Myơr Mnơ̆ng Ngă Yang Lŏ Myơr Sang Aê Diê – 17/1/2025

482

 

Klei Aê Diê Blŭ: II Klei Yăl Dliê 29:20-24

Êlan kliăng: “Ƀiădah ñu srăng rao hŏng êa prôč êhŭng leh anăn jơ̆ng gơ̆. Leh anăn khua ngă yang srăng čuh jih ti dlông knưl, jing mnơ̆ng myơr čuh, mnơ̆ng myơr brei pui ƀơ̆ng, mnâo ƀâo mngưi kơ Yêhôwa” (Bruă Lêwi 1:9b)

Klei êmuh ksiêm mĭn: Ya bruă Mtao Hêsêkia ngă tơdah leh bi doh leh sang kkuh mpŭ kơ Aê Diê? Bruă ngă anei brei drei ƀuh ya klei kơ klei mĭn ñu? Hruê anei, ya drei myơr kơ Khua Yang čiăng lŏ wĭt lač jăk kơ klei khăp Ñu?

Leh bi doh Sang kkuh mpŭ, klei lŏ myơr Sang kkuh mpŭ srăng lŏ ngă mtam. Kyuanăn, Mtao Hêsêkia kgŭ ưm, bi kƀĭn phung khua hlăm ƀuôn, leh anăn đĭ nao kơ sang Yêhôwa, klei anei brei ƀuh ai tiê ñu čiăng snăk lŏ ngă klei kkuh mpŭ kơ Aê Diê. Diñu đoh ba êmô knô, biăp knô, êđai biăp leh anăn êđai bê knô, grăp mta kjuh drei, bi êdah kơ klei kluôm ênŭm, kyuadah diñu čiăng mâo klei bi doh klei soh kluôm ênŭm. Diñu myơr jih jang mnơ̆ng myơr anăn kyua klei soh kơ ƀuôn ala mtao, čiăng lač kơ găp djuê mtao, kơ adŭ doh jăk čiăng lač kơ phung mă bruă hlăm Sang kkuh mpŭ leh anăn wăt kơ Sang kkuh mpŭ arăng tuôm bi čhŏ leh, leh anăn kơ phung Yuđa jing jih jang phung ƀuôn sang.

Phung khua ngă yang myơr dua mta mnơ̆ng myơr čiăng lŏ myơr Sang kkuh mpŭ. Tal sa, mnơ̆ng myơr čuh (êlan 24, 27) myơr hŏng êmô knô, biăp knô amâodah êđai biăp. Anei jing mnơ̆ng myơr arăng čuh brei pui ƀơ̆ng kluôm dhuôm čiăng myơr kơ Aê Diê bi êdah kơ klei pô kkuh mpŭ myơr jih ñu pô leh anăn gưt kơ Aê Diê kluôm ênŭm. Mnơ̆ng myơr anei ăt čiăng lač kơ klei bi doh leh anăn jing doh jăk mơh (Bruă Lêwi 16:19). Tal dua, mnơ̆ng myơr kyua klei soh myơr hŏng bê knô (êlan 23), čiăng mă hĕ klei soh phung ƀuôn sang ti anăp ală Khua Yang. Mtao leh anăn phung bi kƀĭn bă kngan diñu ti bê knô čiăng kơ klei soh diñu mŭt hlăm digơ̆. Aê Diê mă hĕ klei soh diñu leh anăn dưm ti mnơ̆ng myơr.

Klei ngă yang ênuk Klei Bi Mguôp Hđăp jing rup kơ Yang Krist leh anăn jih jang bruă Ñu ngă leh kơ drei ti dlông kyâo bi kal. Hruê anei, phung đăo kơ Krist amâo lŏ myơr mnơ̆ng ngă yang kyua klei soh ôh kyuadah Yang Krist djiê hrô leh klei soh drei. Drei amâo lŏ myơr hlô mnơ̆ng jing mnơ̆ng myơr čuh ôh, ƀiădah msĕ si knưl myơr mnơ̆ng čuh ênuk Klei Bi Mguôp Hđăp arăng brei pui ƀơ̆ng nanao amâo dưi ram ôh (Bruă Lêwi 6:8-13) ăt snăn mơh klei phung đăo myơr ñu pô leh anăn gưt kơ Khua Yang amâo dưi tloh kdriêl ôh. Khua ƀĭng kna Y‑Pôl mtă kơ phung đăo snei: “Ơ phung ayŏng adei, kâo kwưh kơ diih kyua klei Aê Diê pap, myơr bĕ asei mlei diih jing mnơ̆ng ngă yang hdĭp, doh jăk, bi mơak kơ Aê Diê. Klei anăn jing klei kkuh mpŭ djŏ kơ Aê Diê” (Rôm 12:1). Khua Yang amâo čoh čuăn brei drei djiê hlăm asei mlei kđeh msĕ si mnơ̆ng myơr ênuk mphŭn dô ôh, ƀiădah Ñu čiăng drei hdĭp kơ Ñu. Grăp hruê, grăp mnĭt mmông hlăm klei hdĭp, brei drei myơr drei pô kơ Ñu, jing msĕ si mnơ̆ng ngă yang hdĭp leh anăn doh jăk hŏng klei weh đuĕ kơ klei dôk dơ̆ng ƀơ̆ng huă tui si lăn ala soh jhat anei čiăng hdĭp hŏng klei hdĭp mrâo Khua Yang bi mlih leh (Rôm 12:2; Philip 4:18). Jih jang klei anăn srăng jing mnơ̆ng myơr mâo mnâo ƀâo mngưi, jing sa mnơ̆ng myơr Aê Diê tŭ leh anăn bi mơak kơ Ñu.

Si ngă klei drei dôk dơ̆ng ƀơ̆ng huă jing mnơ̆ng ngă yang hdĭp leh anăn bi mơak kơ Khua Yang mơ̆?

Wah lač: Ơ Khua Yang, kâo bi mni kơ Ih kyua klei Ih pap, pap brei leh klei soh kâo. Brei bĕ kâo myơr klei hdĭp kâo pô jing msĕ si mnơ̆ng ngă yang hdĭp leh anăn doh jăk bi mơak kơ Ih. Kâo wah lač hlăm Anăn Khua Yang Yêsu Krist. Amen.

Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.

Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com

Dlăng Klei Aê Diê Blŭ hlăm tlâo thŭn: II Y-Samuel 12

Kênh Youtube BHKTHN:

https://www.youtube.com/c/bhkthn

Bài trướcMuab Khoom Fij Thaum Rov Fij Tuamtsev – 17/1/2025
Bài tiếp theoDâng Của Lễ Tái Cung Hiến – 17/1/2025