Jôsuê 1:6-9
“Sơ̆p hla bơar khôi juăt âu ‘nĕ kơ ataih đơ̆ng ‘bơ̆r ih, athei tơchĕng măng năr, lei athei pơ’lơ̆ng pơm kiơ̆ kơ nơ̆r đei chih lăm noh, thoi noh na lăm trong ih năm gô đei tơdrong pŭn hiôk.” (Jôsuê 1:8)
Nơ̆r jet tơchĕng pơwao:
– ‘Bok Jôsuê đei Kră Yang pơlung tơdrong kiơ?
– Sư athei pơm kiơ wă kơ dôm tơdrong pŭn hiôk Kră Yang pơkă gơh keh jing?
– Lu bơ̆n kăl kơ pơm kiơ wă kơ ling lang tơnăp lăm tơdrong đŏk păng hŏk pơhrăm Nơ̆r Kră Yang rim năr?
Kră Yang ‘Bok Kei-Dei băt kơ ‘bok Jôsuê oei tơ’bơ̆p hăm lơ tơdrong pơlong, gleh pơmat lăm kơplah sư chông kon pơlei Isơrael mơ̆t tơ Dêh Char Pơkă na Kră Yang kăl kơ pơlung sư. Kră Yang pơlung ‘bok Jôsuê “athei chơ̆n jơhngơ̆m nuih pran”. Nơ̆r pơlung ‘nâu đei pơma pơlơ̆k pêng wơ̆t (trong 6-9). “Chơ̆n jơhngơ̆m nuih pran” pơma tơ’bôh gah tơdrong pran, nuih ‘bok Jôsuê kăl kơ đei. “Chơ̆n jơhngơ̆m nuih pran” kư̆m pơma kơ sư athei pơm kiơ̆ khôi juăt Kră Yang (trong 7). ‘Bok Jôsuê kăl kơ đei jơhngơ̆m pran, nuih păng pơm kiơ̆ nơ̆r Kră Yang yua kơ sư đơ̆ng Kră Yang ‘Bok Kei-Dei krao rơih yua wă chông anhăk kon pơlei Kră Yang gơh mơ̆t lăm dêh char Kră Yang Pơkă.
Kơplah Kră Yang krao ‘bok Jôsuê athei chơ̆n jơhngơ̆m, nuih pran, ưh kơ hli, Kră Yang kư̆m pơkă gô oei hơdai sư thoi Kră Yang oei hơdai ‘bok Môis. Kră Yang ăn bơih kơ sư anih teh păng đei tơdrong pơlung. Mălei, wă kơ nơ̆r Kră Yang pơkă gơh keh jing, ‘bok Jôsuê athei pơm kiơ̆ nơ̆r Kră Yang hăm tơdrong “pơ’lơ̆ng pơm kiơ̆ khôi juăt Môis đĭch đam Inh, mă tơbăt kơ ih” (trong 7). ‘Bok Môis athei pơ̆n nuih păng pơm kiơ̆ khôi juăt mă pơ’lơ̆ng, ưh kơ hŭt minh tơdrong kiơ, ‘nĕ kơ weh gah ‘ma gah ‘ngiĕo, lei na mă năm tơ yơ gô đei tơdrong kĕ jei ih. Dôm lu nơ̆r lăm khôi juăt athei oei ‘bơ̆t bơ̆r sư, tơchĕng pơwao lăm kơ̆l ‘ngok sư, păng sư athei pơm kiơ̆ đĭ tôm tơdrong mă pơ’lơ̆ng (trong 8).
Pơ’lơ̆ng tơchĕng hơlen Nơ̆r Kră Yang rim năr gô pơm kơ bơ̆n gơh pơm kiơ̆ Nơ̆r Kră Yang. Păng dah bơ̆n pơm kiơ̆ Nơ̆r Kră Yang lei bơ̆n kư̆m athei pơm kiơ̆ tôm tơdrong. Ưh kơ lăng hơlen, ưh kơ đei hŏk pơhrăm Nơ̆r Kră Yang rim năr lei pơm liơ bơ̆n gơh pơ’lơ̆ng pơm kiơ̆ Nơ̆r Kră Yang! Minh bơhngol hơyơ mă ưh kơ rong hăm Nơ̆r Kră Yang bơhngol ‘noh kư̆m ưh kơ ‘mêm kơ Kră Yang păng ưh kơ ‘maih pơm kiơ̆ Nơ̆r Kră Yang.
Nơ̆r Tơtă athei tơchĕng păng pơm kiơ̆ Nơ̆r Kră Yang ưh kơ trŏ kơ ‘măn kơ Jôsuê đĕch mălei kư̆m ‘măn kơ kon pơlei Isơrael păng ‘măn ăn kơ Bơngai Lui kơ Yêsu Krist dang ei mơ̆n. ‘Noh kư̆m thoi Đawit bơtho kon ‘lơ̆p sư athei pơm kiơ̆ wă kơ gơh keh jing lăm tơdrong jang pơgơ̆r teh đak (I Hơ’mon 22:13). Hơriso 1:1-3 tơbăt ăn kơ lu bơ̆n “pŭn dêh kơ bơngai bu… chơt hiôk lăm khôi juăt Kră Yang ‘Bok Kei-Dei păng tơchĕng kơ khôi juăt ei măng păng năr… dôm tơdrong sư jang gơh keh jing”. Tơdrong arih Kră Yang lăp đon ‘noh tơdrong arih pơm kiơ̆ Nơ̆r Kră Yang yua kơ đơ̆ng pơnam kơ tơchĕng pơwao, hŏk pơhrăm păng ‘mêm kơ Nơ̆r Kră Yang. Đơ̆ng noh na bơhngol sư gơh jing mơdrŏng lăm trong ih năm “gô đei tơdrong pŭn hiôk.” (trong 8). Na gơh keh jing kiơ̆ thoi Kră Yang wă lăm tôm tơdrong.
Ơ Kră Yang, apinh Ih ăn kơ inh tơnăp, pơnam kơ hŏk pơhrăm Nơ̆r Ih rim năr păng pơm kiơ̆ Nơ̆r Ih wă kơ inh arih đei yua ăn kơ Kră Yang păng gơh keh jing lăm chăl arih kiơ̆ Kră Yang. Krao khan yua anăn Kră Yang Yêsu Krist, Amen.
Lu bơ̆n hăm tơnăp pơnam kơ hŏk pơhrăm păng pơm kiơ̆ Nơ̆r Kră Yang lăm chăl arih bơ̆n rim năr ưh?
Đŏk Sơ̆p Hla bơar ‘Bok Kei-Dei lăm pêng sơnăm: Êsêkiên 21
Kênh Youtube BHKTHN:
