Hơriso 7:1-17
“Ơ Kră Yang ‘Bok Kei-Dei tơpăt! Ih boih Kră Yang lăng lăm jơhngơ̆m kon bơngai, Apinh Ih pơtôch lê̆ dôm tơdrong kơnê̆ lu bơngai kơnê̆ wă pơm. Mă-lei pơm bĕ kơ lu bơngai tơpăt mă kơjăp.”
(Hơriso 7:9)
Nơ̆r jet tơchĕng pơwao:
– Pơtao Đawit oei arih lăm kơplah ayơ?
– Yua kơ đơ̆ng tơdrong kiơ pơtao Đawit băt sĭt sư gô hơđơ̆ng?
– Lu bơ̆n gô arih thoi yơ kơplah băt Kră Yang Sư sek tơlang tơpăt?
Hơriso 7 đơ̆ng ‘bok Pơtao Đawit pơcheh kơplah đe pơm kơnê̆ păng jô̆ jâu sư kơdâu druh păng wă pơlôch sư (trong 1-5). Rup bơngai pơm kơnê̆ pơtih gia thoi kŏ so blĕk grĕnh ‘maih châu hek akâu sư, tơplơ̆ kơ rup sư minh ‘nu minh drô̆, ưh kơ đei bu wă dŏng. Mălei ră, pơtao Đawit ưh kơ hli ôh. Sư pơyơ̆r kăl wă kơ ‘bok sek tơlang tơpăt. Sư lui ngeh tơpă bơngai mă ayăt kơ sư Kră Yang gô pơm tơwih dŏng sư, Kră Yang gô dŏng sư, na sư gô hơđơ̆ng yua kơ sư đei gơnang kơ Kră Yang (trong 1). Kră Yang ‘Bok Kei-Dei tơpă gô sek tơlang tơpăt kơ rim bơngai (trong 7-11).
Kơplah đe pơm kơnê̆, pơtao Đawit đei tơdŏng kơdih akâu, dôm nơ̆r jô̆ jâu đơ̆ng bơngai ayăt, sư ưh kơ yoch ôh, ưh kơ đei pơm tơdrong kơnê̆, dah inh tơtông iŏk đơ̆ng bơngai mă oei hiôk hian hăm inh, păng pơm kơnê̆ bơih bu pơm kơnê̆ kơ inh tơdrong ưh kơ đei (trong 3-4). Na sư kư̆m krao apinh ‘Bok Kei-Dei, Ih bơih Kră Yang lăng lăm jơhngơ̆m kon bơngai, lăng lăm jơhngơ̆m sư păng ‘bôh sư adrin đĭ jơhngơ̆m wă kơ chăl arih tơpăt păng ‘lơ̆ng rơgoh (trong 8-9). Sư lui ngeh Kră Yang gô dŏng tơgŭm sư. Kră Yang ‘Bok Kei-Dei bơih thoi khêl, sư dŏng pơklaih lu bơngai đei jơhngơ̆m tơpăt (trong 10). Kră Yang gô dŏng tơgŭm pơm tơwih kơ lu bơngai jô̆ jâu păng pơm kơnê̆ kơ sư (trong 11-13). Tuch luch Hơriso 7 jơ̆ nơ̆r ‘Bok Kei-Dei ‘lơ̆ng tơpăt, pơkă pơkăm dan đon lui kơkuh kơ Kră Yang Tơ’ngla mă Tih hloh.
Kơplah bơ̆n băt kơ Kră Yang, Tơ’ngla mă bơ̆n oei kơkuh jơ̆ Yang sek tơlang tơpăt kơ rim bơngai, Kră Yang bơih lăng lăm jơhngơ̆m kon bơngai, Tơ’ngla mă ‘bôh đĭ dôm nơ̆r pơma, dôm tơdrong jang păng ‘bôh đĭ dôm tơdrong pơchŭt đơ̆ng rŏng kơ tơdrong pơm tơ’bôh, gô tơgŭm kơ bơ̆n rai hli yom kơ Kră Yang, gơnang kơ Sư, arih pơm ‘lơ̆ng kiơ̆ thoi Kră Yang wă. Lu bơ̆n kư̆m ling lang krao apinh Kră Yang lăng lăm jơhngơ̆m bơ̆n, băt tơbral roi tơdrong yoch hloi kơplah Kră Yang bơtho tơ’bôh tơdrong bơ̆n pơm glăi. Dah lu bơ̆n đei tơdrong tơ’bưh trŏ hăm Kră Yang, na lu bơ̆n huay kơ hli ôh kơ lu bơngai wă jô̆ jâu păng pơm kơnê̆ kơ bơ̆n yua kơ bơ̆n đei Yang mă sek tơlang tơpăt gô tơgŭm păng dŏng lu bơ̆n trŏ kơ năr păng kiơ̆ trŏ trong Sư. Apinh Kră Yang tơgŭm bơ̆n pơnam kơ đŏk, pơhrăm nơ̆r Kră Yang rim năr wă kơ wơ̆ ‘lŏ lăm tơdrong hlôh băt Kră Yang.
Ơ Kră Yang ‘lơ̆ng tơpăt, Ih bơih Yang ‘Bă mă ‘mêm wei lăng păng wei rong inh. Apinh Ih tơgŭm inh băt hli yom kơ Ih, arih kiơ̆ thoi Ih wă păng kơjăp lăm Ih. Ih bơih Kră Yang ‘lơ̆ng tơpăt sek tơlang lu bơngai mă jô̆ jâu păng pơm kơnê̆ kơ inh. Apinh Ih tơgŭm inh đei đon lui chang gô Ih kĕ chơ̆n wă kơ ‘bôh Ih ‘mêm kơ inh păng wei lăng inh thoi kon ngai lăm klong măt Ih. Krao khan yua anăn Kră Yang Yêsu Krist, Amen.
Jơhngơ̆m lu bơ̆n thoi yơ dah đei bơngai jô̆ jâu păng pơm kơnê̆ kơ bơ̆n?
Đŏk Sơ̆p hla bơar ‘Bok Kei-Dei lăm pêng sơnăm: Habakuk 2
Kênh Youtube BHKTHN:
