Klei Aê Diê Blŭ: Bruă Phung Khua Ƀĭng Kna 7:54-60
Êlan kliăng: “Snăn phung khua ƀĭng kna kbiă mơ̆ng anăp phung khua phat kđi, hơ̆k mơak kyuadah Aê Diê yap digơ̆ năng tŭ klei hêñ kyua anăn Yêsu” (Bruă Phung Khua Ƀĭng Kna 5:41)
Klei êmuh ksiêm mĭn: Ya klei phung ƀuôn sang leh anăn phung khua gĭt gai klei đăo ngă kơ Y‑Êtiên? Si knhuah ñu wĭt ngă? Si knhuah drei wĭt ngă hlăk tŭ klei arăng ngă jhat kyua Anăn Khua Yang?
Bruă Phung Khua Ƀĭng Kna 7:1-53 čih wĭt klei blŭ mơ̆ng Y‑Êtiên, klah čŭn klă mngač hƀuê ênuk Israel dơ̆ng mơ̆ng hlăk Aê Diê iêô aê đưm Y‑Abraham tơl truh kơ hruê mmông anăn. Gơ̆ ktrâo kơ phung khua gĭt gai klei đăo ƀuh hlăm ênuk êgao leh, phung Israel bi kdơ̆ng nanao leh anăn gao klei bhiăn Aê Diê. Leh anăn hruê anei, diñu ăt lŏ ngă msĕ snăn mơh, tơl wăt hlŏng bi mdjiê hĕ Pô Kpă Ênô hĭn êjai. Gơ̆ pia kơ phung diñu jing “phung ƀuôn sang khăng kŏ, ai tiê leh anăn knga amâo mâo khăt klĭt ôh”. Kyuadah pŏk blang bi êdah klei soh diñu, snăn diñu bŏ hŏng klei ngêñ kriêt êgei kơ gơ̆. Măng ai si klei diñu ur kraih ktang, bi kdơ̆ng dưn, Y‑Êtiên amâo mâo klei huĭ ôh, ai tiê klei mĭn gơ̆ kluôm dhuôm angưi dlăng kơ adiê. Khua Yang pŏk mblang ală mngăt gơ̆ brei gơ̆ ƀuh klei guh kơang Aê Diê leh anăn Khua Yang Yêsu dôk dơ̆ng tĭng hnuă kơ Aê Diê. Gơ̆ jhŏng hưn klă klei anei. Mmông anăn mtam, jih jang diñu ur kraih ktang, kăt ƀăng knga leh anăn mđrăm mbĭt êran nao mă gơ̆ đoh ti êngao ƀuôn bhĭr gơ̆ hŏng boh tâo, kyua lač dah gơ̆ blŭ klei soh hŏng Aê Diê (Bruă Phung Khua Ƀĭng Kna 6:10-12, 7:57-58). Anak mnuih tơdah khăng ai tiê srăng amâo čiăng hmư̆ klei sĭt nik ôh ƀiădah čiăng bi mdjiê hĕ mnuih hưn klei sĭt nik. Kyuanăn, tơdah phung đăo kơ Krist kah mbha Klei Mrâo Mrang Jăk, ênưih snăk tŭ klei phung lăn ala bi kdơ̆ng, ñĕ đuĕ, tơl wăt ngă jhat, kyuadah diñu srăng “kăt ƀăng knga amâo čiăng hmư̆ klei sĭt nik ôh” (II Y‑Timôthê 4:4).
Y‑Êtiên wăt tơdah tŭ klei arăng bhĭr boh tâo dưn ƀiădah klei gơ̆ đăo kơ Khua Yang amâo mâo klei mgei ôh. Gơ̆ wah lač kơ Khua Yang jum mngăt gơ̆ hŏng klei hdjul ênang, wăt tơdah asei mlei ruă knap dưn. Kdlưn hĭn kơ anăn, gơ̆ kăn mâo klei ăl čôñ phung bhĭr boh tâo kơ gơ̆ mơh, ƀiădah tui klei Khua Yang Yêsu bi hmô, akâo kơ Khua Yang đăm yap klei soh anei kơ diñu ôh. Leh lač klei anăn gơ̆ hlŏng “pĭt” êđăp ênang (êlan 60). Wăt tơdah asei mlei kđeh tŭ klei ruă knap, hêñ mlâo, ƀiădah mngăt gơ̆ dưi dưn klei jăk jĭn êđăp ênang hŏng Khua Yang.
Phung đăo ênuk tal êlâo tŭ lu klei arăng ngă jhat ktang tĭt, ƀiădah digơ̆ hơ̆k mơak tŭ klei knap mñai kyua Anăn Khua Yang leh anăn digơ̆ dưi yap jing phung năng ti anăp Khua Yang (Bruă Phung Khua Ƀĭng Kna 5:41). Hruê anei, drei amâo tŭ klei arăng bhĭr boh tâo msĕ si Y‑Êtiên ôh, ƀiădah ƀiă lu, tơdah tui hlue Khua Yang leh anăn hdĭp kơ Khua Yang, drei ăt tŭ klei phung lăn ala ñĕ đuĕ leh anăn bi kdơ̆ng kyuadah knhuah hdĭp drei mdê hŏng diñu. Čiăng dưi găn gao klei lông dlăng anei, brei drei dôk kjăp êđăp ênang hlăm klei bi mguôp hŏng Khua Yang, amâo ăl čôñ amâodah rŭ ênua kơ phung ngă jhat kơ drei ôh. Mĭn nanao hlăm ai tiê snei, dưi tŭ klei knap mñai mbĭt hŏng Yang Krist jing sa klei pap knŏng pioh kơ mnuih đăo sĭt kơ Khua Yang yơh dưi dưn. Akâo Khua Yang thiăm klei ktang kơ drei čiăng dưi hơ̆k mơak hlăm klei knap mñai kyua Anăn Khua Yang, đup gưt hdră Khua Yang mkra čiăng dưi găn gao klei lông dlăng tơdah tŭ klei phung lăn ala ñĕ đuĕ, bi kdơ̆ng, ngă jhat.
Si ngă drei ƀuh klei mơak leh anăn jăk mơak mơ̆ hlăk tŭ klei knap kyua Anăn Khua Yang?
Wah lač: Ơ Khua Yang, êbat tui hlue Khua Yang kâo khăng tŭ klei phung lăn ala ñĕ đuĕ, bi kdơ̆ng, ngă jhat. Akâo Khua Yang brei kâo hmiêt mkăp tŭ klei hêñ kyua Anăn Khua Yang leh anăn brei kâo ƀuh klei jăk jĭn leh anăn klei guh kơang mơ̆ng adiê tơdah čuăn dôk hdĭp kơ Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y‑Yôhan 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
