Klei Aê Diê Blŭ: Klei Kbiă 33:11-17.
Êlan kliăng: “Snăn ară anei, kâo kwưh akâo kơ Ih, tơdah kâo mâo leh klei pap ti anăp ală Ih, bi êdah bĕ kơ kâo êlan Ih, čiăng kơ kâo dưi thâo kral Ih leh anăn mâo klei pap ti anăp ală Ih. Brei Ih yap mơh găp djuê anei jing phung ƀuôn sang Ih.” (Klei Kbiă 33:13)
Klei êmuh ksiêm mĭn: Si ai êwa klei bi blŭ hrăm plah wah Aê Diê hŏng Y‑Môis? Ya klei ñu akâo kơ Aê Diê? Ya klei drei hriăm mơ̆ng klei Y‑Môis lač hlăm êlan 15-16? Dŭm klei akâo, klei wah lač brei diih čiăng akâo kơ Aê Diê hruê anei?
Ai êwa klei bi blŭ hrăm plah wah Aê Diê hŏng Y‑Môis jĕ giăm snăk. Ñu blŭ hrăm tlă anăp hŏng Y‑Môis msĕ si dua čô mah jiăng sĭt suôr (êlan 11). Y‑Môis lŏ mñă wĭt bruă Aê Diê jao kơ ñu ba phung ƀuôn sang Aê Diê hlăm krĭng Kanaan. Khădah ñu thâo klă hĭn hlei pô nao mbĭt hŏng ñu leh anăn hŏng phung ƀuôn sang Aê Diê, ƀiădah jih ai tiê Y‑Môis čiăng akâo kơ Aê Diê pô srăng nao mbĭt hŏng phung ƀuôn sang Ñu hlăm Lăn Aê Diê Ƀuăn. Y‑Môis êdu êun lŏ mñă wĭt klei bi mguôp siă suôr Aê Diê hŏng ñu. Aê Diê iêô anăn ñu leh anăn ñu mâo klei pap ti anăp Aê Diê (êlan 12). Wăt tơdah Y‑Môis dưi dôk mbĭt hŏng Aê Diê hlăm pă pluh hruê mlam ti čư̆ Sinai ƀiădah ñu ăt čang hmăng dưi thâo kral Aê Diê leh anăn klei Aê Diê čiăng lu hĭn. Djŏ mmông, ñu myơr klei wah lač akâo kơ Aê Diê lŏ hdơr phung ƀuôn sang Aê Diê ruah (êlan 13). Ti anăp ai tiê hŏng klei wah lač djŏ mmông leh anăn djŏ klei Aê Diê čiăng, Ñu mgei ai tiê leh anăn hmư̆ klei Y‑Môis akâo. Aê Diê ƀuăn Ñu srăng nao mbĭt hŏng Y‑Môis leh anăn brei gơ̆ dưi mdei (êlan 14).
Wăt tơdah dưi mâo klei kñăm, ƀiădah Y‑Môis ăt lŏ dơ̆ng wah lač hŏng Aê Diê: Tơdah Aê Diê nao mbĭt, akâo kơ Aê Diê đăm ba ôh phung ƀuôn sang kbiă mơ̆ng anôk anei. Si ngă arăng thâo kâo hŏng phung ƀuôn sang Aê Diê mâo klei Ih pap leh anăn mdê hŏng phung djuê ana mkăn tơdah Aê Diê pô amâo nao mbĭt (êlan 15-16)? Klei Y‑Môis wah lač brei ƀuh ñu thâo Aê Diê yuôm bhăn snăk hŏng ñu leh anăn phung ƀuôn sang Aê Diê. Phung ƀuôn sang srăng amâo mâo ôh klei êđăp ênang leh anăn mâo klei tŭ dưi tơdah amâo mâo Aê Diê hrăm mbĭt. Wah lač hŏng Aê Diê amâo djŏ knŏng čiăng dưi mâo klei drei čiăng akâo ôh, ƀiădah yuôm bhăn hĭn dưi mâo klei bi mguôp hŏng Aê Diê. Aê Diê čiăng drei khăp kơ Ñu, čiăng kơ Ñu leh anăn đăo knang kơ Ñu. Klei hdĭp wah lač, wah lač brei thâo gĭr leh anăn jih ai tiê mơ̆ng Y‑Môis srăng dưi bi mơak kơ Aê Diê (êlan 17).
“Kyuadah klei kâo mĭn amâo jing klei diih mĭn ôh, êlan diih kăn jing êlan kâo rei,” Yêhôwa lač” (Y‑Êsai 55:8). Drei srăng amâo thâo săng ôh êlan Aê Diê tơdah Ñu amâo bi êdah brei kơ drei. Knuih hdĭp thâo gĭr wah lač, wah lač brei, kriăng hriăm Klei Aê Diê Blŭ, jih ai tiê djă pioh klei bhiăn leh anăn mă bruă kơ Ñu đru drei grăp hruê thâo kral Aê Diê êlam hĭn.
Drei dôk hur har akâo ya klei leh anăn wah lač brei kơ hlei hlăm klei wah lač hruê anei? Ya klei drei wah lač bi mơak kơ Aê Diê mơ̆?
Wah lač: Ơ Khua Yang klei khăp! Akâo kơ Ih bi êdah kơ kâo thâo kral Ih hĭn, êlan Ih leh anăn đru kâo hdĭp đut gưt klei Ih čiăng čiăng kâo ƀrư̆ hruê thâo kral Ih hĭn, dưi mâo klei pap ti anăp ală Ih lu hĭn. Akâo Ih đru kâo hdĭp knuih jăk, ya klei kâo wah lač, wah lač brei dưi bi mơak kơ Ih.
Dlăng Klei Aê Diê Blŭ hlăm tlâo thŭn: Y‑Yêrêmi 18
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
