II Hơ’mon 36:11-21
“Mă-lei lu sư hiap lu bơngai đơ̆ng Kră Yang ‘Bok Kei-Dei, ưh kơ wă mơ̆ng pơdê nơ̆r Kră Yang ‘Bok Kei-Dei, pơjăm lu bơngai khan lê̆ adrol Kră Yang ding mah Kră Yang hil mĭl phak kon pơlei Sư, ưh pă gơh hơmet ming liơ.” (II Hơ’mon 36:16)
Nơ̆r jet tơchĕng pơwao:
– Pơtao Sêđêkia jơ̆ bơngai liơ păng pơm glăi thoi yơ?
– ‘Bôh lĕch thoi yơ kơplah đĭ teh đak arăng kơ̆l ưh kơ tơbral?
– Yua kơ kiơ bơ̆n ‘bônh kơ pơdê tơdrong Kră Yang khan?
Pơtao Sêđêkia jơ̆ kon pơtao Jôsia băt hli yom kơ Kră Yang. Sư đơ̆ng pơtao Nebukatnessar dêh Babilôn pôk sư pơm pơtao păng pơgŏ sư pơkă yua anăn Kră Yang tơnăp đĭ chăl arih hăm dêh Babilôn. Lei lăi thoi pêng ‘nu pơtao pơm tơdrong kơnê̆ adrol kơ sư, pơtao Sêđêkia kư̆m “pơm tơdrong kơnê̆” (trong 12) Jêrêmi bơngai khan lê̆ adrol ling lang krao pơtơm pơtao Sêđêkia athei wih tơ Kră Yang, ‘nĕ pă kơkuh kơ rup yang dơ̆ng, sư kư̆m khan kơ pơtao athei tơnăp hăm Babilôn yua kơ ‘noh jơ̆ đơ̆ng Kră Yang wă. Mălei pơtao ưh kơ wă tơ jur akâu ‘bơ̆t anăp Jêrêmi ‘bok khan lê̆ adrol jơ̆ bơngai chu kiơ̆ Kră Yang ‘Bok Kei-Dei na đei bơtho khan. Pơtao sơngah ưh kơ wă tơbral. “Sư jing kơ chu arăng kơ̆l, ưh kơ wă wih tơ Kră Yang ‘Bok Kei-Dei.” (trong 12-13). Lu ‘bok soi tơm păng lu kon pơlei kư̆m “rai kiơ̆ lu tơdrong kơnê̆ ‘mê̆ brư̆ thoi lu bơngai tơmoi lăm dêh char jum dăr lu sư na pơm yoch rai dêh.” Truh mah pơm kơnê̆ kơ hnam Kră Yang mă sư đei rơih iŏk ‘măn lê̆ rơgoh đơ̆ng tơdrong lu sư kơkuh kơ rup yang.
Dôm tơdrong yoch pơtao, lu ‘bok soi tơm, hăm kon pơlei, đei lơ tơdrong dêh tơ’bôh ăn tơdrong răm lu sư ưh pă đei trong gơh hơmet bơih. Mălei Kră Yang oei ‘mêm mơnat păng kĕ chơ̆n, yua kơ mơnat kơ kon pơlei păng hnam Sư, Sư wơh lơ bơngai, lu bơngai khan lê̆ adrol năm tơ lu sư, krao pơtơm lu sư wih brŏk tơ Kră Yang. Mălei lu sư hiap lu bơngai đơ̆ng Kră Yang ‘Bok Kei-Dei wơh, pơdê nơ̆r Kră Yang khan, pơjăm lu bơngai khan lê̆ adrol (trong 16). ‘Nâu jơ̆ wơ̆t blŭng a lăm Pah so, dôm nơ̆r tơ’bôh tơdrong ưh kơ hli yom kơ Kră Yang đei chih lăm minh trong. Tơdrong noh tơ’bôh lu sư ưh pă đei trong gơh klaih bơih păng pă tam bơih wă lĕch hlôi đơ̆ng tơdrong Kră Yang sek tơlang. Thoi noh, tơdrong Kră Yang mơnat ăn jing tơdrong ưh kơ mơnat ăn bơih (trong 15-17). Pơtao Sêđêkia ưh kơ mơ̆ng kiơ̆ nơ̆r Jêrêmi ‘bok khan lê̆ adrol mă plơ̆ dơ̆ng Babilôn đơ̆ng rŏng kơ tơsĭn sơnăm chu đe pơgơ̆r. Kră Yang pơm pơtao bơngai Kalđê wang blah Juđa păng pơlôch lơ dêh đơ̆ng lu ‘lơ̆p truh tơ kră. Lu bơngai mă oei arih klaih đơ̆ng đao gưm, đe rôp chông ba pơm bơnă. Lu linh Babilôn soh hnam Kră Yang ‘Bok Kei-Dei păng soh đĭ hnam pơtao, teh pơchah lê̆ dur pơlei Jêrusalem. Lu tơmam gĭt lăm hnam Kră Yang, lu tơmam gĭt pơtao iŏk đĭ chĕp ba tơ dêh char Babilôn, tơdrong ‘nâu truh wă pơsĭt kơ nơ̆r Kră Yang khan mă đơ̆ng Jêrusalem ‘bok khan lê̆ adrol roi tơbăt (trong 21).
Lơ wơ̆t lăm tơdrong arih, bơ̆n oei tơchĕng khan dôm tơdrong Kră Yang roi tơbăt oei đunh dah mă ưh kơ đei layơ ‘bôh truh yua kơ oei ‘bôh bơ̆n hiôk hian đĕch. Thoi noh, na bơ̆n oei ưh kơ pơm kiơ̆ nơ̆r Kră Yang. Mălei Kră Yang ‘Bok Kei-Dei ‘lơ̆ng rơgoh ưh kơ layơ pơm ưh kơ băt tơdrong yoch hloi ôh. Truh tơ bơ̆n pơm hloh kơ tơdrong kĕ chơ̆n, tơdrong ‘mêm mơnat Kră Yang păng năm truh tơ anih mă ưh pă gơh ming hơmet bơih lei gô pŭ iŏk tơdrong pơmat dêh. Apinh ‘nĕ kơ lăng hơi!
Ơ Kră Yang, apinh Ih mơnat kơ inh yua kơ inh lăng hơi tơdrong kĕ chơ̆n, ‘mêm mơnat Kră Yang. Apinh Ih ăn kơ inh kơchăng dôm nơ̆r Kră Yang roi tơbăt đơ̆ng lăm hla bơar Ih wă kơ jah tơbral wơ̆t tơ Ih hli kơ ưh kơ tam. Krao khan yua anăn Kră Yang Yêsu Krist, Amen.
Đei tơdrong kiơ lăm nơ̆r Kră Yang mă bơ̆n oei “pơdê” păng “kơchu, arăng kơ̆l” wă sơngah kơ pơm kiơ̆ ưh?
Đŏk Sơ̆p Hla bơar ‘Bok Kei-Dei lăm pêng sơnăm: I Kôrintô 2
Kênh Youtube BHKTHN:
