Mathais 17:9-13
Nqe cim:
“Yexus hais rau cov thwjtim hais tias, nej cia li mus thoob plaws lub ntiajteb no thiab qhia Txojmoo Zoo kom sawvdaws hnov.” (Malakaus 16:15)
Lus nug rau sawvdaws xav:
– Tom qab Yexus lub cev hloov hlo pem roob, cov thwjtim nug Nws yam dabtsi?
– Tswv Yexus qhia rau cov thwjtim paub yam dabtsi txog tej lus hais hauv Phau Vajluskub Qub?
– Peb kawm tau dabtsi txog feem xyuam ntawm tus ntseeg hauv zaj no?
Tom qab Yexus lub cev hloov hlo pem roob, Yexus cov thwjtim pom tus cevlus Eliyas thiab Mauxes tshwm los nrog Tswv Yexus sib tham, lawv thiaj nug Tswv Yexus ntsigtxog cov lus Vajtswv hais hauv Malakis 4:5-6, vim raws li cov lus no hais, tus cevlus Eliyas yuav tsum los ua ntej, tus Cawmseej mam los tom qab. Cov timthawj uas yog Petus, Yauhas thiab Yakaunpaus ntseeg hais tias, Tswv Yexus yog tus Cawmseej uas Phau Vajluskub Qub hais txog, tiamsis lawv tseem ua xyem xyav vim li cas tus cevlus Eliyas tav no mam tshwm los thiab ua cas ho tshwm rau lub sijhawm Tswv Yexus pib ua haujlwm. Tswv Yexus qhia cov timthawj paub txog tej lus hais hauv phau Malakis, Nws hais tias, “Eliyas yeej yuav xub los tiag, thiab nws yuav npaj txhua yam kom tiav log”, thiab qhia hais tias, “Eliyas twb los lawm” (nqe 11-12). Tswv Yexus xav qhia hais txog Yauhas Npatitus twb los lawm, “nws yuav muaj tswvyim thiab muaj hwjchim ib yam li Eliyas tus uas cev Vajtswv lus, nws yuav ua tus Tswv ntej mus” (Lukas 1:17), nws tsis yog tus cevlus Eliyas sawv rov los uas raws li sawvdaws xav. Tej uas Yauhas Npatitus qhia raug cov Yudais tej thawjcoj, lawv thiaj tawmtsam thiab muab nws tua povtseg. Yexus rov hais txog Nws hais tias, “lawv yuav tsimtxom Neeg Leej Tub ib yam li ntawd thiab.” (nqe 12).
Yauhas Npatitus twb ua tiav tes haujlwm ntawm tus neeg kho kev tos tus Tswv lawm, tibneeg thiaj muaj lub siab txais yuav tus Cawmseej thaum Nws los ua haujlwm. Nimno txhua tus ntseeg yuav tsum kawm xyaum Yauhas Npatistus tus qauv ua neej. Peb kuj tabtom tau tus Tswv muab tes haujlwm mus qhia tus Tswv lub npe rau tibneeg txhua tus ua ntej Tswv Yexus rov qab los. Tswv Yexus qhia hauv Yauhas 14:3 hais tias, “thaum uas kuv tu tau chaw rau nej lawm, kuv yuav rov qab los thiab tos nej mus nrog kuv nyob; kuv nyob qhov twg nej yuav nrog kuv nyob qhov ntawd.” Tswv Yexus yeej yuav rov los, tiamsis saib peb puas ua tiav feem xyuam qhia Yexus lub npe rau lwm tus lawm tau? Peb yuav tsum ua neej kom phim cov nyob hauv qhov tseeb, kom pab tau tej neeg nyob ibncig zeem paub lawv tej kev txhaum, lawv lees txim tig rov los cuag Vajtswv. Tsis yog li ntawd xwb, peb kuj yuav tsum txaus siab hlo tiv kev txomnyem, kev tawmtsam, kev tsimtxom mus ua raws nraim li tus Tswv tej lus qhia thiab ua Nws tej haujlwm. Tamsim no yuav tsum qhia tus Tswv lub npe “ua ntej hnub tseemceeb thiab hnub uas tus Tswv los txiav txim” (Malakis 4:5). Yuav muaj tej cim qhia paub lub sijhawm kawg meej zuj zus, thov Vajtswv pab txhua tus ntseeg thiab txhua lub Pawg Ntseeg, rau siab ntso ua tes haujlwm tshaj qhia Moo Zoo, muab tes haujlwm qhia txojkev cawm dim saib hlob, vim tseem muaj ntau leej tsis tau txais kev cawm dim.
Thov Vajtswv:
Tswv Yexus, Koj twb coglus hais tias Koj yuav rov qab los coj cov uas ntseeg mus nrog Koj nyob. Thov Koj pab kom nyuam yaus zeem paub thiab niaj hnub ua tiav feem xyuam yog qhia Koj zaj rau lwm tus, ua ntej hnub Koj rov qab los. Nyuam yaus tuav Cawmseej Tswv Yexus lub npe thov, Amees.
Ib tsoom cov mloog uas hmov thiab tshua,
Peb puas tabtom siv zog ua kom tiav feem xyuam qhia tus Tswv lub npe lawm tau?
Nyeem Vajluskub hauv peb lub xyoo: II Kevcai 2
Kênh Youtube BHKTHN:
