
– Npananpas thiab Paulus hais tsis sib haum yam dab tsi?
– Lawv daws li cas?
– Peb kawm tau kab ke daws teebmeem li cas thaum dhau zaj kawm no?
Lukas sau zaj xwm txog qhov kev tsis sib haum ntawm Paulus thiab Npananpas, homphiaj tsis yog sib cav saib leejtwg yog thiab leejtwg tsis yog, tiamssis qhia kom peb paub hais tias hauv Vajtswv cov menyuam txoj kev tsis sib haum yeej ib txwm muaj. Qhov tseemceeb yog peb yuavtsum vamkhom Vajtswv pab kom hla dhau tej teebmeem ntawd. Peb twb tau kawm txog pab tub xa Moo Zoo txoj kev daws teebmeem lawm, hnub no peb yuav rov los kawm kab ke daws teebmeem dhau zaj xwm hnub no.
Tom qab lub Rooj Sab Laj hauv Yeluxalees, cov Timthawj thiab cov txwjlaus tau xa Paulus thiab Npananpas mus rau hauv lub nroog Ati-aukias thiab lawv tau koom nrog coob leej ntau tus tshaj tawm Txoj Moo Zoo thiab qhia Vajtswv Txojlus. Tsis ntev tom qab ntawd, Paulus tham nrog Npananpas txog qhov uas yuav xav rov qab mus xyuas cov kwvtij uas tau hnov Vajtswv Txojlus ua ntej lawd. Tiamsis nkawm tham tsis haum txog kev yuav coj Malakaus nrog lawv mus, yog li ntawd txawm lawv tseem sib hlub los yuavtsum tau sib cais.
Sawv hauv txoj kev hais tsis sib haum loj heev, nkawd tau xaiv haukev “sib cais” tiamsis tsis “sib faib”. Nyias mus raws li qhov uas Vajtswv tshoov nyias lub siab tiamsis ob leeg puavleej muaj tib homphiaj xwb uas yog tshaj tawm Txoj Moo Zoo rau lwm haivneeg (Kalatias 2:9). Hauv Paulus, Xilias yog nws qhov kev xaiv zoo tshaj plaws nyob rau lub sijhawm ntawd, thiab hauv Npananpas, vim nws xav txhawb thiab cob qhia Malakaus kom loj hlob rau hauv kev ua haujlwm, Npananpas thiaj coj Malakaus nrog nws mus, nkawd caij nkoj hla hiavtxwv mus rau tim lub koog povtxwv Xaipas (nqe 39). Txawm muaj kev tsis sib thooj yim, tiamsis Paulus thiab Npananpas yeej tuav ruaj tes haujlwm uas Vajtswv cob. Thaum kawg ua rau muaj ob pab tub xa moo zoo tawm mus tsis yog ib pab lawm xwb. Ntawm Vajntsujplig kev coj, kev mus ncig xyuas txhua cheebtsam tau dhau los ua kev tshaj tawm txoj Moo Zoo mus thoob plaws txhua qhov chaw.
Peb pom Timthawj Paulus nrog rau Npananpas, thiab Malakaus, lawv tau “sib cais” tiam sis tsis “sib faib”, tsis pom zoo tiamsis hais kom sib haum, txawm nyias ua nyias sib txawv, tiamsis puavleej ua haujlwm rau Vajtswv. Timkhawv qhia pom hais tias Paulus yeej tseem sib raug zoo heev nrog Npananpas thiab Malakaus (2 Timautes 4:11; Khaulauxais 4:10).
Zam xwm no ua zaj kawm rau peb hais tias thaum muaj kev tsis sib haum, txhob sib cav thiab xaiv ua raws li Vajtswv qhia rau peb, tsuav yog ob leeg puavleej tseem tuav rawv Vajtswv txoj kev hu thiab ua haujlwm rau Nws kawg siab kawg ntsws. Tej zaum peb yuav raug cais rau kev ua Vajtswv haujlwm, tiamsis peb tsis sib faib vim peb puavleej yog ib lub cev nyob rau hauv Tswv Yexus, yog li ntawd peb yuavtsum thov Vajtswv thiab ib leeg txhawb ib leeg. Tus yuamsij rau peb hla dhau kev sim siab ntawm kev daws teebmeem yog hlub Vajtswv kawg siab kawg ntsws, ua siab ntev, sib zam txim thiab sib txhawb kom Vajtswv tes haujlwm loj hlob.
Thov Vajtswv
Tus Tswv, nyuam yaus ua tsaug rau Koj qhia nyuam yaus txog kev daws teeb meem. Thov Koj pab nyuam yaus ua taus siab ntev ceev tau kev hlub ua Vajtswv tes haujlwm. Txawm yuav ntsib kev tsis sib haum, muaj teebmeem los kom nyuamyaus paub sib zam txim li Koj twb zam rau nyuamyaus lawm. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Thaum muaj teebmeem tuaj, peb kheev sib cais lossis sib faib?
Nyeem Vajluskub hauv peb lub xyoos: Yausuas 14
Kênh Youtube BHKTHN:
