Yôhan 11:40-44; Markôs 14:35-36
“Sư khan: Aba, ơ ‘Bă, Ih gơh pơm tôm tơdrong. Apinh Ih ăn kơ Inh klaih đơ̆ng tơdrong gleh âu. Mă-lei Ih ‘nĕ pơm kiơ̆ kơ Inh, pơm kiơ̆ kơ Ih đĕch.” (Markôs 14:36)
Nơ̆r jet tơchĕng pơwao:
– Kră Yang Yêsu krao khan thoi yơ hơdrol kơ Sư tơiung arih Lasarơ đơ̆ng lôch?
– Lăm pơgar Gêtsêmanê, Kră Yang đei krao khan thoi yơ?
– Lu bơ̆n pơhrăm iŏk tơdrong kiơ ‘moi đơ̆ng tơdrong Kră Yang krao khan?
Chăl arih Kră Yang Yêsu ‘noh arih hăm tơdrong krao khan ling lang. Păng pơm tơ’bôh lăm tơdrong Sư krao khan jơ̆ kơmĭl na rim bơngai lui kăl kơ rok kiơ̆. Kơplah đĭ khei sơnăm Sư jing bơngai bơ̆jang tơ ala teh, Kră Yang Yêsu ling lang krao chơ chă kiơ̆ Kră Yang wă păng apinh ‘Bok Kei-Dei ‘Bă chông anhăk dôm tơdrong jang Sư, dôm tơdrong arih mă Sư oei tơ’bơ̆p lăm tơdrong đe hơ’mon kơ Kră Yang tơiung arih Lasarơ đơ̆ng lôch, Sư pơma hơđăl khan ‘Bă ling lang mơ̆ng nơ̆r Sư krao khan. Tơdrong Kră Yang Yêsu kơnhăm wă kơ lu bơngai oei tăp dăr kơ sư kơtơ̆ng na lu sư gô lui kơ Ih wơh Inh: “Lu sư pơih tơnglơ̆p tơmo ei. Na Yêsu ngoi tơ plĕnh krao khan kơ ‘Bă Sư: Ơ ‘Bă, Inh bơnê kơ Ih kơlih kơ Ih mơ̆ng Inh krao khan kơ Ih boih. 42 Inh băt Ih mơ̆ng Inh ling lang mơ̆n, mă-lei Inh khan thoi noh wă kơ lu bơngai mă oei tăp dăr kơ Inh kơtơ̆ng na lu sư gô lui kơ Ih wơh Inh.” (Yôhan 11:41-42 BTTHĐ). ‘Bok Kei-Dei ‘Bă mơ̆ng nơ̆r Kră Yang Yêsu krao apinh kơplah Sư pơma ‘bơ̆r re, ơ Lasarơ, iung đơ̆ng bơsat bĕ, lĕch tơ’nguaih âu, jơ̆ng ti muh măt Sư đêl đe chôm pơ̆n păng che oei oei ‘bơ̆t akâu sư păng đe ‘bŭ sư lăm puăn năr bơih (Yôhan 11:17).
Lăm pơgar Gêsêmanê, Kră Yang Yêsu krao khan iŏk đon ala, krao khan đĭ jơhngơ̆m păng chu iŏk tôm tơdrong. Kră Yang băt adrol tơdrong wă truh kơ Sư trăp tih dêh, na Sư apinh ‘Bă Sư “Apinh Ih ăn kơ Inh klaih đơ̆ng tơdrong gleh âu”, mălei Ih ‘nĕ pơm kiơ̆ kơ Inh, pơm kiơ̆ kơ Ih đĕch. Minh nơ̆r krao khan đei tơ’bôh Kră Yang chu pŭ iŏk tôm tơdrong gleh mă khan ưh kơ đei hơpơi ră, ‘Nâu bơih lu bơ̆n kăl kơ pơhrăm iŏk ‘moi kiơ̆ lăm tơdrong Kră Yang krao khan kơplah lu bơ̆n krao khan apinh Kră Yang tơdrong kiơ.
Lu bơngai chih lăm puăn Sơ̆p Tơdrong ‘Nao ‘Lơ̆ng ‘nâu đei tơbăt Kră Yang Yêsu ling lang krao khan kơplah bơ̆jang tơ teh âu. Sư đei tơ’bưh hăm ‘Bok Kei-Dei ‘Bă Sư lăm tơdrong ‘mêm, chu tôm tơdrong, mă gĭt kăl lăm jơ blŭng a, lăm tơdrong gĭt kăl, măloi sư lăm jơ tuch luch đe wă pơ̆ng Sư tơ ‘long pơglang. “Ơ ‘Bă, Inh pơjao ăn kơ Ih bơhngol Inh.” (Luka 23:46). Sư pơm tơ’bôh kơmĭl adrin krao khan, krao khan mă kơjăp păng buăl juăt hăm Tơ’ngla mă Sư krao khan.
‘Moi kiơ̆ gah tơdrong Kră Yang Yêsu krao khan ‘noh bơih kơmĭl ăn kơ rim ‘nu lu bơ̆n rok kiơ̆. Kon pơlei Kră Yang dang ei đei Sư ăn kơ bơ̆n gơh pơma dơnuh hăm ‘Bok Kei-Dei ‘Bă na ưh kơ kăl đơ̆ng bu ‘noh. Kơplah bơ̆n năm tơ Kră Yang hăm tơdrong krao khan tơdrong tơ’bưh, lu bơ̆n kăl kơ pơhrăm iŏk ‘moi kiơ̆ Kră Yang Yêsu lăm tơdrong krao khan, iŏk đon ala băt kơdih akâu rơdu păng chơ chă đei jơhngơ̆m pran, tơdrong tơgŭm đơ̆ng ‘Bok Kei-Dei, Yang mă bơ̆n oei krao apinh.
Ơ ‘Bă lu nhôn mă oei tơ plĕnh ti, bơnê kơ Ih đei ăn kơ inh năm jê̆ Ih. Apinh Ih ăn kơ inh ‘moi kiơ̆ Kră Yang Yêsu lăm tơdrong krao khan wă kơ ling lang băt ‘mêm, iŏk đon ala chu kiơ̆ kơ Ih ling lang, lui kiơ̆ păng mơ̆ng nơ̆r Ih khan păng ăn tơdrong ‘lơ̆ng kơ kon pơlei Ih, kiơ̆ thoi Ih wă, yua anăn Kră Yang Yêsu Krist, Amen!
Lu bơ̆n hăm krao khan ‘moi kiơ̆ Kră Yang Yêsu bơtho lăm tơdrong krao khan dah ưh?
Đŏk Sơ̆p Hla bơar ‘Bok Kei-Dei lăm pêng sơnăm: Tơdrong Pơđơ̆k 20
Kênh Youtube BHKTHN:
