Klei Aê Diê Blŭ: I Y-Yôhan 1:9
Êlan kliăng: “Tơdah drei hưn klei soh drei, Ñu jing sĭt suôr leh anăn kpă, srăng pap brei klei soh drei leh anăn bi doh hĕ drei mơ̆ng jih jang klei wê.” (I Y-Yôhan 1:9)
Klei êmuh ksiêm mĭn: Ya jing hưn klei soh leh anăn si klei mblang? Si mblang “hưn klei soh drei”? Ya klei Khua Yang ƀuăn tơdah drei hưn klei soh drei? Si diih mkra mjuăt klei hdĭp mngăt hlăm bruă hưn klei soh?
Tơdah ngă klei soh, drei amâo djŏ knŏng tlă anăp hŏng boh tŭ jhat mơ̆ng klei ngă soh ôh, ƀiădah wăt ênông ktrŏ klei soh ktư̆ ai tiê klei mĭn, bi mkhư̆ kơ̆ng klei hdĭp drei, ngă bi kdung knhuang drei tui hlue Khua Yang leh anăn amâo mâo mboh ôh. Ƀiădah bi mni kơ Khua Yang kyua klei Ñu ƀuăn bi mđĭ ai drei êdi mi hlăm I Y-Yôhan 1:9 hưn klă snei, drei dưi lui kluôm dhuôm ênông ktrŏ klei soh tơdah drei nao kơ Khua Yang leh anăn sĭt kpă “hưn klei soh drei”. Boh tŭ dưn mơ̆ng ai tiê kmhal hưn klei soh jing mâo Khua Yang jing sĭt suôr leh anăn kpă srăng pap brei klei soh drei leh anăn bi doh hĕ drei mơ̆ng jih jang klei wê.
Hlăm êlan Klei Aê Diê Blŭ anei, boh blŭ “hưn” mblang jing “tŭ ư”. “Hưn klei soh” jing hưn mdah hŏng Khua Yang klei soh drei ngă, tŭ ư hŏng Khua Yang snei, klei soh jing jhat leh anăn drei ngă soh leh, ngă bi ênguôt kơ Khua Yang. Hưn klei soh amâo djŏ ôh knŏng thâo drei mâo klei soh ƀiădah brei ênguôt hnĭng sĭt kơ jih klei kƀah drei pô ti anăp Khua Yang, kmhal sĭt kơ klei soh leh anăn čuăn ai tiê lui klei soh. Klei lông dlăng hlăm klei hưn klei soh tinei jing “hưn klei soh drei”, mblang jing brei hưn klă klei soh drei pô ngă, sĭt êmĭt tŭ ư pô yơh ngă soh, kmhal leh anăn bi mlih.
Ênuk Klei Bi Mguôp Hđăp, sa čô mnuih amâo dưi ôh hưn klei soh ñu pô hŏng Aê Diê, ƀiădah brei ba mnơ̆ng ngă yang kơ khua ngă yang čiăng dưi ngă klei bhiăn bi tui klei soh (Bruă Lêwi 5:5-6). Phung đăo kơ Krist ênuk Klei Bi Mguôp Mrâo mâo klei pap prŏng dưi nao kơ Aê Diê čiăng hưn klei soh pô, amâo lŏ guôn găn hŏng hlei mnuih mkăn ti krah ôh. Khua Yang Yêsu yơh jing Pô Ti Krah, Pô kăp wah lač brei kơ drei ti anăp Aê Diê Ama (I Y-Yôhan 2:1).
Ya hruê adôk hdĭp hlăm asei mlei thâo djiê ti krah lăn ala soh jhat anei, jih jang drei amâo mâo ôh sa čô amâo ngă soh. Kyuanăn klei hưn klei soh jing sa klei lông dlăng brei ngă nanao, leh anăn ăt jing klei mkra mjuăt klei hdĭp mngăt brei phung đăo kơ Krist ngă čiăng dưi mâo klei bi hlao, lŏ bi mrâo, leh anăn bi mlih jing doh jăk hĭn grăp hruê. Brei drei kčưm dơ̆ng hŏng mnĭt mmông mprăp miêt ai tiê klei mĭn, ksiêm dlăng wĭt drei pô ya klei soh drei ngă leh, ksiêm mĭn hŏng jih ai tiê klei soh drei ngă leh hlăm klei ênguôt hnĭng sĭt. Êdei tinăn, brei drei dôk čang guôn kơ klei pap Khua Yang, kwưh akâo Ñu pap brei klei soh leh anăn lŏ bi mrâo drei. Pô sĭt suôr leh anăn kpă srăng pap brei klei soh drei leh anăn bi doh hĕ drei mơ̆ng jih jang klei wê.
Mâo mơ̆ ya klei soh hlăm klei hdĭp drei brei hưn hŏng Khua Yang hruê anei mtam?
Wah lač: Ơ Khua Yang, bi mni kơ Khua Yang kyua klei Ih ƀuăn pap brei klei soh leh anăn lŏ bi mrâo tơdah kâo hưn klei soh kâo. Akâo Ih đru kâo thâo ksiêm dlăng sĭt ai tiê kâo pô leh anăn nao kơ Khua Yang hŏng klei kmhal hưn klei soh, čiăng dưi bi knal klei pap Khua Yang pap brei klei soh. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Kbiă 14
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
