Mathiơ 19:1-6
Trong tơm: “Bre sư ưh pă thoi ‘bar ‘nu bơngai boih, bre sư thoi minh ‘nu bơngai đĕch. Yua kơ thoi noh na kon bơngai bơ̆n ưh kơ gơh achăng lê̆ akăn sư ôh, yua kơ ‘Bok Kei-Dei pơgơ̆p bre sư jing klo kăn boih.”
(Mathiơ 19:6)
Nơ̆r jet tơchĕng pơwao:
– Lu bơngai Pharisi năm chă păng jet Kră Yang Yêsu gah tơdrong chă klokăn hăm tơdrong kơnhăm tơdrong kiơ?
– Kră Yang Yêsu tơl nơ̆r lu bơngai pharisi âu thoi yơ?
– Lu bơ̆n hŏk iŏk tơdrong đơ̆ng lăm gah tơdrong gĭt găl lăm ŭnh om?
Mathiơ chăl 19 đei tơdra minh chăl ‘nao lăm tơdrong jang Kră Yang Yêsu. Đơ̆ng rŏng kơ noh loi ‘bar jĭt sơnăm đei bơtho tơ dêh Galilê, jơ ‘nâu Kră Yang pơtơm bơ̆jang tơ dêh Juđê, blŭng a pah to krong Jôrđăn. Lơ bơngai tơ kan chă Kră Yang. Sư ling lang bơtho păng pơklaih tơdrong jĭ lu sư (trong 1-2). Lu bơngai pharisi kư̆m năm wă pơlong Kră Yang kơplah sư jet Kră Yang hăm nơ̆r jet mă hơnat. “Kiơ̆ kơ tơdrong juăt bơ̆n, achăng akăn tơdrong kiơ kư̆m bưh dah thoi yơ?” (trong 3). Tơdrong lu sư jet noh kơnhăm thoi hơđong kap ‘leh nơ̆r Kră Yang kơplah tơ’bơ̆p tơm măt lu sư lăm tơdrong juăt Môis bơngai mă lu kon pơlei Isơrael lui yom.
Kră Yang Yêsu ưh kơ thar tơl lu sư, mă-lei sư tơ’blŏk kơ lu bơngai pharisi gah tơdrong Kră Yang wă blŭng a sơ̆ pơjing minh ‘nu drŏnglo, minh ‘nu drŏkăn, bre sư jing minh akar, thoi noh kon bơngai bơ̆n ưh kơ gơh achăng lê̆ akăn sư ôh. Mă mônh, ŭnh om ‘noh đơ̆ng Kră Yang pơgơ̆p đơ̆ng lăp minh ‘nu drŏnglo, minh ‘nu drŏkăn, pơma ‘bơm truh tơdrong gĭt yom dêh gơh kơjăp ling lang. Mă ‘bar, bơngai drŏnglo tơklah đơ̆ng mĕ ‘bă sư, na “oei hơdai” hăm akăn sư pơma kơ tơklep kơjăp thoi đak hang pơklep bre sư, ưh pă gơh tơklah. Mă pêng, bre sư jing “minh sĕch minh akar” pơma ‘bơm tơdrong pơjao dih băl lăm tơdrong arih gah bơhngol, lăm jơhngơ̆m đon dih băl lăm tơdrong arih gah bơhngol, lăm jơhngơ̆m păng gah akâu akar. Thoi noh, kơplah lu bơ̆n bơwei rong gah ŭnh om klokăn lu bơ̆n. Kră Yang Yêsu pơma tơpăt tơdrong sĭt tơpăt gah ŭnh om: “Kon bơngai bơ̆n” wă khan mă bu bu, mă lăm bre klo, kăn ưh kơ gơh tơklah dih băl yua kơ đơ̆ng Kră Yang ‘Bok Kei-Dei pơgơ̆p bơih.
Tơdrong arih lăm teh đak dang ei lăng tơdrong ŭnh om hơi đĕch ưh kơ gĭt ôh, lơ bơngai tơchĕng dêh tơdrong arih wă kơ đei mŭk tơmam, mơdrŏng noh hiôk lăp đon kiơ̆ kơ tơdrong sĕch akar, arih hơdai ưh kơ kăl et sa klokăn, dah chă klokăn tơduă drŏnglo, drŏkăn.v.v., mưh hưch wă jơ̆ oei hơdai, mưh ưh jơ̆ achăng, ưh kơ đei kiơ gơh pơgăn. Tơdrong lăm pơlei pơla lăng tơdrong ŭnh om hơi dêh ưh kơ gĭt, bơngai lui athei gơnang kơ Kră Yang lăng tơdrong gĭt yom lăm ŭnh om. Kiơ̆ thoi nơ̆r Kră Yang bơtho pơkă. Klokăn lăm khul bơngai lui ‘noh jơ̆ tơdrong pơgơ̆p đơ̆ng minh ‘nu drŏnglo, minh ‘nu drŏkăn, lu bơngai bu wă chă ŭnh om ‘mêm băl đĭ chăl arih, minh jơhngơ̆m gah bơhngol, lăm jơhngơ̆m păng gah sĕch akar. Tơdrong khul bơngai lui athei pơm ‘noh wă ư-ang anăn Kră Yang đơ̆ng lăm hnam dơnŏ bơ̆n. Lu bơ̆n pơm tơ’bôh tơdrong gĭt yom lăm ŭnh om mă tơpă, bơwei tơdrong ‘mêm mơnat, hơmet dih băl năr đei tơdrong ưh kơ ‘lơ̆ng dih băl, đei hơtŭt dih băl mă ‘lơ̆ng păng ưh kơ layơ wă achăng dih băl.
Lu bơ̆n hăm pơm tơ’bôh tơdrong ư-ang anăn Kră Yang đơ̆ng tơdrong arih lăm ŭnh om bơ̆n ưh?
Ơ Kră Yang, jơ̆ Tơ’ngla mă pơgơ̆p ŭnh om blŭng a kơ kon bơngai. Apinh Ih tơgŭm inh arih ư-ang anăn Ih lăm tơdrong hưch ‘mêm kơ ŭnh om inh. Wă kơ hnam dơnŏ inh ‘mêm kơ Ih păng ‘mêm băl tơduă wă pơm tơ’bôh tơdrong gĭt yom lăm ŭnh om kơ lơ bơngai. Yua anăn Kră Yang Yêsu Krist, Amen.
Đŏk Sơ̆p Hla bơar ‘Bok Kei-Dei lăm pêng sơnăm: I Samuel 16
Kênh Youtube BHKTHN:
