Pajlug 21:25-26
Nqe cim:
“Txhua yam haujlwm uas kuv ua rau nej pom twb yog kuv ua qhia rau nej paub hais tias peb yuav tsum ua haujlwm hnyav li ntawd thiaj pab tau cov neeg uas tsis muaj zog. Thiab peb yuav tsum nco ntsoov tej lus uas tus Tswv Yexus qhia hais tias, ‘Thaum yus pub rau luag yus zoo siab heev dua thaum yus tau luag li” (Tes Haujlwm 20:35)
Lus nug rau sawvdaws xav:
– Vajntxwv Xalumoos hais txog ob tus cwjpwm sib txawv twg?
– 2 tus cwjpwm ntawd sib txawv li cas?
– Vajtswv xav kom peb ua neej thiab ua haujlwm raws tus cwjpwm twg?
Ob nqe Pajlug no hais txog ob tus cwjpwm sib txawv ntawm tus neeg tubnkeeg thiab tus neeg ncaj ncees. Tus neeg tubnkeeg niaj hnub ntshaw yam ub yam no xav kom tau txais yam nws ntshaw, tiamsis tus neeg ncaj ncees nws muaj lub siab pub davfo pub rau lwm tus. “Tus neeg tubnkeeg uas tsis kam mus ua haujlwm, yog nws rov muab nws tua povtseg”. Qhov ntawd yog taw txog tus tas kev cia siab, tus neeg qia dub thiab tus tsis xam pom lwm tus. Tus neeg tubnkeeg tsuas xav kom sau tau ntau tiamsis tsis kam siv zog ua haujlwm kom nws muaj. Nws tsuas xav thiab ntshaw yam uas nws nyiam tiamsis nws tsis nquag mus khwv noj khwv haus. Txhais tes tsis ua haujlwm yeej tsis muaj dabtsi los ntsaws rau hauv lub qhov ncauj! Tus neeg tubnkeeg muaj kev ntshaw tiamsis tsis dhau los ua qhov tseeb, kev tshaib kev nqhis ua rau nws tas kev cia siab thiab tua nws tuag zuj zus mus txog thaum tu siav. Vajntxwv Xalumoos qhia rau peb pom txog nqi zog ntawm tus neeg tubnkeeg thiab tus neeg nquag yeej sib txawv, “Tus neeg tubnkeeg ntshaw npaum li cas los nws yeej tsis tau tej ntawd ib zaug li. Tiamsis tus neeg nquag yuav tau txhua yam raws li nws lub siab xav.” (Pajlug 13:4).
Ua neej tsis kam ua haujlwm ces yus tus kheej yeej tsis muaj txaus noj, tsis hais txog qhov uas yuav pab tau lwm tus. Tus neeg tubnkeeg tsuas xav txog nws xwb yeej tsis xav txog cov uas nyob ib ncig ntawm nws, tsuas paub txais thiab sau los xwb, yeej tsis txawj muab pub rau leejtwg li. Tiamsis tus neeg nquag, nws rau siab ua haujlwm kom muaj ntau sau los, tsis yog txaus rau nws lub tsev neeg siv xwb, tiamsis tseem seem ntau kawg uas nws muab pub rau lwm tus thiab, “…nws pub tau rau luag ntawm lub siab dawb paug”. Nws zeem paub tej koob hmoov uas nws muaj npluamias yog Vajtswv pub rau nws thiaj paub ua neej faib pub rau lwm tus. Vajntxwv Xalumoos hu tus neeg nquag li ntawd yog tus neeg ncaj ncees. Vim nws qhia tshwm kev hlub los ntawm cev tes pab lwm tus uas muaj lub neej txomnyem nyob ib ncig ntawm nws.
Timthawj Paulus ntuas Vajtswv cov menyuam kom lawv yuavtsum rau siab ua haujlwm khwv kawg thiaj pab tau lwm tus, nws rov hais txog txoj cai uas Tswv Yexus twb qhia tseg lawm hais tias “Thaum yus pub rau luag yus zoo siab heev dua thaum yus tau luag li”. Vajtswv tsis yog xav kom peb nquag ua haujlwm thiaj muaj yam ub yam no los rau peb tus kheej, peb tsev neeg tau zoo xwb, tiamsis xav kom peb muaj txaus coj mus pab cov neeg muaj mob, cov neeg raug txomnyem thiab. Koob hmoov tsis yog peb sau qoob loo ntau, txhua yam muaj npluamias xwb tiamsis yog ua neej muaj kev hlub los ntawm muab pub rau lwm tus. Yog Vajtswv cov menyuam lawm tsis txhob tubnkeeg tiamsis yuavtsum nquag ua haujlwm, tas siab ua txhua zoo pub rau lwm tus ib yam li yog ua rau Vajtswv, thiab yuavtsum zoo siab muab yam yus muaj pub rau yus cov kwvtij ntseeg uas muaj lub neej txomnyem. Dhau qhov ntawd, peb kuj qhia tshwm lub siab ua Vajtswv tsaug thiab lub siab hlub Vajtswv rau lwm tus pom.
Thov Vajtswv:
Vajtswv, nyuam yaus ua Koj tsaug, vim Koj Txojlus ntuas nyuam yaus kev ua neej txhua hnub. Thov pab nyuam yaus nquag ua haujlwm thiab ua neej paub hlub tshua lwm tus uas muaj lub neej txomnyem nyob ib ncig ntawm nyuam yaus li Koj Txojlus qhia. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Peb puas nquag ua haujlwm thiab muaj lub siab hlub tshua pab lwm tus lawm?
Nyeem Vajluskub hauv peb lub xyoos: Teev Npe 36
Kênh Youtube BHKTHN:
