Luka 2:20
Trong tơm: “Lu bơngai wei triu wih, bơnê kơkuh kơ ‘Bok Kei-Dei yua kơ lu sư kơtơ̆ng hăm ‘bôh tơdrong noh lei-lăi thoi linh jang ‘lơ̆ng đei khan kơ lu sư.” (Luka 2:20)
Nơ̆r jet tơchĕng pơwao:
– Đơ̆ng rŏng kơ tơ’bơ̆p Kră Yang jur jing bơngai, lu bơngai wei triu đei pơm kiơ?
– Yua kơ kiơ lu sư pơm thoi noh?
– Lu bơ̆n gô pơm kiơ đơ̆ng rŏng kơ bơyan ‘blŏk kơ Kră Yang jur jing bơngai sơnăm ‘nâu?
Đei ‘bôh tơdrong hlĭch kơplah kơtơ̆ng lu linh jang ‘lơ̆ng jur roi tơbăt khan kon ‘Bok Kei-Dei jur tơ ala teh âu. Păng tơ’bơ̆p hloi nge Yêsu tơ anih đei tơpŭ kơ Sư, lu bơngai wei triu jơhngơ̆m lu sư hiôk dêh pă băt dang yơ. Mă loi, rŏ lăng lu sư hơpơi lăm măng noh rŏ kơ wei hơnơ̆ng. Ưh kơ kiơ hloh dang năr tơ’bơ̆p Tơ’ngla Kră Yang jur jing bơngai noh bơih nge Yêsu akâu akar sư lei lăI thoi kon bơngai. Mă-lei tơdrong tih dang yơ kư̆m đei tơklah. Mă tơdrong hiôk dang yơ tuch luch kư̆m tơklah. Lu bơngai wei triu wih brŏk tơ anih tơdrong wei triu lu sư.
Tơdrong trŏ kơ bơ̆n tơchĕng noh jơ̆ lu sư ưh kơ wih brŏk hăm tơdrong hmach ôh, mă-lei hăm tơdrong hiôk chơt dêh: “Lu bơngai wei triu wih, bơnê kơkuh kơ ‘Bok Kei-Dei yua kơ lu sư kơtơ̆ng hăm ‘bôh tơdrong noh lei lăi thoi linh jang ‘lơ̆ng đei khan kơ lu sư.” (Luka 2:20). Lu sư tơ’bơ̆p Kră Yang Yêsu lăp hrei hrei đĕch mă-lei đei yua lăm chăl arih lu sư gơh tơplih. Lu sư hlôh tơdrong arih lu sư noh kiơ păng lu sư rim năr. Thoi noh, lu sư wih jang tơdrong jang wei triu đêl lu sư jang, mă-lei hăm minh tơdrong tih hloh, “Bơnê kơkuh kơ ‘Bok Kei-Dei yua kơ lu sư kơtơ̆ng hăm ‘bôh”. Lu bơngai wei triu wih tơdrong jang kơdih lăm tơdrong arih tơplih ‘nao!
Bơyan ‘blŏk kơ Kră Yang jur jing bơngai đĭ bơih kư̆m trŏ kơ bơ̆n wă hơmet đĭ dôm tơmam pơm pơrŏ, đơ̆ng lăm hnam akŭm păng hnam bơ̆n kơdih thoi năr bơ̆n juăt hmă. Păng arih wơ̆t dôm tơdrong jang bơ̆n juăt hmă. Lu bơ̆n lăng nhen thoi pă ‘bôh tơdrong hiôk chơt lăm bơyan phĕt hiơ̆k lơ tơdrong pă đei bơih. Mă-lei, lei lăi thoi lu bơngai wei triu đơ̆ng rŏng tơ’bơ̆p Kră Yang jur jing bơngai. Bơ̆n kư̆m oei wơ̆t tơdrong jang bơ̆n kơdih, mă-lei đei tơplih ‘nao đơ̆ng tơdrong Kră Yang jur jing bơngai. Tơ’bơ̆p Kră Yang bơih jing tơm tơdrong mơsêh pran ăn kơ bơ̆n đei jơhngơ̆m kơkuh kơ Kră Yang păng ră roi tơdrong Sư rai pran hloh. Rim ‘nu bơngai lui athei ư-ang anăn Kră Yang lăm tôm tơdrong bơ̆n kơtơ̆ng păng ‘bôh lăm bơyan ‘blŏk hơdơ̆r kơ Kră Yang jur jing bơngai sơnăm ‘nâu.
Bơ̆n gô kơkuh kơ Kră Yang păng ră roi thoi yơ lăm tơdrong arih bơ̆n rim năr?
Ơ Kră Yang, inh bơnê kơ Ih yua kơ tơdrong hiôk chơt păng pŭn hiôk lăm bơyan ‘blŏk kơ Kră Yang jur jing bơngai. Apinh Ih tơgŭm inh rok kiơ̆ lu bơngai wei triu sơ̆, wih brŏk tơdrong jang sư kơdih juăt măng năr hăm tơdrong bơnê kơkuh kơ Ih păng ră roi tơdrong Ih. Apinh Ih bơtho inh băt rim năr inh arih jing năr chơt hiôk đei Ih oei hơdai, wă ư-ang kơ Ih păng ră roi Tơdrong ‘Nao ‘Lơ̆ng. Krao khan hăm anăn Kră Yang Yêsu Krist, Amen.
Đŏk Sơ̆p Hla bơar ‘Bok Kei-Dei lăm pêng sơnăm: I Samuel 25
Kênh Youtube BHKTHN:
