Klei Aê Diê Blŭ: Klei Mphŭn Dơ̆ng: 12:4-9
Êlan kliăng: “Hlăk anăn phung Kanaan dôk hlăm čar anăn” (Klei Mphŭn Dơ̆ng: 12:6b)
Klei Êmuh ksiêm mĭn: Si Y-Abram wĭt lač leh kơ asăp Aê Diê iêô? Ya klei mâo tơdah ñu truh ti krĭng Kanaan? Ya klei Aê Diê ngă leh kơ ñu leh anăn si boh tŭ klei anăn ba leh? Si klei hriăm mtrŭt drei tơdah tuôm hŏng klei dleh dlan kyua gưt asăp Aê Diê?
Khua Yang iêô leh Y-Abram đuĕ mơ̆ng anôk dôk mưng leh čiăng truh ti krĭng lăn mrâo. Wăt tơdah klei iêô anăn jing srăng đuĕ mơ̆ng krĭng êđăp ênang pô leh anăn tuôm hŏng êdei anăp amâo hơĭt ôh, ƀiădah Y-Abram gưt asăp leh: “Y-Abram đuĕ nao tui si Khua Yang lač leh kơ ñu” (êlan 4).
Y-Abram ba gŏ sang ñu truh ti krĭng Kanaan. Diñu “găn čar anăn” (êlan 6), jing nao djăp krĭng. Anei jing krĭng Aê Diê ƀuăn “Kâo srăng ktrâo kơ ih”. Anei jing klei Aê Diê ƀuăn leh “Kâo srăng brei ih jing sa găp djuê prŏng”. Tơdah hmư̆ klei Aê Diê ƀuăn, Y-Abram bi mĭn krĭng anăn srăng jing anôk ñu dưi mkŏ mjing sa ƀuôn ala mtao mrâo. Ƀiădah leh ksiêm dlăng kluôm krĭng, Y-Abram tuôm hŏng sa klei mâo: “Hlăk anăn phung Kanaan dôk hlăm čar anăn” (êlan 6), jing krĭng Kanaan mâo khua leh. Klei Y-Abram čang hmăng jing srăng truh ti sa krĭng anôk pô dưi mkŏ mjing ƀuôn ala mtao, ƀiădah krĭng anăn jing dŏ pô mkăn leh. Năng ai leh ƀuh klei anei, ñu luč leh klei čang hmăng.
Hlăm boh klei anăn, Aê Diê bi êdah leh anăn lŏ bi mklă klei Ñu ƀuăn leh kơ Y-Abram: “Kâo srăng brei čar anei kơ phung anak čô ih” (êlan 7). Hlăm jih êlan gŏ sang Y-Abram nao mơ̆ng Haran truh ti Kanaan, drei amâo ƀuh lač kơ bruă Aê Diê bi êdah hŏng ñu amâodah hơăi. Ƀiădah leh tuôm hŏng klei lông dlăng, krĭng lăn ƀuăn amâo msĕ si klei ƀuăn ôh, ñu ƀuh klei Aê Diê bi êdah leh anăn ƀuăn rơ̆ng. Boh tŭ jing Y-Abram kkuh mpŭ kơ Aê Diê: “Snăn tinăn ñu mdơ̆ng sa boh knưl ngă yang kơ Khua Yang, pô bi êdah leh kơ ñu” (êlan 7).
Êbat hlue si asăp Khua Yang iêô amâo djŏ ôh jing drei srăng ƀuh boh tŭ msĕ si klei čang hmăng, ƀuh klei Aê Diê ƀuăn truh mtam. Lu blư̆ drei srăng tuôm hŏng lu boh sĭt dleh dlan. Năng ai tơdah gưt asăp Aê Diê čiăng hngah kơ klei mplư hlăm klei mnia blei, drei srăng luč prăk hrui wĭt. Tơdah amâo mplư hlăm klei bi lông, drei srăng mâo puăng ƀiă. Tơdah hdĭp hlue si mtô hlăm Klei Aê Diê Blŭ, drei srăng tŭ klei arăng bi ktlah drei hjăn, ñĕ đuĕ… Hlăm boh klei anăn, ênưih snăk drei luč klei čang hmăng. Ƀiădah klă sĭt Aê Diê amâo lui ôh mnuih sĭt suôr. Ñu srăng bi êdah, leh anăn drei srăng kkuh mpŭ, mpŭ mni Anăn Pô dôk mbĭt nanao hŏng drei.
Drei ƀuăn rơ̆ng dôk sĭt suôr nanao hŏng Aê Diê wăt tơdah tlă anăp hŏng lu klei amâo msĕ si pô čang hmăng ôh tơdah gưt asăp Aê Diê mơ̆?
Wah lač: Ơ Khua Yang, kâo bi mni kơ Ih kyua Ih ăt dôk mbĭt nanao hŏng kâo wăt kâo ƀuh amâodah hơăi. Akâo kơ Ih đru kâo đăo knang leh anăn gưt asăp êbat hlue si klei Khua Yang iêô. Tơdah tlă anăp hŏng klei dleh dlan, akâo kơ Khua Yang bi juh kâo leh anăn đru kâo dôk kjăp nanao. Ƀuăn jih klei hdĭp kâo srăng kkuh mpŭ leh anăn mpŭ mni Anăn Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: H’Êsther 8
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
