Klei Aê Diê Blŭ: Y‑Nêhêmi 4:1‑5, 9
Êlan kliăng: “Hmư̆ bĕ, Ơ Aê Diê hmei, kyuadah arăng bi êmut kơ hmei. Bi wĭt bĕ klei diñu mưč ti dlông boh kŏ diñu pô, leh anăn jao hĕ diñu kơ klei arăng plah mă jing mnă hlăm sa boh čar.” (Y‑Nêhêmi 4:4)
Klei êmuh ksiêm mĭn: Ti anăp klei phung roh bi kdơ̆ng, ya klei Y‑Nêhêmi ngă leh? Si drei bi mĭn kơ klei ñu wah lač msĕ si ktrŏ? Ya mta klei drei tui hriăm mơ̆ng klei Y‑Nêhêmi bi hmô?
Jing sa čô mnuih, Y‑Nêhêmi ăt ruă êka ai tiê msĕ mơh ti anăp klei phung roh djă djik djak mčeh luar, ñu hưn hŏng Khua Yang, “arăng bi êmut kơ hmei”. Hrô kơ klei lŏ wĭt ngă, ñu nao kơ Khua Yang wah lač bi êdah sĭt kpă ai tiê sa čô mnuih ruă êka dôk ăl ngêñ. Wah lač amâo bi kdriêl hĕ ôh kyua klei bhiăn đăo amâodah kyua klei blŭ jăk siam, ƀiădah anăn jing mmông grăp čô mnuih hưn mdah sĭt kpă ai tiê pô ti anăp Khua Yang. Klei ruă ai tiê, tơl wăt klei ăl ngêñ jing klei amâo tlaih ôh, ƀiădah đăm brei ôh klei djhưng ai amâo jăk anăn gĭt gai klei drei ngă. Wĭt ngă mtam êjai mmông hlơr khăng atăt drei truh kơ klei soh čhuai hlăm klei blŭ leh anăn klei ngă, atăt drei mơ̆ng anôk djŏ truh kơ anôk soh, mơ̆ng pô arăng ngă jhat jing hĕ pô ngă bi ruă êka mnuih mkăn. Tơdah tlă anăp hŏng klei dleh dlan, klei bi kdơ̆ng, boh nik nak klei blŭ bi ruă êka ai tiê, snăn wah lač yơh jing êlan hdră êlâo hĭn, kyuadah srăng đru drei dưi tlaih đuĕ mơ̆ng klei wĭt ngă soh čhuai, mbĭt hŏng klei anăn dưi mă tŭ klei gĭt gai leh anăn ai ktang mơ̆ng Khua Yang. Ñu amâo dlăng klei wah lač msĕ si klei bhiăn đăo brei ngă êlâo kơ kgŭ ngă tui si klei mĭn pô. Brei phung đăo kơ Krist đăo snei, wah lač yơh jing kdrăn blah phŭn kơ drei, jing anôk čuăn kơ klei drei dưi hĭn.
Tơdah êlan 4‑5 jing klei wah lač hjăn pô, snăn ti êlan 9 Y‑Nêhêmi lač snei, “Hmei wah lač kơ Aê Diê hmei”. Ñu leh anăn phung ƀuôn sang Aê Diê thâo săng sơăi hnơ̆ng yuôm klei wah lač. Bi mguôp sa ai hlăm klei wah lač ba klei ktang kơ Phung Sang Aê Diê, bi đru rŭ hdơ̆ng pô, atăt jih jang mnuih kơ sa klei kñăm čiăng mbĭt, leh anăn lăm jing boh kbưi.
Sa mta klei čiăng lač, tơdah bi msĕ hŏng klei Khua Yang Yêsu mtô kơ klei bi pap brei (Y‑Mathiơ 5:44; 6:12), klei Y‑Nêhêmi wah lač msĕ si ktrŏ snăk, akâo kơ Aê Diê tuh klei phat kđi, klei bi kmhal leh anăn klei tăm pah ti dlông phung roh. Ƀiădah lĕ, brei mđing snei Y‑Nêhêmi ăl ngêñ amâo djŏ kyua ñu pô tŭ klei arăng djik djak ôh, ƀiădah kyua klei arăng djă djik djak kơ Anăn Aê Diê leh anăn kơ phung ƀuôn sang Aê Diê. Klei wah lač anei akâo kơ Aê Diê ăt krơ̆ng klei kpă ênô, leh anăn răng mgang Anăn Aê Diê hŏng klei bi kmhal phung mčeh luar leh anăn blŭ jhat kơ Anăn Aê Diê. Wăt tơdah năng ai klei wah lač anei amâo djŏ ôh, ƀiădah brei ƀuh Y‑Nêhêmi hngah klei rŭ ênua leh anăn jao jih klei bi kmhal kơ Khua Yang (Rôm 12:19). Klei Aê Diê Blŭ čih sĭt kpă klei Y‑Nêhêmi wah lač, drei tui hriăm klei ñu bi hmô kơ ai tiê klei mĭn wah lač, amâo djŏ boh blŭ wah lač ôh.
Ya drei khăng ngă tơdah tlă anăp hŏng klei arăng djă djik djak?
Wah lač: Ơ Khua Yang, brei kơ kâo klei thâo mĭn tơdah tlă anăp hŏng klei ruă êka ai tiê kyua klei arăng djă djik djak leh anăn mčeh luar. Brei kâo ăt đăo knang kluôm dhuôm kơ Khua Yang leh anăn jao jih jang klei kơ Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y‑Luk 5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
