Tơdrong Pơđơ̆k 24:19-20
“’Nĕ kơ ơh lăng lu bơngai kơnê̆; Lê̆ kơ klai areh lu bơngai pơm kơnê̆ ‘mê̆ ‘brư̆; 20 Yua kơ bơngai pơm kơnê̆ ưh kơ lê̆ đunh ôh, Ŭnh kơđeng hu sư gô păt.” (Tơdrong Pơđơ̆k 24:19-20)
Nơ̆r jet tơchĕng pơwao:
– Yua kơ kiơ ‘nĕ kơ ơh klai hăm lu bơngai kơnê̆?
– Lĕch đơ̆ng bơngai pơm kơnê̆ noh thoi yơ?
– Bơ̆n kăl kơ pơgơ̆t tơdrong ơh klai lu bơ̆n thoi yơ?
Lăm Tơdrong Pơđơ̆k 23:17, Pơtao Sôlômôn bơtho kon: “‘Nê̆ ăn jơhngơ̆m ih arih ‘ngeng kơ lu bơngai yoch” păng anih ‘nâu sư pơma pơtrơp dơ̆ng, “‘Nĕ kơ ơh klai kơ lu bơngai kơnê̆”. Kơtơ̆ng ‘măng bruh, lu đe bu ‘maih arih ‘lơ̆ng tơpăt ưh kơ lăp đon kơ nơ̆r bơtho âu yua kơ bơngai bơtho âu nhen thoi lăp đon kơ tơdrong pơm kơnê̆ dah lu sư dang lăp đon kơ tơdrong pơm yoch. Păng thoi noh ưh kơ phara kiơ kơ năm tơplơ̆ kơ tơdrong ‘lơ̆ng tơpăt ‘Bok Kei-Dei! Mă-lei yua kơ kiơ Pơtao Sôlômôn bơtho hơlơ̆k hơle lơ wơ̆t ‘nĕ kơ ơh klai? Yua kơ ơh klai mơn ưh kơ hiôk wă tơ’bôh tơdrong ưh kơ kĕ pơm ‘lơ̆ng ,ưh kơ yua kiơ kư̆m ưh kơ mah kăl ôh, phŏ kơnh pơrăm kơdih akâu mơ̆n. Nơ̆r “‘nĕ kơ ơh klai” lăm nơ̆r tơm Hêbrơ wă khan ‘nĕ kơ soh chhông ‘nĕ kơ pơchŭt, ‘nĕ kơ athei dah pă kĕ chơ̆n. Pơma pha ‘biơ̆, ‘nĕ ăn mơn ơh klai pơm kơ jơhngơ̆m ưh kơ hiôk, pơm kơ bơ̆n blĕk rai dêh, jơhngơ̆m ‘maih pơm rai pran go ba bơ̆n năm tơdrong pơm yoch rơih iŏk pơm kơnê̆ kiơ̆ kơdih lăp đon.
Pơtrơp dơ̆ng, Pơtao Sôlômôn tơblang tơdrong ‘nĕ kơ blĕk klai kơ lu bơngai pơm kơnê̆ yua kơdih lu sư gô pŭ iŏk răm rai đơ̆ng tơdrong lu sư pơm , nơ̆r “‘nĕ kơ pơm ‘mong”, wă khan “ưh kơ đei ioi tơ anăp” (trong 20 BHĐ). Lu bơngai pơm kơnê̆ ưh kơsĭ pŭ iŏk tơdrong phak, đe gô pơrăm lăm teh đak đĕch, mă-lei gô pŭ iŏk tơdrong phak ling lang ling lang. Tơdah băt kơ lu bơngai kơnê̆ ưh kơ đei hơmĕng tơ anăp, ŭnh kơ đeng lu bơngai kơnê̆ gô păt, bơhngol lu sư gô môch glơ̆k lăm măng mu, tơdrong mơdrŏng lu sư gô hiong tôch, lei yua kơ kiơ lu bơ̆n mah nŏng kơ blĕk,ơh sơ’ngon pơm kiơ! Tơdrong mă kăl hloh, kơplah lu bơ̆n ‘maih pơm tơdrong noh lei lu bơ̆n lei-lăi lu bơngai ưh kơ đei đon lui lăm tơdrong ‘lơ̆ng tơpăt Kră Yang ‘Bok Kei-Dei.
Kơ thơ chih ăn kơ Khul Lui tơ pơlei Êphêsô, ‘Bok Pôl bơtho: “Dah iĕm đei tơdrong ơh, iĕm ‘nĕ kơ pơm kơnê̆ kơ lu sư, ‘nĕ tơhil băl đunh truh kơ măng” (Êphêsô 4: 26). Apinh Kră Yang tơgŭm lu bơ̆n gơh kĕ gơ̆t tơdrong ơh klai yua kơ tơdrong blĕk ơh gô ba bơ̆n lăm tơdrong pơm glăi, pơm yoch. Lu bơ̆n kư̆m ‘nĕ kơ mong tơdrong ơh blĕk lăm jơhngơ̆m bơ̆n rai dêh, mă-lei athei krao khan apinh Kră Yang ăn ngach tơdrong ơh klai, păng arih pơm kiơ̆ Nơ̆r Kră yang bơtho: “Gơnang bĕ kơ Kră yang păng pơm ‘lơ̆ng.” (Hơriso 37:3). Păng ‘nĕ klai kơ lu bơngai kơnê̆ mơdrŏng, gơh jang tih lăm teh đak, jơ̆ dôm tơdrong lu sư đei gô ‘bônh kơ hiong thoi pơkao tơ bri brah, mălei athei tơchĕng tơdrong pơm ‘lơ̆ng, đei tơdrong arih ling lang. Athei lui kơ tơdrong ‘lơ̆ng tơpăt Kră Yang ‘Bok Kei-Dei păng pơ jao tôm tơdrong kơ Sư, Sư gô dŏng tơgŭm păng ăn pŭn hiôk kơ lu bơ̆n.
Kơkuh kơ Ih Kră yang, inh bơnê kơ Ih tơgŭm inh băt arih lăp đon mă đei tơdrong truh. Krao khan apinh ‘Bă ăn kơ inh arih ‘lơ̆ng tơpăt, ‘mêm mơnat, hiơ̆ kơ blĕk, păng apinh tơgŭm inh ling lang lui gơnang tơdrong Ih pơgơ̆r lăm chăl arih inh. Yua anăn Kră Yang Yêsu Krist, Amen.
Lu bơ̆n ngăl pơm thoi yơ ‘bơ̆t anăp lu bơngai kơnê̆, pơm tơdrong kơnê̆?
‘Nĕ kơ ơh klai, ‘nĕ kơ hil areh
Lu bơngai kơnê̆, ưh kơ ‘măn ăn kơ lu bơ̆n
Tơdrong ‘lơ̆ng tơpăt Kră Yang ba ăn
Đei lơ gleh glăn pơmat mălei jơhngơ̆m oei hiôk hơđơ̆ng
Đŏk Sơ̆p Hla ar ‘Bok Kei-Dei lăm pêng sơnăm: I Hơ’mon 29
Kênh Youtube BHKTHN:
