Yakơ 5:13-16
“Thoi noh na iĕm athei roi dih băl tơdrong yoch na bôl buăl krao khan tơgŭm, ‘Bok Kei-Dei gô ăn kơ lu iĕm mă jĭ-jăn klaih praih iung.” (Yakơ 5:16a)
Nơ̆r jet tơchĕng pơwao:
– ‘Bok Yakơ roi pêng tơdrong kiơ păng hơmet ăn kơ pêng tơdrong noh thoi yơ?
– Pơgơ̆p jing minh lăm tơdrong krao khan ba ăn đei yua kiơ?
– Tơdrong bơ̆n pơgơ̆p krao khan hơdai, hăm hnam dơnŏ, hăm bôl buăl, păng khul bơngai lui thoi yơ?
Nơ̆r krao khan pơgơ̆p jing minh lăm khul bơngai lui. Bơngai đei tơdrong jĭ jăn păng lu kră wei lăng ba ăn tơdrong đei yua tơpă. Lăm chăl trong nơ̆r ‘Bok Kei-Dei năr ‘nâu, ‘bok Yakơ roi pêng tơdrong phara, noh jơ̆ tơdrong gleh truh, jơhngơ̆m hiôk chơt păng tơdrong jĭ jăn. Sư kư̆m bơtho kon pơlei Kră Yang đei trong hơmet kơ dôm tơdrong noh. Lăm tơdrong gleh truh, athei krao khan kơ Kră Yang, lăm tơdrong pơlong lăng truh, athei hiôk chơt hơri bơnê kơ Kră Yang; lăm kơplah đei tơdrong jĭ jăn, athei krao lu kră wei lăng lu bơngai lui năm krao khan hơdai. Bơ̆n ‘bôh lăm pêng tơdrong noh tă kơ đei minh tơdrong kơnhăm noh jơ̆ năm tơ Kră Yang, pơyơ̆r roi ăn kơ Kră Yang dôm tơdrong lăm tơdrong arih bơ̆n hăm jơhngơ̆m đon lui kơ Kră Yang bơih Tơ’ngla pơih ăn trong dŏng tơgŭm hlôi đơ̆ng tơdrong pơlong lăng truh.
Tơdrong gleh truh mă ‘bok Yakơ đei chih roi lăm âu ưh kơ trŏ kơ đei tơdrong gleh pơmat yua kơ đơ̆ng pơm yoch ôh, mălei tơdrong gleh truh noh yua kơ lui kơ Kră Yang Yêsu thoi Pêtrôs khan: “Bơ̆n đei tơdrong gleh truh yua kơ tơdrong yoch bơ̆n, noh pha. Thoi noh, na bơ̆n ‘nĕ kơ pơlôch đe, ‘nĕ kơ tơtông klĕ, ‘nĕ kơ pơm kơnê̆, ‘nĕ kơ pơm pơhloh kơ tơdrong jang đe. Mălei dah bu đei tơdrong gleh yua kơ sư kiơ̆ Yêsu Krist, bơngai noh thoi lĕ kơ pŭn, bơngai noh hiôk, sư huay kơ mơlâu kơ đe ôh. Sư athei adrin ră roi pơư pơang kơ đe tơdrong Yêsu Krist hăm ‘Bok Kei-Dei rai pran hloh.” (I Pêtrôs 4:15-16)
Đơ̆ng noh, ‘bok Yakơ kư̆m pơma ‘bơm tơdrong hơri bơnê kơ Kră Yang lăm kơplah đei tơdrong hiôk chơt dah mă đei tơdrong gleh truh wă kơ rim ‘nu bơ̆n tơ’bôh đon lui gơnang kơ tơdrong ‘mêm păng tơdrong mơnat ăn đơ̆ng Kră Yang, lui ngeh kơ Kră Yang pơgơ̆r tôm tơdrong păng lui ngeh kơ Kră Yang ăn tơdrong ‘lơ̆ng hloh kơ lu kon Sư kiơ̆ thoi Sư wă. Hiôk lăm tơdrong gleh pơlong lăng truh yua kơ bơ̆n lui kơjăp păng wă kơ bơ̆n jing bơngai ‘lơ̆ng tơpăt (Yakơ 1:2-3). Tuch luch, ‘bok Yakơ wă kơ bơ̆n krao khan tơgŭm dih băl, pơgơ̆p jing minh lăm tơdrong krao khan ưh kơsĭ tơgŭm bơngai đei tơdrong jĭ jăn gơh klaih ‘lơ̆ng akâu dang đêl đĕch ôh, mă kăl hloh noh Kră Yang kư̆m mơnat pơklaih yoch Sư mơ̆n. Lăm jơhngơ̆m pơgơ̆p krao khan hơdai yua kơ lu kră wei lăng krao khan gơnang kơ Kră Yang tơpă, roi dih băl tơdrong yoch na bôl buăl krao khan tơgŭm, Kră Yang gô pơklaih păng mơnat ăn kơ bơngai mă jĭ jăn noh. Roi tơdrong yoch ưh kơsĭ tơgŭm tơdrong tơ’bưh băl kơjăp ‘lơ̆ng khul bơngai lui hăm Kră Yang đĕch ôh, mălei đei ba ăn tơdrong minh jơhngơ̆m đon, ‘mêm mơnat dih băl lăm ‘nhŏng oh bơngai lui bơ̆n.
Apinh Kră Yang ăn kơ rim ‘nu lu bơ̆n đĭ jơhngơ̆m, pơnam lăm tơdrong krao khan hơdai. Tơdrong krao khan tơgŭm bơ̆n tơ’bưh kơjăp hăm Kră Yang, kư̆m wă tơgŭm dih băl đon lui, păng đei tơdrong sĭt tơpă wă kơ kĕ hloi đơ̆ng dôm tơdrong anat truh lăm tơdrong arih bơ̆n.
Tơdrong pôm jơhngơ̆m đon lăm tơdrong krao khan hơdai hăm ‘nhŏng oh lăm Kră Yang thoi yơ?
Ơ Kră Yang, inh bơnê kơ Ih mơnat ăn tơdrong yoch inh bơih, ăn kơ inh jing kon Ih păng gơh tơ’bưh hăm Ih lăm tơdrong krao khan. Apinh Kră Yang ăn kơ lu nhôn băt ‘mêm kơ Ih păng ‘mêm dih băl, păng tơgŭm băl đon lui lăm tơdrong pơgơ̆p krao khan. Yua anăn Kră Yang Yêsu Krist, Amen!
Đŏk Sơ̆p hla bơar ‘Bok Kei-Dei lăm pêng sơnăm: II Samuel 5.
Kênh Youtube BHKTHN:
