Klei Aê Diê Blŭ: Y-Philêmôn êlan 4-7
Êlan kliăng: “Kâo bi mni kơ Aê Diê kâo nanao tơdah kâo hdơr kơ ih êjai kâo wah lač” (Y-Philêmôn êlan 4)
Klei êmuh ksiêm mĭn: Ya klei Khua ƀĭng kna Y-Pôl bi mni kơ Aê Diê tơdah wah lač kơ Y-Philêmôn? Ya klei ñu akâo kơ Aê Diê brei kơ Y-Philêmôn? Si klei mđĭ ai drei kơ ai tiê bi wah lač brei hdơ̆ng pô?
Grăp blư̆ lač kơ Y-Philêmôn hlăm klei wah lač, Khua ƀĭng kna Y-Pôl amâo mdei ôh bi mni kơ Aê Diê “kyuadah kâo hmư̆ leh kơ klei ih khăp kơ jih jang phung doh jăk leh anăn kơ klei ih đăo kơ Khua Yang Yêsu” (êlan 5). Khua ƀĭng kna Y-Pôl hmư̆ dua klei jăk jing klei khăp leh anăn klei đăo Y-Philêmôn: Tal sa, klei khăp ñu mđing kơ phung đăo mkăn. Tal dua, klei đăo ñu mđing kơ Khua Yang Yêsu. Y-Philêmôn mbĭt hŏng gŏ sang pô pŏk ai tiê đru Phung Sang Aê Diê, klei anăn brei ƀuh klei khăp leh anăn klei đăo ñu bi mguôp kjăp. Klei hdĭp Y-Philêmôn bi hmô ăt jing klei brei drei ksiêm mĭn kơ drei pô. Klei hdĭp bi hmô anăn lar amâo djŏ hlăm Phung Sang Aê Diê ôh ƀiădah truh wăt hŏng Khua ƀĭng kna Y-Pôl dôk hlăm mnă! Klei hdĭp grăp čô drei bi hmô lar jing klei bi hmô jăk amâodah jhat?
Êngao anăn, yang đar Khua ƀĭng kna Y-Pôl mñă kơ klei đăo êlâo kơ klei khăp. Ƀiădah tinei, klei ñu mđing jing hlăm klei khăp Y-Philêmôn (êlan 7). Klei anei brei ƀuh Khua ƀĭng kna Y-Pôl mđing akâo kơ Khua Yang ngă kơ klei khăp êbeh dlai Y-Philêmôn atăt ñu truh kơ klei pap brei, leh anăn jum pô hlŭn Y-Ônêsim msĕ si ayŏng adei hlăm klei đăo. Klei khăp leh anăn klei đăo yơh srăng đru ñu ƀrư̆ thâo săng hĭn, leh anăn mgei ai tiê êlam snăk kơ djăp klei jăk mơak Aê Diê brei.
Khua ƀĭng kna Y-Pôl wah lač “Kâo wah lač čiăng kơ mơ̆ng klei ih kah mbha klei đăo dưi bi mđĭ klei thâo săng kơ jih klei jăk drei mâo leh hlăm Krist” (êlan 6). Hlăm klei đăo mbĭt kơ Khua Yang Yêsu Krist, ñu akâo kơ Khua Yang brei klei ktang kơ Y-Philiêmôn leh anăn phung sĭt suôr mjing klei đăo hlăm Khua Yang jing bruă ngă klă klơ̆ng mơ̆ng klei khăp, đru kơ grăp čô mnuih thâo kơ Anăn Khua Yang.
Klei Khua ƀĭng kna Y-Pôl wah lač mđĭ ai drei hdơr bi wah lač hdơ̆ng pô (êlan 4). Brei wah lač nanao akâo Aê Diê pap brei čiăng klei đăo ayŏng adei pô srăng jing bruă ngă klei khăp. Akâo kơ Aê Diê brei kơ ayŏng adei hlăm Khua Yang srăng lŏ bi mrâo klei bi mguôp kruh leh, jih ai tiê đru hdơ̆ng pô mơ̆ng klei đăo truh kơ asei mlei. Khua ƀĭng kna Y-Pôl lač leh hŏng Y-Philêmôn snei, “Sĭt nik, ơ adei kâo, kâo mâo lu klei mơak leh anăn klei bi juh mơ̆ng klei ih khăp, kyuadah ai tiê phung doh jăk mâo klei bi mđĭ ai kyua ih” (êlan 7). Ai tiê klei mĭn bi wah lač brei hdơ̆ng pô leh anăn bi khăp ba nanao klei bi mđĭ ai kơ drei hlăm sang mnă knap mñai êăt hriêt truh kơ jih jang phung ƀuôn sang Aê Diê. Akâo kơ knuih hdĭp grăp čô drei ăt ba nanao klei bi mđĭ ai hdơ̆ng pô.
Kơ hlei pô drei mphŭn wah lač leh anăn kơ ya klei hlăm hruê anei mtam?
Wah lač: Ơ Khua Yang, akâo kơ Ih đru kâo bi êdah klei đăo hŏng klei khăp klă klơ̆ng. Akâo kơ Ih đru kâo mâo klei pap, srăng đru kơ pô mkăn leh anăn hdơr nanao, bi wah lač brei hdơ̆ng pô, ba klei mđĭ ai, bi juh hdơ̆ng pô hlăm djăp boh klei. Kâo wah lač hlăm anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsai 29
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
