Êphêsô 6:18-20
“Păng inh wă kơ iĕm krao khan tơgŭm inh hai mơ̆n, wă kơ inh hlôh băt dôm tơdrong Sư wă kơ inh bơtho păng wă kơ inh nuih kơ bơtho tơdrong ‘nao ‘lơ̆ng Sư.” (Êphêsô 6:19)
Nơ̆r jet tơchĕng pơwao:
– ‘Bok Pôl athei lu bơngai lui krao khan thoi yơ?
– Sư wă kơ lu bơngai lui krao khan tơgŭm sư tơdrong kiơ?
– Hăm sư kơdih, tơdrong kiơ gĭt kăl lăm tơdrong chă bơtho Tơdrong ‘Nao ‘lơ̆ng?
– Bơ̆n kăl kơ pơm kiơ kơplah băt krao khan noh tơm kăl lăm tơdrong chă bơtho?
Krao khan ‘noh kơ̆l ‘bai gĭt kăl lăm kơthơ ‘bok Pôl chih gơih ăn kơ Khul Bơngai Lui tơ pơlei Êphêsô. Mă khan sư oei lăm hnam phak tơ dêh Rôm kơplah sư chih kơthơ ‘nâu sư oei ling lang pơma kơ tơdrong krao khan. Sư adrin krao khan tơgŭm kơ lu bơngai lui lăm tôm tơdrong păng dang ei, tuch luch lăm kơthơ, sư pơma tơlĕch minh ‘bar tơdrong tơ’bôh tơbăt păng tơdrong hơpơi wă hơđăl gah dôm tơdrong lu sư kăl kơ krao khan. ‘Bok Pôl oei lăm hnam phak đe chô̆ sư hăm tơlei glang mălei sư ưh kơ đei athei lu kon pơlei Kră Yang tơ pơlei Êphêsô krao khan tơgŭm tơdrong kăl wă sư kơdih ôh mă sư wă kơ bơngai lui krao khan tơgŭm sư lăm tơdrong chă bơtho. Sư apinh wă kơ bơngai lui krao khan hăm tơdrong mơsêh Yang Bơhngol ‘Lơ̆ng, krao khan hăm jơhngơ̆m adrin tơpă păng krăng kơchăng. Krao khan kơ sư kơdih păng đĭ đăng khul bơngai lui wă kơ Tơdrong ‘Nao ‘Lơ̆ng Yêsu Krist gơh rơngei bơtho mă khan rim tơdrong hiôk ‘lơ̆ng dah ưh.
Krao khan noh tơdrong gĭt găl hloh lăm tơdrong tơblah gah bơhngol mă khan bơ̆n đei hơmet tôm tơmam tơblah nai wă tơblah gah bơhngol ră (Êphêsô 6:14-17). Krao khan noh tơdrong gĭt găl dêh lăm tơdrong chă bơtho, yua kơ “Tơdrong noh ưh kơ sĭ tơblah tơduă bơ̆n kon bơngai ôh, bơ̆n tơblah hăm lu yŏng yang kơnê̆, sư kư̆m pran mơ̆n, sư kư̆m oei tơ kơpal plĕnh ti mă tơ anih nai; sư pơgơ̆r lu bơngai oei tơ ala teh âu, lu bơngai mă oei lăm măng mu.” (Êphêsô 6:12). Krao khan kăl kơ ‘măn adrol hloh kơ dôm tơdrong wă jang păng tơdrong jang chă bơtho. Krao khan ưh kơ tôm mah noh ưh kơ đei jơhngơ̆m pran đơ̆ng Yang Bơhngol ‘Lơ̆ng.
‘Bok Pôl apinh bơngai lui krao khan tơgŭm kơ bơngai chă năm bơtho păng kơdih sư wă kơ Kră Yang ăn kơ lu sư nơ̆r pơma trŏ păng yua iŏk trŏ kơ tơdrong (trong 19). Bơ̆n kăl kơ krao khan wă kơ Tơdrong ‘Nao ‘Lơ̆ng gơh ră roi mă khan đei tơbơ̆p tơdrong pơlong. Nơ̆r “Pơ̆n nuih” pơma hơđăl kơ jơhngơ̆m pơ̆n nuih păng tơdrong rơngei wă chă bơtho Tơdrong ‘Nao ‘Lơ̆ng wă khan ‘bok Pôl đe oei chô̆ sư tơ lăm hnam phak păng lơ tơdrong pơgăn (trong 20). Sư kăl dêh kơ tơdrong krao khan tang wă kơ đei jơhngơ̆m pran păng đei Kră Yang mơnat na “bơtho Tơdrong ‘Nao ‘Lơ̆ng Sư” (trong 19).
Krao khan ‘noh tơm kăl păng hơnă tơm hăm ‘bok Pôl kư̆m thoi đĭ đăng lu bơngai chă bơtho wă kơ tơdrong mơsêh Yang Bơhngol ‘Lơ̆ng ‘bĕnh blai lăm lu sư. Tơdrong ‘nâu tơbăt ăn kơ bơ̆n ‘bôh tơdrong gĭt kăl lăm tơdrong krao khan tang kơ đĭ đăng bơngai chă bơtho Tơdrong ‘Nao ‘Lơ̆ng: Lu bơngai bơtho pơyơ̆r akâu jăn kơdih năm bơtho Tơdrong ‘Nao ‘Lơ̆ng, ‘bok bơtho păng lu bơngai jang tơdrong jang chă bơtho. Krao khan noh kư̆m trong wă kơ bơ̆n pôm ‘bơ̆r đon hăm bơngai nai lăm tơdrong chă bơtho Tơdrong ‘Nao ‘Lơ̆ng.
Ơ Kră Yang, apinh Ih mơnat kơ inh rơdu ưh kơ hiơ̆k đơ̆ng kơdih akâu inh lăm tơdrong jang chă ră roi bơtho kơ khul bơngai lui lăm pơlei kơdih păng jơ̆p kơ teh đak. Apinh Ih ăn kơ inh ‘blŏk kơ lu bơngai bơtho, lu bơngai chă ră roi na đĭ jơhngơ̆m krao khan tang lu sư. Krao khan yua anăn Kră Yang Yêsu Krist, Amen.
Bơ̆n hăm krao khan tơgŭm kơ tơdrong jang chă bơtho tơ pơlei kơdih păng jơ̆p lăm teh đak ưh?
Đŏk Sơ̆p Hla bơar ‘Bok Kei-Dei lăm pêng sơnăm: Jêrêmi 51
Kênh Youtube BHKTHN:
https://www.youtube.com/c/bhkthn
