Chivkeeb 38:1-5
Nqe cim:
“Cov neeg uas tau koob hmoov yog cov uas tsis ua raws li cov neeg siab phem tej lus haub ntxias, thiab tsis xyaum ua raws li cov neeg txhaum ua lossis tsis nrog cov neeg uas tsis hwm Vajtswv koom ua ib lub siab” (Ntawv Nkauj 1:1)
Lus nug rau sawvdaws xav:
– Zaj xwm tshwm muaj thaum twg thiab nyob qhov twg?
– Yudas qhov txhaum xubthawj yog dabtsi?
– Tomqab ntawd nws raug log zuj zus licas?
– Peb tau qhuab ntuas licas txog qhov uas lub chaw peb nyob muaj peevxwm yaum tau peb poob rau yam tsis zoo?
Zaj xwm pib ntawm lo lus “Thaum lub sijhhawm ntawd”, ntawd yog ntu sijhawm nyob hauv 22 lub xyoo txij thaum Yauxej raug muag rau cov tub lag luam neeg Midias (Chivkeeb 37:36) mus txog thaum Yauxej tau ua nom loj kav tebchaws Iziv, thiab 9 xyoo ntxiv yog 7 xyoo sau tau qoobloo thiab 2 xyoo tshaib nqhis (Chivkeeb 45:6). Nyob ntu sijhawm no, “Yudas tso nws cov kwvtij tseg” (nqe 1). Tej zaug vim tej kev nyuaj siab thiab kev tu siab hauv lub cuabyig (Chivkeeb 37:33-35) ua rau Yudas tso nws txiv thiab cov kwvtij tseg thiab “khiav mus nrog ib tug txivneej hu ua Hilas uas yog cov neeg hauv lub nroog Adulas nyob” (nqe 1). Tsis yog tsuas mus nyob hauv ib lub nroog ntawm cov neeg Kana-as xwb, nws tseem ua phoojywg thiab nrog ib tug neeg Adulas nyob uake. Nyob qhov ntawd, nws tau “ntsib” cov Kana-as ib tug ntxhais thiab yuav ua pojniam (nqe 2). Thaum yug tus tub hu ua Selas “Yudas tseem nyob hauv lub nroog Akhexis” (nqe 5), ntawd kuj yog cov neeg Kana-as ib lub nroog. Saib duab tebchaws peb pom hais tias Yudas yim hnub yim mus tob hauv lwm haivneeg cheebtsam av, lub voj hlua yim hnub yim zawm ceev thiab yam yuav tshwmsim tau tshwm tuaj, ntawd yog kev txhaum!
Kev txhaum xubthawj hauv lub cuabyig no yog qhov uas Yudas yuav ib tug ntxhais Kana-as los ua pojniam. Yudas yeej paub hais tias nws cov yawgkoob uas yog Anplahas thiab Ixaj puavleej tsis kheev nws tus yawg thiab nws txiv mus yuav cov Kana-as tej ntxhais (Chivkeeb 24:3; 28:1). Nyob lub sijhawm no, txawm yog Yudas yog Yakhauj tus tub thib plaub los nws muaj meejmom zoo li tus tub hlob vim qhov uas Xime-oos thiab Levis ua txhaum tua cov neeg nyob hauv lub nroog Sikhees ua pauj nkawd tus muam Dinas (Chivkeeb 34) ua rau Yakhauj ntxhov siab; tshuav Lunpees ho ua txhaum uas nrog nws txiv tus niam yau hu ua Npilehas pw (Chivkeeb 35:22). Txawm Yudas yuav tau kev qhuab ntuas ntawm tsevneeg, pom kev phem ntawm cov Kana-as, thiab muaj feemxyuam rau meejmom hauv lub cuabyig, los nws yeej tiv qees mus yuav ib tug ntxhais Kana-as los ua pojniam.
Thaum ntsib tej kev sim siab hauv lubneej thiab lub cuabyig, peb pheej xav cais tawm ntawm cov ntseeg mus ua phoojywg nrog lub ntiajteb, tiamsis coob tug tsis zeem paub txog qhov chaw lawv mus nyob muaj peevxwm yaum tau lawv poob rau tej yam tsis zoo. Vim li ntawd thov tus Tswv qhia peb xyuamxim. Peb tsis txhob khiav nkaum tej kev sim siab thaum raug poob tsam, ua yuamkev, qhov zoo tshaj peb yuav tsum tig los tawmtsam tej ntawd, vamkhom tus Tswv txoj koobhmoov pab tiv dhau tej kev sim siab kom peb tau txais yam zoo thiab ua tau qauv zoo rau tiam tomqab.
Thov Vajtswv,
Tus Tswv, thov tuav nyuam yaus nyob ruaj hauv Koj thiab hauv lub cuabyig uas Koj pub rau nyuam yaus. Thov pab nyuam yaus zov tos kom tiv dhau tej kev sim siab uas sab nraud tso tuaj raug nyuam yaus thiab lub tsevneeg. Nyuam yaus tuav Yexus Khetos lub npe thov, Amees.
Peb pheej ua licas thaum ntsib tej kev sim siab hauv lubneej thiab hauv lub cuabyig?
Nyeem Vajluskub hauv peb lub xyoo: Ntawv Nkauj 7-9
Kênh Youtube BHKTHN:
