II Kevcai 11:1-12
Nqe cim
“Tus TSWV uas yog nej tus Vajtswv, tu thiab saib lub tebchaws ntawd tas niaj tas xyoo.” (II Kevcai 11:12).
Lus nug rau sawvdaws xav:
– Mauxes qhia rau tus Tswv haivneeg yuav tsum ua li cas thiaj tau txais tus Tswv tej koob hmoov thawm xyoo?
– Vim li cas lub tebchaws “muaj dej muaj nag thiab av noo zaw” yog koob hmoov?
– Zaj kawm no qhia rau peb ua yam dabtsi rau hnub uas tas xyoos?
Ua ntej tus Tswv haivneeg yuav mus rau hauv lub tebchaws uas Nws coglus tseg, Mauxes txhawb cov pejxeem lub zog hais tias: “Tus Tswv uas yog nej tus Vajtswv, tu thiab saib lub tebchaws ntawd tas niaj tas xyoo” (nqe 12). Tiamsis cia kom tau txais tej koob hmoov tus Tswv pub thawm xyoo, Mauxes hais kom tus Tswv haivneeg yuav tsum ua peb yam tseemceeb. Tim ib, yuav tsum hlub tus Tswv uas yog nej tus Vajtswv (nqe 1a), nov yog thawj nqe kevcai thiab yog nqe kevcai tseemceeb uas txhua tus neeg uas yog tus Tswv menyuam yuav tsum tau ua (Mathais 22:38). Tim ob, niaj hnub ua raws li teju as tus Tswv qhia, uas yog txojcai, tej lus samhwm thiab Kaum Nqe Kevcai (nqe 1b). Tim peb, yuav tsum nco ntsoov tej koob hmoov uas tus Tswv pub txij thaum lawv khiav tawm tebchaws Iziv los txog hnub no, rau qhov lawv twb pom tej txujci tseemceeb uas tus Tswv tau ua lawm (nqe 2-7).
Tus Tswv haivneeg yog neeg ua noj ua haus, dej yog yam uas cheemtsum heev rau lawv, Mauxes muab tej uas tus Tswv haivneeg cog qoobloo nram tebchaws Iziv los piv rau tej koob hmoov uas tus Tswv pub rau lawv npluamias hauv lub tebchaws uas Nws coglus tseg, “Lub tebchaws uas nej tabtom yuav mus nyob ntawd zoo tsis thooj li lub tebchaws Iziv uas nej nyob los lawm. Thaum nej nyob nram tebchaws Iziv, nej yuav tau khawb kwj tso dej los rau hauv nej tej liaj tej teb khwv kawg nej thiaj cog tau qoobloo, tiamsis lub tebchaws uas nej yuav mus nyob ntawd, muaj roob muaj hav, muaj dej muaj nag thiab av noo zaw” (nqe 10-11). Thaum lawv hlub tus Tswv, mloog tus Tswv lus thiab nco ntsoov Nws, lawv yuav tau tus Tswv foom koob hmoov tsis yog ib ob zaug xwb tiamsis txij thaum hauv xyoo mus txog qab xyoo.
Cov ntseeg Yexus kuj tabtom taug txojkev mus saum ntuj ceebtsheej. Thaum tseem ua neej nyob no, peb twb pom tus Tswv ua ntau yam txujci zoo pub rau yus, tsevneeg thiab Pawg Ntseeg. Hnub no, yog hnub xaus ntawm lub xyoo 2023 lawm, peb txhua tus muaj ntau yam ua tus Tswv tsaug. Zaj kawm uas hais txog tus Tswv haiv neeg hnub no qhia kom peb yuav tsum niaj hnub muaj lub siab hlub tus Tswv, mloog tus Tswv lus thiab nco ntsoov Nws. Cia li nco ntsoov tus Tswv yog tus uas muaj kev hlub, muaj hwjchim cawm tau peb dim ntawm txojkev txhaum, kom peb fij taus tus kheej rau tus Tswv thiab ua neej haum Nws siab. Tsis muaj ib yam koob hmoov zoo npaum qhov uas tau Vajtswv tu thiab saib ntsoov peb “txij thaum hauv xyoo mus txog qab xyoo”. Cia li nrog tsevneeg, Pawg Ntseeg suav tej txujci tseemceeb uas tus Tswv ua rau peb lub xyoo tas los, kom peb hla mus rau lub xyoo tshiab 2024 muab lub siab hlub tus Tswv heev ntxiv, mloog tus Tswv lus, paub ua tus Tswv tsaug mus tas sim neej.
Thov Vajtswv,
Tus Tswv, ua tsaug uas Koj nrog nraim, pub koob hmoov rau nyuam yaus lub xyoo tas los. Thov Koj pab kom nyuam yaus hlub Koj, mloog Koj lus thiab nco ntsoov tej koob hmoov uas Koj pub rau nyuam yaus tsevneeg. Thov Koj pub lub zog tshiab rau nyuam yaus hla mus rau lub xyoo tshiab 2024. Nyuam yaus tuav Tswv Yexus lub npe thov. Amees.
Ib tsoom cov mloog uas hmov thiab tshua,
Peb tham yam dabtsi rau tsevneeg, rau Pawg Ntseeg hnub uas tas xyoo 2023 no?
Nyeem Vajluskub hauv peb lub xyoo: Tshwmsim 22
Kênh Youtube BHKTHN:
