Filemoos 4-7
Nqe cim:
“Filemoos, txhua zaug uas kuv thov Vajtswv, kuv thov Vajtswv pab koj thiab kuv ua kuv tus Vajtswv tsaug.” (Filemoos 4)
Lus nug rau sawvdaws xav:
- Timthawj Paulus ua Vajtswv tsaug txog yam dabtsi thaum nws thov Vajtswv rau Filemoos?
- Nws thov Vajtswv pab yam dabtsi rau Filemoos?
- Peb yuav tsum ua li cas thiaj txhawb tau peb cov kwvtij hauv kev thov Vajtswv sib pab?
Txhua zaus hais txog Filimoos hauv kev thov Vajtswv, Timthawj Paulus yeej ua Vajtswv tsaug tsis tseg vim nws hnov xov hais tias Filemoos “muab siab rau ntseeg peb tus Tswv Yexus” thiab “hlub cov ntseeg Vajtswv heev” (nqe 5). Timthawj Paulus hnov xov txog ob yam zoo ntawm Filemoos uas yog kev hlub thiab kev ntseeg: Qhov xub thawj, nws muaj kev hlub rau nws cov kwvtij ntseeg. Qhov ob, nws muaj kev ntseeg ruaj khov rau Tswv Yexus. Filemoos thiab nws tsev neeg qhib lawv lub siab los pab cov ntseeg, qhov ntawd qhia pom hais tias nws txojkev hlub thiab kev ntseeg yeej mus ua ke. Filemoos lub neej yog ib tug qauv zoo rau peb xyaum. Lub neej ntawd tsis yog tsuas ncha tawm hauv Pawg Ntseeg xwb tiamsis tseem ncha mus txog Timthawj Paulus hauv tsev lojcuj thiab! Peb lubneej ncha tawm yog qauv zoo lossis qauv phem?
Tsis tas li ntawd xwb, txhua zaus Timthawj Paulus pheej hais txog kev ntseeg ua ntej kev hlub. Tiamsis nyob ntawm no, nws hais txog kev hlub ua ntej kev ntseeg (nqe 7). Qhov no qhia tau hais tias Timthawj Paulus xav kom Filemoos muab nws txojkev hlub dav los zam txim thiab rov qab txais yuav tus qhev Auneximus zoo li ib tug kwvtij ntseeg. Los ntawm txojkev hlub thiab kev ntseeg yuav pab kom nws yim nkag siab tob heev dua txog tej koob hmoov uas Vajtswv pub. Timthawj Paulus thov Vajtswv hais tias: “Koj thiab wb puavleej yog tus ntseeg thiab nrog Yexus Khetos sib raug zoo. Yog li ntawd kuv thov Vajtswv pab peb cov uas ntseeg Yexus Khetos, kom peb paub tej uas Vajtswv qhia rau peb heev zuj zus ntxiv” (nqe 6). Nyob hauv tib txojkev ntseeg Tswv Yexus, Timthawj Paulus thov Vajtswv pab kom Filemoos thiab cov ntseeg muab lawv txojkev ntseeg hloov mus ua tej haujlwm qhia tshwm kev hlub thiab ua rau lwm tus paub txog Vajtswv lub npe.
Timthawj Paulus tej lus thov Vajtswv txhawb peb lub zog yuav tsum nco ntsoov thov Vajtswv sib pab (nqe 4). Peb cia li thov Vajtswv pub koob hmoov kom peb cov kwvtij txojkev ntseeg hloov los ua tes haujlwm sib hlub. Thov Vajtswv pab kom peb cov kwvtij ntseeg txaus siab txhim kho tej kev tsis sib haum, tas siab ntsws sib pab txij li sab ntsujplig mus txog sab nqaij tawv. Timthawj Paulus hais rau Filemoos tias hais: “Tus kwv, qhov uas koj muaj lub siab hlub cov ntseeg Vajtswv, thiab koj tau txhawb lawv txhua tus lub zog, qhov ntawd txhawb tau kuv lub zog thiab ua rau kuv zoo siab kawg li” (nqe 7). Kev thov Vajtswv sib pab thiab txojkev sib hlub yuav ua rau peb sov siab txij tsev lojcuj txias toos mus txog rau txhua tus ntseeg. Thov kom peb txhua tus muaj lub neej ua rau sawvdaws sov siab.
Thov Vajtswv,
Tus Tswv, thov Koj pab kom nyuam yaus qhia tshwm kev ntseeg los ntawm txojkev hlub tiag tiag. Thov Koj pub nyuam yaus muaj lub siab zam txim, txaus siab hlo pab lwm tus, thiab niaj hnub nco txog, thov Vajtswv sib pab, sib txhawb zog txhua lub tsamthawj. Nyuam yaus tuav Yexus Khetos lub npe thov, Amees.
Hnub no, peb yuav thov Vajtswv rau leejtwg thiab thov txog yam dabtsi?
Nyeem Vajluskub hauv peb lub xyoos: Yaxayas 29.
Kênh Youtube BHKTHN:
