Lukas 10:38-42
Nqe cim:
“Mathas muaj ib tug niam hluas hu ua Malis, Malis zaum ntawm Yexus kotaw thiab mloog Yexus qhia” (Lukas 10:39).
Lus nug sawvdaws xav:
- Tswv Yexus thiab Nws cov thwjtim mus rau hauv leejtwg tsev?
- Mathas thiab Malis nkawd ob vivncaus ua licas? Tswv Yexus hais licas rau Mathas?
- Peb tseg sijhawm npaj rau sab ntsujplig licas lawm?
Thaum nyeem cov phau Txojmoo Zoo, peb pom tus Tswv ua phoojywg nrog ib tsev neeg yog peb nus muag hu ua Laxalaus, Mathas thiab Malis nyob ntawm lub zos Npethanis (Yauhas 12:1-2). Thaum muaj sijhawm dhau kev, Tswv Yexus thiab Nws cov thwjtim pheej los saib lawv tsev neeg ntawd. Tus sau phau Lukas hais txog Mathas tau txais tos Tswv Yexus los hauv lawv tsev thaum Yexus tuaj txog hauv zos Npethanis (nqe 38).
Thaum Tswv Yexus thiab nws cov thwjtim los hauv Mathas tsev lawm, Mathas maj mus txhawj pluas noj haus los tiam sawvdaws (nqe 40), tiamsis Malis “zaum ntawm Yexus kotaw thiab mloog Yexus qhia” (nqe 39). Malis muaj tswvyim xaiv yam zoo tshaj nws tus niam laus, nws paub siv lub sijhawm tau ntsib tus Tswv los mloog tus Tswv qhia. Malis paub tseg sijhawm tseemceeb nrog tus Tswv thaum tus Tswv tuaj xyuas, paub tseg sijhawm los zaum “mloog Yexus qhia” tsis cia ib yam dabtsis tab kaum nws. Tswv Yexus hais tias: “Tsis yog mov xwb thiaj cawm tau neeg txoj sia, tiamsis yog Vajtswv Txojlus txhua lo thiaj cawm tau” (Mathais 4:4). Vajtswv Txojlus yog zaub mov yug sab ntsujplig, thiab sijhawm los nyob ntawm Yexus kotaw mloog Nws tej lus qhia muaj nqis heev rau kev nrog tus Tswv sib raug zoo. Malis muaj tswvyim npaj yam zoo heev rau nws sab ntsujplig.
Thaum Malis zaum mloog Yexus qhia, Mathas muaj haujlwm ntau heev, thiaj tseg tsis tau sijhawm los mloog tus Tswv qhia. Vim tej haujlwm ntau thiaj ua rau Mathas ntxhov siab thiab chim. Mathas khib rau nws tus niamhluas thiab tseem hais yuam Tswv Yexus hais kom Malis pab nws ua haujlwm (nqe 40). Tswv Yexus qhia rau Mathas hais tias, yam uas tseemceeb Malis twb nrhiav tau lawm. Yam uas muaj nqis tshaj thiab tseemceeb heev hauv lubneej yog tseg sijhawm los nyob ntawm tus Tswv kotaw, sib txuas nrog tus Tswv thiab mloog Nws tej lus qhia (nqe 41-42).
Kev ua tus Tswv haujlwm yog qhov zoo, tiamsis ua haujlwm los ntawm tus Tswv siabnyiam thiab ua raws li yus lub zog xwb, tsis yog “txhawj thiab ntxhov siab rau ntau yam haujlwm”. Tswv Yexus qhia hais tias: “Tiamsis nej yuav tsum xub nrhiav Vajtswv lub tebchaws thiab ua raws li Vajtswv lub siabnyiam tso, Vajtswv mam muab tej no ntxiv rau nej” (Mathais 6:33). Vajtswv xav kom nws tej menyuam yuav tsum xub nrhiav Vajtswv thiab yam uas Vajtswv nyiam ua ntej. Thaum ua li ntawd lawm, peb thiaj paub ua haujlwm haum Vajtswv siab thiab tau Vajtswv ntxiv dag zog. Niaj hnub nimno kuj muaj qee tus ntseeg zoo li Mathas, tsuas txhawj rau ntau yam haujlwm, tsis nco txog yam tseemceeb thiab tsis tseg sijhawm los sib txuas nrog Vajtswv ntawm kev kawm Vajtswv Txojlus.
Thov Vajtswv,
Tus Tswv, thov Koj zam txim rau nyuam yaus, vim tej zaum siv zog ua haujlwm tiamsis tsis tseg sijhawm los nrog Koj sib txuas. Thov pab nyuam yaus paub tseg sijhawm los nrog Koj sib txuas kom muaj lubneej zoo haum Koj siab. Amees.
Peb puas tseg sijhawm tshwjxeeb los nrog tus Tswv sib raug zoo lawm tau?
Nyeem Vajluskub hauv peb lub xyoo: Exekees 27:1-27
Kênh Youtube BHKTHN:
