Klei Aê Diê Blŭ: Y‑Mathiơ 10:1-7
Êlan kliăng: “Leh anăn êjai nao brei diih mtô, ‘Ƀuôn ala mtao adiê giăm truh leh.’” (Y‑Mathiơ 10:7)
Klei êmuh ksiêm mĭn: Ya klei Khua Yang Yêsu brei kơ phung ƀĭng kna leh anăn ti anôk Ñu tiŏ nao digơ̆? Ya klei Ñu mtă kơ digơ̆ brei mtô? Ya bruă Khua Yang iêô mthưr drei brei ngă kơ Ñu?
Leh Khua Yang Yêsu iêô mthưr phung ƀĭng kna “Hriê dlăng bĕ” (Y‑Yôhan 1:39) leh anăn “Tui hlue Kâo” (Y‑Markôs 1:17; 2:14), ară anei Ñu čiăng digơ̆ nao hưn klei mrâo mrang yuôm kơ jih jang mnuih. Khua Yang pioh leh hruê mông ktrâo atăt bi hriăm phung ƀĭng kna Ñu. Leh anăn tơdah truh mông leh, Ñu brei digơ̆ kbiă nao ngă bruă hiu hưn Klei Mrâo Mrang Jăk. Hlăm trăn anei, Khua Yang brei kơ digơ̆ klei myang dưi mtô, suôt yang jhat leh anăn bi hlao mnuih ruă (êlan 1).
Hlăk anăn, Khua Yang Yêsu mâo leh 12 čô khua ƀĭng kna. Digơ̆ hriê mơ̆ng klei jing mdê mdê tui si arăng yap gưl tal hlăm ƀuôn sang, hlăm klei hriăm hră mơar ƀiă lu (êlan 2-4), ƀiădah mâo sa klei msĕ mbĭt anăn jing, digơ̆ wĭt lač klei Khua Yang iêô leh anăn tui hlue Ñu. Digơ̆ dưi dôk mbĭt hrăm hŏng Khua Yang, êbat hŏng Ñu, hriăm mjuăt, mjing diñu phung ƀĭng kna êjai tlâo thŭn Khua Yang mă bruă ti lăn ala. Ară anei truh leh mông Khua Yang tiŏ nao digơ̆ kbiă brei ngă ya klei Ñu bi hriăm leh. Êlâo hĭn, Khua Yang čiăng digơ̆ hiu duah “biăp sang Israel luč leh” leh anăn mtô sa klei mrâo mrang jêč ruăt: “Ƀuôn Ala Mtao Adiê giăm truh leh” (êlan 5-7).
“Kmhal hĕ bĕ kơ klei soh diih, kyuadah Ƀuôn Ala Mtao Adiê giăm truh leh.” Jing klei mrâo mrang Y‑Yôhan pô ngă baptem mtô leh msĕ mơh (Y‑Mathiơ 3:2). Êdei kơ klei arăng mă krư̆ leh anăn bi mdjiê Y‑Yôhan, Khua Yang Yêsu ngă bruă mtô kơ klei mrâo mrang jêč ruăt. Ƀiă êdi 7 blư̆ čih leh klei Khua Yang mtô kơ “Ƀuôn Ala Mtao Adiê giăm truh leh” amâodah “truh leh ti dlông diñu” (Y‑Mathiơ 4:17, 10:7; Y‑Markôs 1:15; 12:34; Y‑Luk 10:9, 11; 21:31). Snăn klă sĭt, anei jing klei mrâo mrang yuôm leh anăn jêč ruăt snăk, Khua Yang pô kñăm mtô leh. Ñu ăt čiăng kơ phung ƀĭng kna mphŭn dô leh anăn phung drei hruê anei ăt mtô nanao klei mrâo mrang yuôm anei kơ phung mnuih dôk rai luč.
Ti krah lu klei truh prŏng ti lăn ala hruê anei, drei ƀuh ƀrư̆ klă hĭn êjai klei bi knăl kơ ênuk knhal tuč. Hruê Khua Yang Yêsu lŏ hriê amâo adôk sui ôh leh anăn Ƀuôn Ala Mtao Adiê sĭt nik dôk truh giăm leh. Jing ƀĭng kna Khua Yang, brei grăp čô drei yua bi jăk mông găl čiăng iêô mthưr jih jang mnuih kmhal kơ klei soh, kyuadah Ƀuôn Ala Mtao Adiê dôk truh giăm leh. Sĭt yơh, srăng mâo lu klei lông dlăng êjai drei ngă bruă klei mtă prŏng anei, kyuadah “Diñu srăng hngah hmư̆ klei sĭt nik leh anăn wir tui hlue klei yăl dliê đưm amâo sĭt ôh.” (II Y‑Timôthê 4:4). Čiăng dưi găn klei lông dlăng leh anăn jhŏng hiu hưn Klei Mrâo Mrang Jăk, êlâo hĭn brei drei thâo kral sĭt Ƀuôn Ala Mtao Adiê giăm truh leh. Leh anăn mblang ală mngăt drei, čiăng thâo ƀuh lu mnuih amâo thâo bĭt êlan, dôk nao kơ klei djiê hlŏng lar jŭm dar drei. Knŏng tơdah drei ƀuh, leh anăn thâo săng klei jêč ruăt klei mrâo mrang anei kơh, drei srăng jih ai tiê hlăm bruă hưn bi sĭt leh anăn hiu hưn Klei Mrâo Mrang Jăk.
Si ngă drei thâo săng klei jêč ruăt kơ Ƀuôn Ala Mtao Adiê giăm truh leh mơ̆? Si hdră drei hur har hiu hưn klei mrâo mrang anei?
Wah lač: Ơ Khua Yang, đru kâo mâo klei thâo pap msĕ Ih pap kơ phung rai luč, čiăng kơ kâo hmiêt mkăp găn jih klei lông dlăng, nao hưn klei mrâo mrang Ƀuôn Ala Mtao Adiê giăm truh leh! Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Y‑Samuel 10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
