Klei Aê Diê Blŭ: Y-Luk 10:38-42.
Êlan kliăng: “Gơ̆ mâo sa čô adei mniê bi anăn H’Mari. H’Mari dôk gŭ ti jơ̆ng Khua Yang čiăng hmư̆ klei Ñu mtô.” (Y-Luk 10:39).
Klei êmuh ksiêm mĭn: Hlei pô sang Khua Yang Yêsu leh anăn phung ƀĭng kna weh mŭt čhưn? Ya klei H’Mart leh anăn H’Mari ngă leh? Ya klei Khua Yang lač kơ H’Mart? Si drei duh êlâo hĭn hŏng klei thâo mĭn kơ mngăt ai tiê drei?
Răk dlăng dŭm hdruôm hră Klei Mrâo Mrang Jăk, drei thâo Khua Yang Yêsu sŭk suôr hŏng sa gŏ sang hdĭp ti ƀuôn Ƀêthani mâo tlâo čô ayŏng adei: Y-Lazar, H’Mart leh anăn H’Mari (Y-Yôhan 12:1-2). Khua Yang leh anăn phung ƀĭng kna khăng weh čuă diñu tơdah mâo mmông găl găn ti ƀuôn anei. Tinei, pô čih hră Y-Luk brei thâo H’Mart jum drông leh Khua Yang mŭt hlăm sang ñu hlăk Khua Yang hriê ti ƀuôn Ƀêthani (êlan 38).
Hlăk Khua Yang Yêsu mbĭt hŏng phung ƀĭng kna mŭt hlăm sang, H’Mart gun kpăk hŏng bruă mkra duh mnơ̆ng ƀơ̆ng huă (êlan 40), êjai anăn H’Mari “dôk gŭ ti jơ̆ng Khua Yang čiăng hmư̆ klei Ñu mtô” (êlan 39). H’Mari mâo leh klei čuăn ruah mdê hŏng amai ñu, ñu mă yua mnĭt mmông Khua Yang hriê kơ sang čiăng êlâo hĭn mđing hmư̆ klei Khua Yang mtô. Hŏng H’Mari, klei anăn yơh jing yuôm hĭn hlăm mmông Khua Yang hriê čuă čhưn. Ñu thâo kral hnơ̆ng yuôm leh anăn klei tŭ dưn kơ bruă “hmư̆ klei Ñu mtô” snăn ñu pioh kluôm jih mmông anăn čiăng mđing hmư̆ klei mtô lač mơ̆ng sa čô tue yuôm bhăn mdê kơ gŏ sang ñu. Khua Yang Yêsu pô tuôm lač mơh: “Mnuih hdĭp amâo djŏ knŏng hŏng kpŭng ôh, ƀiădah kyua jih klei blŭ kbiă mơ̆ng ƀăng êgei Aê Diê.” (Y-Mathiơ 4:4). Klei Aê Diê Blŭ jing mnơ̆ng ƀơ̆ng huă čiêm rông kơ klei hdĭp mngăt, leh anăn mmông dôk mbĭt hŏng Khua Yang jing mmông yuôm bhăn čiăng mkŏ mjing klei bi mguôp hŏng Ñu. H’Mari duh leh bŏ hŏng klei thâo mĭn kơ mngăt ai tiê ñu.
Êjai H’Mari dôk gŭ hmư̆ Klei Khua Yang Blŭ, ƀiădah H’Mart “mâo klei mnhĭt kyua lu bruă” bi luč hĕ mnĭt mmông yuôm bhăn dôk mbĭt hŏng Khua Yang. Kyua klei gun kpăk lu bruă đei ngă kơ ñu suăi êmăn leh anăn mnhĭt prah. Ñu nač hŏng adei ñu leh anăn nao ƀuah Khua Yang si ngă amâo uêñ kơ adei mniê ñu amâo đru ñu ôh (êlan 40). Khua Yang Yêsu mtô lač kơ H’Mart brei thâo ƀuh ya klei jing yuôm hĭn leh anăn adei ñu ruah leh kdrêč jăk hĭn. Mta klei čiăng yuôm hĭn leh anăn jăk hĭn kơ klei hdĭp jing pioh mmông dôk mbĭt hŏng Khua Yang, bi mguôp hŏng Khua Yang leh anăn hmư̆ klei Ñu mtô lač (êlan 41-42).
Ngă bruă kơ Khua Yang jing bruă jăk leh anăn amâo dưi kƀah ôh, ƀiădah brei ngă bruă tui si klei Khua Yang ciăng leh anăn tui si hnơ̆ng ai ktang drei, amâo djŏ “mnhĭt kyua lu bruă”. Khua Yang Yêsu mtô leh: “Ƀiădah brei diih duah êlâo hĭn ƀuôn ala mtao Aê Diê leh anăn klei kpă ênô Ñu, leh anăn Ñu srăng thiăm brei kơ diih jih jang mnơ̆ng mkăn” (Y-Mathiơ 6:33). Khua Yang čiăng kơ phung anak ñu êlâo hĭn brei dưm bruă tui duah Aê Diê êlâo hĭn leh anăn thâo kral klei Khua Yang čiăng. Mơ̆ng anăn kơh drei dưi ngă bruă kơ Khua Yang mâo boh tŭ dưn hlăm klei Khua Yang atăt gai leh anăn lŏ thiăm ai ktang mơ̆ng Khua Yang. Hruê anei, mâo lu phung đăo msĕ si H’Mart mơh, rŭng hŏng lu mta bruă ƀiădah phưi lui hĕ klei yuôm leh anăn klei jăk hĭn, jing pioh mmông duh kơ klei bi mguôp hŏng Khua Yang leh anăn ksiêm hriăm Klei Aê Diê Blŭ.
Si ngă êlâo hĭn kơ jih jang bruă drei pioh mmông kơ Khua Yang mơ̆?
Ơ Khua Yang, akâo Ih pap brei kơ kâo kyuadah lu blư̆ kâo rŭng hŏng bruă knuă ƀiădah kƀah klei bi mguôp hŏng Khua Yang. Akâo Ih đru kâo hriăm mjuăt kâo pô hlăm klei êlâo hĭn pioh mmông bi mguôp hŏng Khua Yang čiăng kơ kâo dưi hdĭp bi mơak kơ Khua Yang nanao.
Dlăng Klei Aê Diê Blŭ hlăm tlâo thŭn: Y-Êsêkiêl 27:1-27
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
