2Thexalaunikes 2:5-12
Nqe cim:
“Tiamsis niaj hnub nimno muaj ib yam txwv tsis pub kom tej ntawd tiav. Nej twb paub yam ntawd lawm. Thaum txog lub sijhawm ntawd sawvdaws yuav pom tus uas ua phem ntawd.” (2Thexalaunikes 2:6)
Lus nug rau sawvdaws xav:
– Tim thawj Paulus ntuas cov ntseeg hauv Thexalaunikes li cas txog tus uas tawmtsam Tswv Yexus Khetos?
– Nws piav txog tus ua phem lub hwjchim, ntuas cov ntseeg ceevfaj yam dabtsi?
– Sijhawm tus Tswv teeb tseg qhia peb yuavtsum ua neej li cas?
Hauv nqe 5, timthawj Paulus rov hais txog yam uas nws twb qhia rau cov ntseeg Thexalaunikes hauv tsab ntawv tim ib uas hais txog Tswv Yexus yuav rov qab los thiab coj pawg ntseeg mus ntsib tus Tswv saum ib nta ntuj (1 Thexalaunikes 4:13-18). Dhau ntawd, Paulus kuj qhia txog tus ua phem tes haujlwm uas tawmtam Yexus tshwm los thiab ua haujlwm hauv lub ntiajteb no (2 Thexalaunikes 2:7). Txhais hais tias, tus tawmtsam ntawd yog tus cawmseej cuav, (tus uas tawmtsam Cawmseej Tswv Yexus) yuav tshwm los yog sijhawm uas Vajtswv pub cai rau nws los ua nws tes haujlwm.
Timthawj Paulus ntuas cov ntseeg Thexalaunikes hais tias: Tim 1, Vajtswv tabtom cia “…muaj yam txwv tsis pub kom tej ntawd tiav…Thaum txog lub sijhawm ntawd sawvdaws yuav pom tus uas ua phem ntawd” (nqe 6). Tej no yog yam uas cov ntseeg Thexalaunikes yeej paub zoo lawm Paulus thiaj tsis hais ntxiv. Tim 2, thaum txog Vajtswv lub sijhawm lawm, tus uas txwv raug tshem tawm, cawmseej cuav cia li tshwm los tim ntsej tim muag thiab nws yuav ua nws tes haujlwm phem (nqe 7b-8a). Tim 3, thaum uas tus Tswv Yexus rov qab los tim ntsej tim muag, Nws yuav rau txim rau tus ua phem ntawd los ntawm “Yexus yuav tshuab pa tua tus ntawd povtseg”. Nws Txojlus thiab Nws lub hwjchim uas ci ntsia iab yuav rhuav tus phem ntawd puastsuaj mus. Txhua yam hauv lub ntiajteb no cia li xaus mus (nqe 8).
Timthawj Paulus kuj hais txog tus ua phem ntawd lub hwjchim ua nws tes haujlwm, “Dab Ntxwgnyoog yuav txib tus uas ua phem ntawd los thiab pub hwjchim rau nws kom nws ua tau ntau yam txujci txawv txawv. Thiab nws yuav ua tej yam uas ua rau sawvdaws xav tsis thoob li, tiamsis tej ntawd puavleej tsis tseeb.
Nws yuav ua ntau yam kev phem ntxias cov neeg uas yeej yuav raug puastsuaj mus. Cov neeg ntawd yuav raug puastsuaj rau qhov lawv tsis kam mloog thiab tsis nyiam Txojlus tseeb uas yuav pab tau kom lawv dim lawv lub txim” (nqe 9-10). Qhov no ceebtoom rau txhua tus uas tabtom nyob rau hauv kev txhaum, tsis kam leeg txim, yuav tsis muaj sijhawm tau txais kev cawmdim lawm. Vajtswv pub rau tibneeg ywjpheej txiav txim xaiv, tiamsis tibneeg siv txoj kev ywj pheej ntawd xaiv yuav qhov uas “tsis ntseeg Txojlus tseeb” ces lawv yuav raug dag mus nrhiav tus tsis tseeb kom muaj chaw cia siab thiab lawv xaiv ntseeg “yam uas tsis tseeb” kom txog thaum kawg raug Vajtswv txiav txim rau lawv.
Vajtswv Txojlus ntuas peb txhua tus niaj hnub no hais tias, hnub uas tus Tswv los ze ze lawm, “Yog li ntawd, Vajtswv yuav rau txim rau txhua tus uas nyiam ua phem thiab tsis ntseeg Txojlus tseeb” (nqe 12). Vajtswv tseem pub rau peb muaj sijhawm los lees txim, vim Nws tsis xav kom ib tug twg raug puastsuaj mus. Cia li los lees txim thaum uas tseem muaj sijhawm. Vajtswv Txojlus ceebtoom kom peb tsis txhob tawv ncauj, txhob ua tus tsis ntseeg, tus tawmtsam Txojlus tseeb, nyob tsam raug dag mus ntseeg yam uas tsis tseeb. Nqis zog ntawm txoj kev xaiv yam yus ntseeg yog txiav txim saib qhov uas yuav tau txais yam dabtsi tom ntej, tau txoj sia ib txhis lossis raug Vajtswv txiav txim yog nyob ntawm yus kev xaiv thaum tseem muaj sijhawm.
Thov Vajtswv:
Vajtswv, nyuam yaus ua Koj tsaug uas Koj pub nyuam yaus paub txog caij nyoog, sijhawm uas Koj teeb tseg lawm, nyuam yaus ntseeg ruaj thiab ncaj ncees raws Koj qab mus rau qhov tseeb. Thov pub koob hmoov dag zog rau nyuam yaus tswj tau lub neej dawbhuv rau Koj. Tuav Cawmseej Yexus lub npe thov Amees!
Ib tsoom mloog uas hmov tshua,
Peb txiav txim siab ua dabtsi thaum dhau zaj kawm hnub no?
Nyeem Vajluskub hauv peb lub xyoos: Teev Npe 35
Kênh Youtube BHKTHN:
