I Yauhas 1:9
Nqe cim
“Tiamsis yog peb lees peb tej kev txhaum rau Vajtswv, Vajtswv yog tus ncaj ncees, nws yuav ua raws li nws tau coglus tseg lawm, nws yuav zam peb tej kev txhaum thiab nws yuav ntxuav peb tej kev txhaum huv tibsi mus.” (I Yauhas 1:9).
Lus nug rau sawvdaws xav:
– Lees txim yog dabtsi thiab muaj lub ntsiab zoo li cas?
– “Lees peb tej kev txhaum” txhais tau li cas?
– Tus Tswv coglus yam dabtsi thaum peb lees kev txhaum?
– Peb xyaum tswj sab ntsujplig los ntawm txojkev lees txim zoo li cas?
Thaum ua txhaum, peb tsis yog raug tej nqi zog ntawm txojkev txhaum xwb tiamsis peb tseem ris lub txim ntawd rau hauv siab, kev xav, kav peb lub neej, ua rau peb lub neej nrog tus Tswv mus tu ncab tu ncua thiab tsis tawg paj txi txiv li. Tiamsis peb ua Vajtswv tsaug vim Nws coglus hauv I Yauhas 1:9 hais tias yog peb los cuag tus Tswv thiab “lees peb tej kev txhaum” ces Nws yuav zam peb lub txim. Nqi zog rau tus lub siab lees txim yog tau tus Tswv uas ncaj ncees, ua siab ntev zam txim thiab ua tau neeg dawbhuv.
Hauv nqe Vajluskub no, lo lus “lees” txhais tau hais tias yog “pom zoo”. “Lees txim” nws yog tabmeeg lees tej kev txhaum uas yus ua rau tus Tswv, nrog tus Tswv pom thiab lees hais tias kev txhaum yog qhov phem thiab yus tau ua txhaum, ua rau tus Tswv tu siab. Lees txim tsis yog paub yus muaj txhaum xwb tiamsis yuav tsum paub nyuaj siab txog tej kev txhaum ntawd tabmeeg tus Tswv, lub siab lees txim tiag tiag thiab txiav txim siab tso tseg. Qhov nyuaj hauv txojkev lees txim ntawm no yog “lees peb tej kev txhaum”, txhais tau hais tias yuav tsum lees kom tas txhua yam kev txhaum yus tau ua thiab hloov dua tshiab.
Nyob tiam Phau Vajluskub Qub, ib tug tibneeg nws cim civ lees tsis tau tej kev txhaum uas nws ua txhaum rau Vajtswv, yuav tsum tau coj ib tug tsiaj mus rau tus povthawj tua ua kevcai daws txim (Levis Kevcai 5:5-6). Cov ntseeg Tswv Yexus nyob tiam Vajluskub Tshiab tau koob hmoov mus cuag Vajtswv lees tej kev txhaum uas yus tau ua tsis tas dhau tus neeg nyob nruab nrab. Tswv Yexus yog tus uas nyob nruab nrab ntawm Vajtswv thiab tibneeg, Nws nyob ntawm Leej Txiv sabxis thov Vajtswv pab rau peb (I Yauhas 2:1).
Hnub uas peb tseem ua neej nyob rau lub cev uas txawj tuag no, tagnrho peb txhua tus puavleej ua txhaum. Yog li qhov uas lees txim yog ib qhov uas yuav tsum ua nraim, thiab kuj yog qhov kev tswj sab ntsujplig uas cov ntseeg Yexus yuav tsum tau ua kom ua tau neeg zoo thiab ua tau lub neej dawbhuv zuj zus. Peb cheemtsum pib los ntawm qhov uas npaj kev xav thiab lub siab, tshuaj saib tug kheej ua tej kev txhaum twg, xav txog tej uas yus ua tsis yog, nyuaj siab, tu siab, tso tseg. Txuas ntxiv, peb ntsia tus Tswv txojkev hlub, thov Nws zam txim thiab hloov peb. Tus Tswv yog tus uas ncaj ncees, ua siab ntev Nws yuav zam peb tej kev txhaum huvsi mus.
Thov Vajtswv,
Tus Tswv, nyuam yaus ua Koj tsaug vim Koj coglus zam txim thiab hloov thaum nyuam yaus lees txim. Thov Koj pab kom nyuam yaus paub ua tib zoo tshuaj saib lub neej thiab los cuag Koj, lees tej kev txhaum kom tau txais Koj txojkev zam txim. Nyuam yaus tuav Tswv Yexus lub npe thov, Amees.
Puas muaj yam kev txhaum twg nyob hauv peb lub neej uas cheemtsum lees hnub no?
Nyeem Vajluskub hauv peb lub xyoo: Khiavdim 14
Kênh Youtube BHKTHN:
