Khiavdim 33:11-17
Nqe cim:
“Yog koj txaus siab rau kuv, thov qhia tej uas koj npaj siab yuav ua ntawd rau kuv paub, kuv thiaj yuav ua tau tej uas haum koj siab. Nco ntsoov hais tias koj twb xaiv haivneeg no ua koj tug lawm!” (Khiavdim 33:13).
Lus nug rau sawvdaws xav:
- Kev sib tham ntawm tus Tswv thiab Mauxes zoo licas?
- Mauxes thov tus Tswv yam dabtsi?
- Peb kawm tau dabtsi ntawm Mauxes tej lus hauv nqe 15-16?
- Hnub no koj xav taij thov tus Tswv yam dabtsi?
Kev sib tham ntawm tus Tswv thiab Mauxes zoo heev. Nws nrog Mauxes tham tim ntsej tim muag ib yam li ob tug phoojywg sib tham (nqe 11). Mauxes rov hais txog lub luag haujlwm tus Tswv muab rau nws uas yog coj tus Tswv haivneeg mus rau hauv tebchaws Kana-as. Mauxes xav paub hais tias leejtwg yuav nrog nws thiab tus Tswv haivneeg mus, tiamsis qhov tseeb yog Mauxes xav taij thov kom tus Tswv nrog lawv mus hauv lub Tebchaws Coglus Tseg. Mauxes rov hais rau tus Tswv txog kev sib raug zoo ntawm tus Tswv thiab nws. Tus Tswv paub nws zoo, thiab txaus siab rau nws (nqe 12). Txawm hais tias Mauxes tau nrog tus Tswv nyob plaub caug hnub hmos saum roob Xinais, los nws yeej tseem xav paub tus Tswv thiab xav hnov tus Tswv tej lus qhia heev ntxiv. Txog sijhawm, Mauxes taij thov tus Tswv nco txog tus Tswv haivneeg (nqe 13). Thaum Mauxes taij thov tus Tswv tas siab tas ntsws, thov yog sijhawm thiab thov haum tus Tswv siab, Nws thiaj hlub thiab teb Mauxes tej lus taij thov ntawd. Tus Tswv coglus yuav nrog Mauxes mus thiab pub nws muaj yeej, lwm phau txhais hais tias yuav pub Mauxes tau so (nqe 14).
Txawm tau li tej uas siab ntshaw lawm, los Mauxes tseem thov tus Tswv ntxiv: “Yog koj tsis nrog peb mus, thov tsis txhob tso peb tawm qhov chaw no mus. Yog koj tsis nrog peb mus, leejtwg yuav paub hais tias, koj txaus siab rau kuv thiab rau koj haivneeg? Koj nrog peb mus thiaj yuav cais tau peb tawm ntawm luag lwm haivneeg uas nyob hauv lub ntiajteb no” (nqe 15-16) Mauxes tej lus hais no qhia pom hais tias, nws paub meej tus Tswv tseemceeb heev rau nws tus kheej thiab tus Tswv haivneeg. Tus Tswv haivneeg yuav tsis kaj siab thiab tsis muaj yeej yog hais tias tus Tswv tsis nrog lawv mus. Taij thov tus Tswv tsis yog tsuas xav kom tau tej uas lub siab ntshaw xwb, tiamsis qhov tseemceeb yog txhim kho kev sib raug zoo nrog tus Tswv. Tus Tswv xav kom peb hlub Nws, cheemtsum Nws thiab cia siab rau Nws. Mauxes kev taij thov tus Tswv los ntawm nplooj siab ntev thiab tas siab ua rau tus Tswv txaus siab heev (nqe 17).
“Tus TSWV hais tias: Tej uas kuv xav zoo tsis thooj li tej uas nej xav, thiab tej uas kuv ua zoo tsis thooj li tej uas nej ua” (Yaxayas 55:8). Peb yuav tsis paub tus Tswv txojkev yog Nws tsis qhia rau peb. Lub neej taij thov tus Tswv, nquag kawm Nws Txojlus, ua raws Nws tej lus qhia thiab ua Nws haujlwm yuav pab peb paub tus Tswv ib hnub zuj zus.
Thov Vajtswv,
Tus Tswv uas muaj kev hlub! Thov qhia nyuam yaus paub tseeb txog Koj thiab Koj txojkev thiab pab nyuam yaus ua raws li Koj lub siab nyiam, nyuam yaus thiaj yuav paub Koj thiab Koj yuav txaus siab rau nyuam yaus. Thov kom nyuam yaus lub neej, tej lus taij thov haum Koj siab. Amees.
Hnub no peb kub siab lug taij thov yam dabtsi thiab thov pab rau leejtwg? Peb tej lus taij thov puas haum tus Tswv siab?
Nyeem Vajluskub hauv peb lub xyoos: Yelemis 18
Kênh Youtube BHKTHN:
