Galati 6:6-10
“Na dang ei bơ̆n oei arih tơ ala teh, bơ̆n athei pơm ‘lơ̆ng kơ đe ling lang. Mă loi athei pơm ‘lơ̆ng kơ lu bơngai lui bơ̆n.” (Galati 6:10)
Nơ̆r jet tơchĕng pơwao:
– ’Bok Pôl pơma hơđăl rơđah tơdrong juăt “athei wang pŭ hơnong tơdrong trăp dih băl” hăm tơdrong jang kiơ păng pơm ăn kơ bu?
– Sư bơtho pơlung lu kon Kră Yang thoi yơ lăm tơdrong bơtho păng pơm ‘lơ̆ng?
– Đei tơdrong pơlung bơ̆n kiơ dah bơ̆n bơtho dih băl păng pơm tơ’bôh tơdrong ‘lơ̆ng?
Lăm kơthơ Galati 6:1-5, ’Bok Pôl pơma hơđăl rơđah tơdrong juăt “athei wang pŭ hơnong tơdrong trăp dih băl” Pơtrơp dơ̆ng lăm trong 6-10, sư pơma rơđah nhen tơdrong juăt pŭ hơnong iŏk lăm ‘bar tơdrong jang klah asong păng pơm ‘lơ̆ng hăm pêng khul: bơngai bơtho, rim ‘nu bơngai, păng ‘nhŏng oh lăm đon lui.
Chăl Pah So, đei hơgăt rơđah gah tơdrong tơgŭm jên tơmam kơ bơngai bơtho lăm Hnam Akŭm, mă lei lăm chăl ‘Bok Pôl, ưh kơ đei hơgăt tơdrong tơgŭm jên tơmam kơ bơngai bơtho, lơ bơngai athei jang chă ‘me sa kơdih, thoi ‘Bok Pôl sĭt tua la tăng wă bơ̆ jang kơ Kră Yang. Hlôh nhen lăm lu bơngai bơ̆ jang bơtho rah păng hiơ̆k ‘me kơdih kâu lăm tơdrong arih , păng sư kư̆m ưh kơ wă Khul Lui iŏk sư pơm tơ’bôh hơgăt lê̆ wa kơ bơngai nai rok kiơ̆, yua thoi noh sư bơtho tơ’bôh kơ khul bơngai lui kăl kơ “ bơ̆n athei tơgŭm asong sư tơmam bơ̆n” (tr. 6), kiơ̆ kơ nơ̆r tơm noh wă khan “klah asong tôm tơdrong mă ‘lơ̆ng” ăn kơ bơngai bơtho tơdrong lui (tr. 6 BTTHĐ). Tôm tơdrong ‘lơ̆ng wă khan jên tơmam, tơdrong tơ’bưh băl…Kon pơlei Kră Yang lăm Khul Lui kăl kơ pơm tơ’bôh đei jơhngơ̆m ‘maih tơgŭm tôm tơdrong ‘lơ̆ng wă pơdrŭt lu bơngai bơtho Nơ̆r Kră Yang ăn kơ bơ̆n.
Khul bơngai mă ‘bar ‘Bok Pôl bơtho lu bơ̆n pŭ iŏk trăp đơ̆ng lăm tơdrong jang pơm ‘lơ̆ng “ăn kơ rim ‘nu bơngai” (tr. 10). Mă bu bu kư̆m ‘maih pơm ‘lơ̆ng hăm bơngai pơm ‘lơ̆ng hăm bơ̆n, mă lei pơm ‘lơ̆ng hăm rim ‘nu bơngai noh wă pơ sĭt kơ lu bơngai tam mă lui kơ Kră Yang wă kơ lu sư ‘bôh tơdrong ‘mêm mơnat tơpă lăm Khul Bơngai Lui, “…na đe băt kơ tơdrong iĕm pơm ‘lơ̆ng, na đe bơnê hăm ư-ang kơ ‘Bă bơ̆n tơ plĕnh ti” (Mathiơ 5:16 BTTHĐ).
Khul bơngai mă pêng lu bơ̆n kăl kơ klah asong thoi khul mă ‘bar mă lei kăl kơ pha ra ‘biơ̆: “Mă loi athei pơm ‘lơ̆ng kơ lu bơngai lui bơ̆n.” Pơm ‘lơ̆ng lăm tơdrong lui athei pơtơm blŭng a păng adrol hloh đơ̆ng lăm hnam dơnŏ tih đei đon lui, jơ̆ lu bongai lui jơ̆p jang teh đak păng đĭ dêh char. Tơdah lu bơ̆n pơm ‘lơ̆ng hăm lu bơngai ưh kơ lui mă ưh kơ pơm ‘lơ̆ng hăm tơduă bơngai lui lei lu bơ̆n jơ̆ bơngai ‘bơ̆r đak klak ŭnh, wă kơ đe ‘bôh na bơnê ư-ang.
‘Bok Pôl pơdrŭt kon pơlei Kră Yang lăm trong 7-9: “Mă lei bơ̆n athei chu kơ Sư khŏm khŏm wă kơ bơ̆n gơh pơm đon ‘lơ̆ng” . Tơm kăl sư wă kơ bơ̆n gơh pơm noh tơdrong sĭt tơpăt Kră Yang lăng ưh kơ đei pơdê bu ôh, păng bơngai bu rei găr kiơ gô đei plei ‘nei tơpă. Mă khan thoi ei lu bơ̆n klah asong păng pơm ‘lơ̆ng bơ̆n ưh kơ tơchĕng tơdrong ‘mong pơdrâu, mă lei Kră Yang băt đĭ dôm tơdrong bơ̆n đei jang, truh năr ei kơnh Sư gô ăn kơ lu bơ̆n gô kĕch iŏk dôm tơdrong ‘lơ̆ng.
Ơ Kră yang, apinh tơgŭm inh wă kơ đei jơhngơ̆m wang pŭ trăp dih băl hăm tơdrong chĕp kơjăp trŏ kơ năr gơh tơgŭm păng pơm ‘lơ̆ng mă tôm tơmam đơ̆ng Kră Yang ăn. Inh lui ngeh tơpă truh năr tôch kơnh Ih gô ăn kơ inh gô kĕch yuă iŏk. Yua anăn Kră Yang Yêsu Krist, Amen.
Lu bơ̆n hăm ngăl bơ̆l hăl gleh lap lăm tơdrong tơgŭm păng pơm tơdrong ‘lơ̆ng ưh? Lu bơ̆n kĕ hlôi đơ̆ng tơdrong noh thoi yơ?
‘Nĕ kơ gleh lap lăm tơdrong pơm ‘lơ̆ng
‘Nâu jơ̆ jơ ‘năr Kră yang ăn kơ bơ̆n
Tơdrong pơm ‘lơ̆ng ling lang ưh kơ hăl
Mă khan gleh lap, gô jing hiôk chơt
Đŏk Sơ̆p Hla ar ‘Bok Kei-Dei lăm pêng sơnăm: Hơriso 54-55
Kênh Youtube BHKTHN:
