Tes Haujlwm 7:54-60
Nqe cim:
“Thaum cov timthawj tawm ntawm cov nomtswv mus, lawv zoo siab kawg li, rau qhov Vajtswv pom zoo cia cov uas qhia Yexus zaj raug kev txajmuag.” (Tes Haujlwm 5:41)
Lus nug rau sawvdaws xav:
– Xatefanaus raug cov pejxeem thiab cov thawjcoj ua li cas?
– Xatesfanaus tus cwjpwm zoo li cas?
– Peb muaj tus cwjpwm li cas thaum raug thuam vim tus Tswv lub npe?
Tes Haujlwm 7:1-53 hais txog zaj lus uas Xatefanaus qhia, sau zog keebkwm cov neeg Yixalayees txij thaum tus Tswv hu lawv yawgkoob Anplahas los txog lub sijhawm ntawd. Xatefanaus qhia rau cov thawjcoj sab kev ntseeg paub hais tias yav tas los, cov neeg Yixalayees twb niaj hnub tawmtsam thiab tsis mloog tus Tswv txoj kevcai. Thiab nimno kuj ib yam nkaus, tseem ua txog qib uas muab tus uas ncaj ncees tua povtseg. Xatefanaus muab lawv hu ua “cov neeg tawv ncauj, tsis mloog Vajtswv lus.” Thaum hais txog lawv tej kev txhaum, lawv npau taws thiab tom hniav qawv rau Xatefanaus. Txawm yog lawv yuav cem, tawmtsam, los Xatefanaus tsis ntshai li, nws lub siab thiab txojkev xav yeej ntsia ntsoov mus saum ntuj. Tus Tswv qhib nws lub qhov muag siab ntsia pom lub tshwjchim thiab Tswv Yexus tabtom sawv ntawm Vajtswv sabxis. Xatefanaus qhia txog yam no. Lub sijhawm ntawd, tagnrho cov neeg tuaj ntawd qw nrov nrov, pos qhovntsej, ntes Xatefanaus thiab coj mus sab ntug nroog nraud xuas zeb txawb kom tuag, rau qhov nws hais saib tsis taus Vajtswv (Tes Haujlwm 6:10-12, 7:57-58). Tibneeg thaum lub siab tawv yuav tsis kam mloog qhov tseeb thiab yuav muab tus neeg uas qhia qhov tseeb tua povtseg. Yog li, thaum cov ntseeg qhia Txojmoo Zoo, yoojyim raug neeg ntiajteb tawmtsam, ntxub, ntes coj mus tsimtxom, rau qhov lawv yuav “pos qhovntsej tsis mloog qhov tseeb” (II Timautes 4:4).
Txawm yog Xatefanaus raug muab pobzeb txawb los nws tsis tso txojkev ntseeg tus Tswv tseg li. Xatefanaus thov tus Tswv coj nws tus ntsujplig mus, txawm yog lub cev nqaij tawv raug mob li cas loj xij. Dua li ntawd, nws tsis chim rau cov neeg uas xuas pobzeb txawb nws, tiamsis nws ua raws li Tswv Yexus tus qauv, nws thov Vajtswv zam txim rau lawv. Thiab nws txawm “tu siav nrho lawm” (nqe 60). Txawm yog lub cev raug tiv kev mob, txomnyem, los nws tus ntsujplig tau txais koob hmoov kaj siab ntawm tus Tswv lawm.
Cov ntseeg xubthawj raug tsimtxom heev thiab raug tua povtseg, tiamsis lawv zoo siab hlo tiv tej kev txomnyem ntawd vim tus Tswv thiab yog li lawv tsimnyog tau sawv tabmeeg ntawm Vajtswv xubntiag (Tes Haujlwm 5:41). Nimno, peb tsis raug txawb pobzeb zoo li Xatefanaus, tiamsis tsis ntau los kuj tsawg, thaum nrog tus Tswv mus thiab ua neej rau Nws, peb yeej tseem raug neeg ntiajteb ntxub thiab tawmtsam vim qhov peb ua neej txawv lawv. Cia kom tiv dhau tej kev sim siab no, cia li nrog tus Tswv sib raug zoo, tsis chim thiab tsis ua pauj rau cov neeg uas tawmtsam yus. Yuav tsum xav tias yus tabtom tiv txomnyem nrog tus Tswv yog ib txoj koob hmoov uas tus ntseeg Yexus thiaj tau txais xwb. Thov Vajtswv ntxiv dag zog kom peb zoo siab hlo tiv txomnyem vim tus Tswv lub npe, ua raws li tus Tswv txojkev npaj kom tiv dhau txojkev sim siab thaum raug neeg ntiajteb ntxub.
Thov Vajtswv,
Tus Tswv, txojkev nrog Koj mus yuav raug tibneeg ntiajteb ntxub, tawmtsam thiab tsimtxom. Thov pab kom nyuam yaus ua taus siab ntev tiv txomnyem vim Koj lub npe thiab ntsia pom tej koob hmoov, tshwjchim nyob saum ntuj kom nyuam yaus rau siab ntso ua neej pub rau Koj. Nyuam yaus tuav Tswv Yexus lub npe thov, Amees.
Peb puas zoo siab thiab pom tau koob hmoov thaum raug txomnyem vim tus Tswv lub npe?
Nyeem Vajluskub hauv peb lub xyoo: Yauhas 2
Kênh Youtube BHKTHN:
