Klei Aê Diê Blŭ: Klei Mphŭn Dơ̆ng 38:1-5
Êlan kliăng: “Jăk mơak yơh mnuih amâo êbat ôh tui si klei phung ƀai kčĕ, kăn dôk rei hlăm êlan phung soh, kăn dôk gŭ rei mbĭt hŏng phung mưč.” (Klei Mmuñ Hđăp 1:1)
Klei êmuh ksiêm mĭn: Hbĭl ênuk leh anăn ti anôk klei truh kơ klei yăl dliê anei? Ya mta klei soh čhuai Y-Yuđa lĕ tal êlâo hĭn? Si klei ñu lŏ kdlŭt hĭn êdei tinăn? Si klei mñă kơ drei kơ jih klei bi hmăi jhat hlăm klei truh kơ drei?
Klei yăl dliê kčưm dơ̆ng hŏng boh blŭ “Hlăk anăn”, jing hlăm brô 22 thŭn dơ̆ng mơ̆ng leh čhĭ Y-Yôsep kơ phung Madian (Klei Mphŭn Dơ̆ng 37:36) tơl truh hlăk Y-Yôsep jing khua prŏng ti čar Êjip, leh anăn 9 thŭn êdei anăn mâo 7 thŭn mdiê lu snăk leh anăn 2 thŭn ư̆ êpa (Klei Mphŭn Dơ̆ng 45:6). Hlăm wưng anei, “Y-Yuđa kbiă nao mơ̆ng phung ayŏng adei ñu” (êlan 1). Năng ai kyua ênguôt hnĭng leh anăn wăt klei hƀlŏk hlăm gŏ sang (Klei Mphŭn Dơ̆ng 37:33-35) ngă kơ Y-Yuđa lui ama ñu leh anăn phung ayŏng adei ñu leh anăn “nao dôk mbĭt hŏng sa čô mnuih ƀuôn Adulam, anăn gơ̆ Y-Hira” (êlan 1). Amâo knŏng nao kơ sa boh ƀuôn hlăm čar Kanaan, ƀiădah wăt lŏ ngă mah jiăng leh anăn dôk mbĭt hŏng sa čô mnuih Adulam mơh. Hlăk anăn yơh, ñu “ƀuh” sa čô mniê Kanaan, anak mniê Y-Sua, ñu mă gơ̆ jing mô̆ leh anăn nao dôk hŏng gơ̆ (êlan 2). “Y-Yuđa dôk ti ƀuôn Kêsip tơdah gơ̆ kkiêng kơ anak anăn” (êlan 5), anei ăt jing sa boh ƀuôn prŏng hlăm čar Kanaan mơh. Anôk ala čar brei drei ƀuh Y-Yuđa ƀrư̆ mŭt êlam hĭn hlăm lăn čar tue, klei bră msĕ si ƀrư̆ hruôt kjăp hĭn êjai, leh anăn ya klei truh thơ̆ng truh yơh, anăn jing klei soh!
Klei soh tal êlâo hĭn hlăm gŏ sang anei, jing klei Y-Yuđa dôk mô̆ mniê Kanaan. Y-Yuđa thâo sĭt nik leh klei phung aê đưm Y-Abraham leh anăn Y-Isăk amâo tŭ ư ôh sơăi, kơ aê ñu leh anăn ama ñu mă mô̆ mơ̆ng mniê čar Kanaan (Klei Mphŭn Dơ̆ng 24:3; 28:1). Ăt hlăm wưng anei mơh, wăt tơdah ñu jing anak êkei tal pă Y-Yakôp dưn, ƀiădah yap ñu jing msĕ si sa čô ayŏng khua, kyua bruă Y-Simêôn leh anăn Y-Lêwi ngă klei soh bi mdjiê phung ƀuôn Sičem čiăng rŭ ênua kơ H’Dina (Klei Mphŭn Dơ̆ng 34) bi ênguôt Y-Yakôp; bi Y-Ruben ngă klei soh knhông hŏng H’Bilha, mô̆ ama ñu (Klei Mphŭn Dơ̆ng 35:22). Ƀiădah amâo uêñ ôh kơ klei mtô lač hlăm gŏ sang, klei jhat ƀai phung Kanaan, leh anăn bruă klam wăt anôk jing hlăm gŏ sang pô, Y-Yuđa mă leh sa čô mniê Kanaan jing mô̆ ñu.
Tơdah tlă anăp hŏng klei lông dlăng hlăm klei hdĭp, hlăm gŏ sang, drei khăng mĭn kơ klei klah đuĕ mơ̆ng êpul êya phung đăo kơ Krist nao ngă mah jiăng hŏng phung lăn ala, ƀiădah lu mnuih amâo thâo kral ôh klei bi hmăi jhat leh anăn sui dlông mơ̆ng kdrŭn anôk ala ƀuôn ba hriê kơ diñu. Kyuanăn akâo kơ Khua Yang brei drei dôk răng hŏng jih ai tiê. Hrô kơ klei đuĕ dăp kơ klei lông dlăng, jăk hĭn brei drei hriăm tlă anăp hŏng klei dluh lĕ, klei soh, leh anăn klei kbah drei pô mbĭt hŏng gŏ sang, knang kơ klei pap Khua Yang găn gao klei lông dlăng, čiăng ba klei bi hmăi jăk siam kơ drei pô leh anăn wăt kơ phung ênuk lŏ čuê drei mơh.
Si drei khăng wĭt ngă ti anăp klei lông dlăng hlăm klei hdĭp leh anăn hlăm gŏ sang?
Wah lač: Ơ Khua Yang, akâo Ih krơ̆ng kâo dôk nanao hlăm Khua Yang leh anăn hlăm gŏ sang kâo, jing anôk Ih mdưm. Akâo Ih brei kâo dôk răng nanao čiăng dưi găn gao klei lông dlăng, kyua klei bi hmăi mơ̆ng ala ƀuôn ba truh kơ kâo leh anăn kơ gŏ sang kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 7-9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
