Klei Aê Diê Blŭ: Klei Kbiă 22:28.
Êlan kliăng:
“Đăm dlao wač kơ Aê Diê ôh, kăn tăm pah kơ sa čô khua phung ƀuôn sang ih rei.”
Klei êmuh ksiêm mĭn: Si ngă pia dlao wač? Ya ngă ƀuôn sang Aê Diê amâo dưi dlao wač kơ Aê Diê ôh leh anăn kăn tăm pah kơ khua phung ƀuôn sang digơ̆ rei? Si ngă drei ngă sĭt mâo klei truh msĕ si amâo kpă ênô? Ya klei drei hriăm mơ̆ng klei hriăm anei?
Dlao wač jing blŭ plă plia, tui si čiăng, amâo ksiêm mĭn bi nik klei soh djŏ. Blŭ dlao wač hŏng Aê Diê jing sa klei ngă soh amâo dưi lăm lui ôh. Ya ngă? Tal sa, anak mnuih leh anăn Aê Diê amâo mâo jing sa hnơ̆ng ôh. Aê Diê jing Pô hrih mjing, anak mnuih jing mnơ̆ng điêt dhiêt Aê Diê hrih mjing. Tal dua, anak mnuih amâo dưi yua klei blŭ soh čiăng bi tăng mgăl hŏng Aê Diê kyua Ñu jing kluôm ênŭm leh anăn kpă ênuah hlăk êjai anak mnuih amâo kluôm ênŭm ôn, klei mĭn leh anăn klei blŭ amâo djŏ. Tal tlâo, Khua Yang khăp kơ anak mnuih tơl brei anak Ñu mâo knŏng sa čô čiăng ba klei bi mtlaih kơ hlei pô đaŏ. Ñu dôk kiă kriê, atăt gai jih jang mta mnơ̆ng; Ñu mâo hdră kčah jăk jĭn čiăng ba klei tŭ jăk hĭn kơ anak mnuih leh anăn kơ grăp čô mnuih. Kyua anăn, amâo mâo pô dưi blŭ mgao ôh hŏng Aê Diê.
Pruê̆ blŭ “khua phung ƀuôn sang” mâo wăt phung khua gĭt gai hlăm klei đaŏ ăt msĕ mơh hlăm ala ƀuôn. Kyua klei mpŭ kơ Aê Diê, drei amâo dưi tăm pah ôh kơ phung khua gĭt gai pô. Aê Diê jing pô mdưm digơ̆ kiă kriê ƀuôn sang Aê Diê čiăng ba klei êđăp ênang kơ ala ƀuôn. “Brei jih jang mnuih gưt kơ phung khua kiă kriê. Kyuadah amâo mâo ôh klei dưi kiă kriê amâo kbiă hriê mơ̆ng Aê Diê, leh anăn klei dưi kiă kriê Aê Diê sơăi mjing leh” (Rôm 13:1).
Khădah, tăp năng phung khua kiă kriê amâo ngă djŏ bruă klam ôh leh anăn msĕ si Aê Diê dôk kriêp ti anăp dŭm klei amâo mtăp mđơr leh anăn klei anak mnuih ruă knap rŭng răng. Djŏ mơ̆ Aê Diê mgang kơ klei soh, mdê hŏng knuih kpă ênô leh anăn bŏ hŏng klei khăp mơ̆ng Ñu? Phung ƀuôn sang Aê Diê ruah ur krao ti gŭ klei gĭt gai mơ̆ng mtao Êjip bŏ pă êtuh thun, diñu ur akâo kơ Aê Diê leh anăn Ñu hmư̆ digơ̆. Truh mmông kčah, Aê Diê ngă bruă kpă ênô mơ̆ng Ñu, ba klei bi kmhal kơ mtao leh anăn mnuih ƀuôn sang Êjip, lŏ wĭt mă jih jang ngăn drăp mnuih ƀuôn sang Aê Diê ruah ngă leh leh anăn atăt digơ̆ wĭt kơ Krĭng lăn Aê Diê ƀuăn hŏng klei yuôm bhăn. Aê Diê srăng phat kđi phung khua kiă kriê, bi kmhal, pah mni djŏ klă, brei thiăm amâo dah mdlưh klei dưi tui si bruă digơ̆ ngă hlăm mmông Aê Diê bi kčah.“Kyuadah klei kâo mĭn amâo jing klei diih mĭn ôh, êlan diih kăn jing êlan kâo rei,” Yêhôwa lač. 9“Kyuadah msĕ si phung adiê dlông hĭn kơ lăn ala, snăn mơh êlan kâo dlông hĭn kơ êlan diih, leh anăn klei kâo mĭn dlông hĭn kơ klei diih mĭn. (Y-Êsai 55:8-9). Mnuih ƀuôn sang Aê Diê brei huĭ mpŭ nanao kơ Aê Diê, đaŏ kjăp kơ Khua Yang, knang kơ klei Aê Diê pap čiăng thâo răng klei blŭ, amâo plŭ ôh plă plia, kƀah klei ksiêm mĭn.
Drei bi mĭn bi nik mơ̆ êlâo kơ blŭ?
Ơ Khua Yang bŏ hŏng klei khăp leh anăn kpă ênô, akâo kơ Ih đru kơ kâo thiăm klei đaŏ huĭ mpŭ kơ Aê Diê grăp hruê, thâo săng klei mtă, hdră kčah jăk siam mơ̆ng Ih čiăng kâo hdĭp mơak kơ Aê Diê, răng mgang ƀăng ƀông kâo blŭ, čiăng klei hdĭp kâo jing mnơ̆ng myơr ƀâo mngưi kơ Ih.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
