Klei Aê Diê Blŭ: Klei Mmuñ Hđăp 7:1-17
Êlan kliăng: “Brei klei soh phung ƀai tuč ruê̆, ƀiădah bi kjăp phung kpă, Ơ Aê Diê kpă, Pô ksiêm dlăng klei mĭn leh anăn ai tiê” (Klei Mmuñ Hđăp 7:9).
Klei êmuh ksiêm mĭn: Mtao Đawit dôk hlăm ya mta klei truh? Kna kơ ya klei Mtao Đawit đăo sĭt nik kơ ñu srăng mâo klei êđăp ênang? Si ngă drei srăng ngă tơdah thâo kơ Aê Diê jing Pô phat kđi kpă?
Klei Mmuñ Hđăp mrô 7 Mtao Đawit yơh jing pô čih êjai ñu tŭ klei sa čô pô roh jhŏng ƀai tiŏ ngă leh anăn tiŏ bi mdjiê (êlan 1-5). Rup pô roh jing msĕ si sa drei êmông gu jhŏng ktang krêñ čiăng kĕ hơiêk hĕ asei mlei ñu, mdê hŏng rup ñu pô dôk hjăn păn, amâo mâo pô bi mtlaih ôh. Wăt snăn dưn mơh, Mtao Đawit amâo mâo huĭ ôh, ñu jao jih klei dleh dlan ñu kơ Pô phat kđi kpă. Ñu đăo sĭt nik pô roh ñu srăng tŭ klei Aê Diê rŭ ênua hŏng klei năng, Aê Diê srăng bi mtlaih ñu leh anăn ñu srăng mâo klei êđăp ênang kyuadah ñu đuĕ dăp hlăm Aê Diê (êlan 1). Aê Diê Pô kpă ênô srăng phat kđi kpă kơ jih jang mnuih (êlan 7-11). Aê Diê jing Pô thâo trih, bi êmut kơ klei jhat, leh anăn bi wĭt klei jhat kơ pô ngă jhat tơdah pô jhat bi khăng ai tiê amâo čiăng kmhal kơ klei soh ôh (êlan 12-16).
Tơdah tŭ arăng klei ngă jhat, Mtao Đawit hưn bi sĭt, ti anăp jih jang klei pô roh kčŭt mčeh, ñu kluôm dhuôm amâo mâo klei soh ôh, kngan ñu amâo tuôm ngă klei wê ôh, ñu amâo tuôm bi wĭt klei jhat kơ phung hdĭp jăk hŏng ñu ôh, kăn ñu bi wĭt klei jhat amâo mâo klei kơ pô ngă jhat kơ ñu rei (êlan 3-4). Leh anăn ñu wah lač msĕ mơh akâo kơ Aê Diê, Pô ksiêm dlăng klei mĭn leh anăn ai tiê mnuih, ksiêm dlăng kơ ñu leh anăn ƀuh ñu gĭr snăk leh čiăng mâo klei hdĭp doh jăk leh anăn kpă ênô (êlan 8-9). Ñu đăo sĭt nik Aê Diê srăng dôk tĭng kơ ñu leh anăn mgang ñu. Aê Diê jing khil mgang ñu, jing Pô bi mtlaih phung mâo ai tiê kpă (êlan 10). Aê Diê srăng lŏ bi wĭt klei jhat kơ phung kčŭt mčeh leh anăn ktư̆ juă ñu (êlan 11-13). Knhal tuč Klei Mmuñ Hđăp mrô 7 jing klei mmuñ mpŭ mni kơ Aê Diê Pô kpă ênô, ƀuăn rơ̆ng đăo leh anăn kkuh mpŭ kơ Aê Diê Pô Ti Dlông Hĭn.
Tơdah drei thâo Aê Diê, Pô drei dôk kkuh mpŭ jing Pô phat kđi kpă kơ jih jang mnuih, Pô ksiêm dlăng ai tiê mnuih, Pô ƀuh jih jang klei blŭ, bruă ngă leh anăn thâo săng mnơ̆ng mtrŭt ti tluôn grăp bruă ngă, srăng đru drei huĭ mpŭ hĭn kơ Aê Diê, knang kơ Ñu, hdĭp kpă ênô tui si klei Ñu čiăng. Drei srăng wah lač jêñ jêñ mơh akâo kơ Khua Yang ksiêm dlăng ai tiê drei, thâo kmhal kơ klei soh mtam tơdah Ñu ktrâo klei soh drei. Tơdah drei mâo klei bi mguôp djŏ hŏng Khua Yang, drei amâo lŏ huĭ ôh kơ phung kčŭt mčeh leh anăn ngă jhat kơ drei kyuadah Pô phat kđi kpă srăng răng mgang leh anăn bi mtlaih drei djŏ mmông tui si êlan hdră Ñu. Akâo Khua Yang đru drei kriăng dlăng leh anăn hriăm Klei Aê Diê Blŭ grăp hruê čiăng kơ drei đĭ hriê kơ prŏng hlăm klei thâo kral Khua Yang.
Si drei srăng lŏ wĭt ngă tơdah mâo pô kčŭt mčeh leh anăn ngă jhat kơ drei?
Wah lač: Ơ Khua Yang, Pô kpă ênô, Ama klei khăp, Pô kiă kriê leh anăn răng mgang kâo. Đru kâo thâo huĭ mpŭ kơ Ih, êbat tui êlan Ih, leh anăn đăo sĭt kơ Ih jing Pô kpă ênô srăng phat kđi hlei pô kčŭt mčeh leh anăn ngă jhat kơ kâo. Đru kâo mâo djăp klei đăo čiăng knang kơ Ih, thâo gĭr čiăng ƀuh Ih khăp leh anăn răng mgang kâo msĕ si asăr ală Ih pô. Kâo wah lač hlăm Anăn Khua Yang Yêsu Krist. Amen
Dlăng Klei Aê Diê Blŭ hlăm tlâo thŭn: Y-Haƀakuk 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail:elankleisitnik@gmail.com
Kênh Youtube BHKTHN:
