Nehemis 4:1-5, 9
Nqe cim.
“Vajtswv thov koj nrog hnov tej lus uas lawv thuam peb ntawd lauj! Thov kom lawv tej lus uas thuam peb ntawd poob rov los raug lawv. Thov cia tubsab tuaj nyiag txhua yam uas lawv muaj, thiab thov cia cov neeg txawv tebchaws tuaj ntes lawv coj mus rau txim rau hauv luag lub tebchaws” (Nehemis 4:4)
Lus nug rau sawvdaws xav.
– Thaum raug yeebncuab tawmtsam, Nehemis tau ua dabtsi?
– Peb xav licas rau Nehemis tej lus thov uas muaj ntsis hnyav ntawd?
– Peb kawm tau dabtsi txog Nehemis?
Yog ib tug tibneeg, Nehemis kuj mob siab thaum raug yeebncuab hais tej lus thuam thiab lus nkaug, nws hais rau tus Tswv hais tias: “Vajtswv thov koj nrog hnov tej lus uas lawv thuam peb ntawd lauj!”. Nehemis tsis ua pauj, tiamsis nws los cuag thiab taij thov tus Tswv zoo li ib tug neeg chim thaum raug kev mob siab. Kev thov Vajtswv tsis yog tsuas ua raws kev raws cai lossis tsuas hais tej lus zoo zoo xwb, tiamsis ntawd yog sijhawm rau peb txhua tus nthuav nyias lub siab tabmeeg tus Tswv los ntawm nplooj siab dawbpaug. Tej kev iab siab, kev chim yog yam qaij tsis dhau, tiamsis tseemceeb yog txhob cia tej kev xav tsis zoo ntawd coj peb kev. Ua pauj kiag thaum kub chim pheej ua rau peb hais thiab ua yuamkev, tseem muaj peevxwm hloov peb txij ua yam yog mus ua yam txhaum, txij tus raug mob mus ua tus ua rau lwm tus raug mob. Thaum ntsib tej kev txomnyem, tawmtsam, tshwjxeeb yog ntsib tej lus tsis zoo, ces kev thov Vajtswv yog yam yuavtsum xub ua vim ua li ntawd yuav pab peb qaij dhau tej kev ua tsis zoo, thiab txais tau kev taw qhia thiab dag zog ntawm tus Tswv. Nehemis tsis saib kev thov Vajtswv zoo li ib txojcai yuav tsum ua ua ntej nqis tes ua haujlwm. Cov ntseeg Tswv Yexus yuav tsum ntseeg hais tias kev thov Vajtswv yog peb pluav rog, yog qhov chaw ua rau peb muaj yeej.
Nyob hauv nqe 4-5 yog Nehemis tus kheej tej lus thov, tiamsis hauv nqe 9 Nehemis hais tias: “peb thov peb tus Vajtswv”. Nehemis thiab cov pejxeem puavleej zeem paub qhov tseemceeb ntawm kev thov Vajtswv. Thaum sib koom siab hauv kev thov Vajtswv yuav ntxiv dag zog rau Pawg Ntseeg, sib txhawb, sib coj sawvdaws mus raws ib lub homphiaj thiab rub sawvdaws los nyob sib ze.
Ib qhov teebmeem tshwmsim yog thaum muab Tswv Yexus tej lus qhia txog kev zam txim los sib tim (Mathais 5:44; 6:12), ces cuag li Nehemis tej lus taij thov hnyav heev, thov kom Vajtswv rau txim thiab foom phem rau tej yeebncuab. Tiamsis, yuav tsum nco ntsoov hais tias Nehemis chim tsis yog vim nws tus kheej raug thuam tiamsis yog vim tus Tswv Lub Npe thiab tus Tswv haivneeg raug luag saib tsis taus. Lo lus thov no taij thov Vajtswv ua kom muaj kev ncaj ncees, thiab tivthaiv Nws lub koob npe los ntawm kev rau txim rau cov uas hais lus dag thiab saib tsis taus Vajtswv. Txawm yog tej lus thov no tsis zoo, los tej ntawd qhia pom hais tias Nehemis tsis ua pauj thiab muab txhua yam cob rau Vajtswv ua tus txiav txim (Loos 12:19). Vajluskub sau meej Nehemis tej lus thov tsis zais ib qho li, peb kawm nws tus qauv hauv kev thov Vajtswv xwb, tsis yog kawm nws tej lus thov.
Thov Vajtswv,
Tus Tswv, thov pub nyuam yaus muaj tswvyim thaum raug thuam thiab raug luag hais lus nkaug. Thov pab nyuam yaus paub cia siab thiab muab txhua yam cob rau Koj. Nyuam yaus tuav Yexus Khetos lub npe thov, Amees.
Peb pheej ua dabtsi thaum raug lwm tus thuam lossis hais lus nkaug?
Nyeem Vajluskub hauv peb lub xyoos: Lukas 5
Kênh Youtube BHKTHN:
