Klei Aê Diê Blŭ: Êphêsô 6:18-20
Êlan kliăng: “Leh anăn msĕ mơh wah lač kơ kâo đa, čiăng kơ Aê Diê brei kơ kâo dưi blŭ ênưih, mtô hŏng klei jhŏng klei hgăm kơ klei mrâo mrang jăk.” (Êphêsô 6:19)
Klei êmuh ksiêm mĭn: Si klei Khua ƀĭng kna Y-Pôl iêô mthưr phung đăo brei wah lač? Kơ ya mta klei ñu akâo wah lač brei kơ ñu? Hŏng ñu, ya mta klei jing yuôm hlăm bruă hiu hưn Klei Mrâo Mrang Jăk? Ya bruă brei drei ngă, tơdah thâo săng klei wah lač jing phŭn kơ klei hiu hưn Klei Mrâo Mrang Jăk?
Wah lač jing sa akŏ yuôm hlăm hră Khua ƀĭng kna Y-Pôl čih mơĭt kơ Phung Sang Aê Diê ti Êphêsô. Wăt tơdah êjai dôk hlăm war mnă ti čar Rôm, tơdah čih hră anei ñu ăt mtă nanao kơ klei wah lač. Ñu pô hŏng jih ai tiê wah lač leh kơ phung đăo hlăm lu mta bruă mdê mdê, leh anăn ară anei, ti knhal tuč hră čih, ñu bi êdah dŭm klei atăt gai leh anăn mta klei čiăng klă nik kơ klei brei diñu wah lač. Khua ƀĭng kna Y-Pôl hlăk hlê dôk hlăm klei arăng hnuh kă săng đai ƀiădah ñu amâo iêô mthưr phung anak ƀuôn sang Aê Diê ti ƀuôn Êphêsô wah lač brei kơ klei ñu pô čiăng ôh, ƀiădah ñu iêô mthưr wah lač brei kơ bruă hiu hưn Klei Mrâo Mrang Jăk. Ñu kwưh brei diñu wah lač hŏng klei myang Yang Mngăt Jăk, hŏng jih ai tiê gĭr leh anăn dôk răng, wah lač brei kơ ñu leh anăn kơ jih jang phung doh jăk, čiăng kơ Klei Mrâo Mrang Jăk Khua Yang Yêsu dưi mâo klei êngiê hiu hưn hlăm jih jang klei truh.
Wah lač jing mta klei phŭn hlăm kdrăn blah klei hdĭp myang, wăt tơdah drei mprăp ênŭm leh jih jang mnơ̆ng yua bi blah mkăn (Êphêsô 6:14-17). Wah lač jing klei yuôm mdê hĭn hlăm bruă hiu hưn Klei Mrâo Mrang Jăk, kyuadah “Drei amâo bi kdơ̆ng hŏng kđeh leh anăn êrah ôh, ƀiădah hŏng phung khua kiă kriê, hŏng phung mâo klei dưi, hŏng phung khua mtao lăn ala ênuk mmăt anei, hŏng phung yang jhat ƀai dôk hlăm jih adiê.” (Êphêsô 6:12). Wah lač brei dưm êlâo hĭn hlăm jih jang hdră mkra leh anăn bruă hiu hưn Klei Mrâo Mrang Jăk. Kƀah klei wah lač jing kƀah klei ktang myang mơ̆ng Yang Mngăt Jăk.
Khua ƀĭng kna Y-Pôl akâo kơ phung đăo wah lač brei kơ jih jang phung doh jăk leh anăn kơ ñu pô msĕ mơh, čiăng kơ Khua Yang brei kơ ñu dưi jhŏng blŭ mtô ênưih leh anăn djŏ găl hlăm jih jang klei truh (êlan 19). Brei drei wah lač čiăng kơ Klei Mrâo Mrang Jăk dưi hưn lar wăt êjai hlăm klei lông dlăng. Boh blŭ “ênưih” kñăm kơ ai tiê jhŏng leh anăn klei êngiê čiăng hiu hưn Klei Mrâo Mrang Jăk wăt tơdah arăng dôk kă Khua ƀĭng kna Y-Pôl hŏng klei săng đai hŏng lu mta klei bi kgăn (êlan 20). Ñu čiăng snăk klei wah lač brei čiăng kơ ñu dưi mâo djăp ai ktang leh anăn klei pap Khua Yang dưi “mtô hŏng klei jhŏng klei hgăm kơ klei mrâo mrang jăk” (êlan 19).
Wah lač jing mta klei phŭn leh anăn atur kơ Khua ƀĭng kna Y-Pôl leh anăn wăt kơ jih jang phung hiu hưn Klei Mrâo Mrang Jăk, čiăng mâo klei ktang myang Yang Mngăt Jăk bŏ dlai hlăm digơ̆. Klei anei brei drei ƀuh klei yuôm klei wah lač brei kơ jih jang phung dôk hiu hưn Klei Mrâo Mrang Jăk: kơ phung myơr klei hdĭp hiu mtô hưn Klei Mrâo Mrang Jăk, khua pô mtô leh anăn kơ jih jang mnuih mâo hlăm kdrêč bruă hiu hưn. Wah lač ăt jing sa hdră êlan čiăng kơ drei bi mguôp mbĭt hŏng mnuih mkăn hlăm bruă hiu hưn Klei Mrâo Mrang Jăk msĕ mơh.
Si ngă drei wah lač mơ̆ kơ bruă hiu hưn Klei Mrâo Mrang Jăk ti anôk drei dôk leh anăn kơ tar lăn ala?
Wah lač: Ơ Khua Yang, pap brei kơ kâo kyua amâo mđing uêñ ôh kơ bruă hiu hưn Klei Mrâo Mrang Jăk ti Phung Sang Aê Diê anôk kâo dôk leh anăn kơ tar ƀar lăn ala. Akâo Khua Yang brei kâo hdơr mĭn kơ phung myơr klei hdĭp hiu mtô hưn Klei Mrâo Mrang Jăk čiăng kơ kâo hŏng jih ai tiê wah lač brei kơ digơ̆. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yêrêmi 51
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
