Khiavdim 30:34-38
Nqe cim:
“Yog leejtwg tseem ua dua ib co hmoov tshuaj tsw qab zoo li cov no los rau nws siv, cia li muab tus ntawd rho ntawm hauv kuv haivneeg mus” (nqe 38).
Lus nug rau sawvdaws xav:
– Ua cov hmoov tshuaj tsw qab zoo licas thiab siv licas?
– Koj xav licas thaum tus Tswv txwv tsis pub muab lwm tus qauv los ua cov hmoov tshuaj tsw qab ua pa hnia?
– Zaj kawm hnub no qhia rau koj paub dabtsi hais txog tus Tswv thiab Nws lub siab nyiam hauv koj lub neej?
Cov neeg Yixalayees nyiam ua ntau yam hmoov tshuaj los txhawb, hnia cov pa. Tiamsis Vajtswv xav kom lawv ua ib yam hmoov tshuaj tsw qab tshwjxeeb pub rau Nws xwb. Tus Tswv qhia kom lawv ua hmoov tshuaj tsw qab raws tus qauv li no: muab xatates, aunikes, nkanpanoos thiab cov tseem roj ntoo tsw qab uas tsw qab ntxiag coj mus zom ua ke ua ib co hmoov tshuaj tsw qab, thiab muab ntsev tov ntxiv rau kom sib tov zoo thiaj dawbhuv. Cov hmoov tshuaj tshwjxeeb no tsuas yog siv hlawv saum lub thaj txhua hnub thaum yav sawv ntxov thiab yav tsaus ntuj pehawm Vajtswv tus dawbhuv (Khiavdim 30:7). Hnub uas ua kevcai theej txhoj, hlawv hmoov tshuaj tsw qab nws tseemceeb heev, pab kom tus povthawj hlob tsis tuag thaum nws mus hauv Chav Dawbhuv kawg nkaus (Levis Kevcai 16:12-13).
Kuj zoo ib yam li cov roj txhawb meejthawj, cov hmoov tshuaj tshwjxeeb no “ua kom nej dawbhuv”, tus Tswv haivneeg yuav tsum saib taus tus qauv ua cov hmoov tshuaj tsw qab thiab qhov kev siv pub rau tus Tswv. Yog tus neeg uas ua cov hmoov tshuaj tsw qab fij rau tus Tswv tsis raws li tus qauv uas tus Tswv qhia ua ces yog ua txhaum, nws yeej yuav raug txim hnyav heev (Levis Kevcai 10:1-2). Lossis yog nyob hauv tus Tswv haivneeg leejtwg muab tus qauv ntawd los ua ib co hmoov tshuaj rau nws siv ces kuj yuav raug ntiab tawm hauv tus Tswv haivneeg mus (nqe 38). Puas yog tus Tswv qia dub heev es Nws thiaj muaj tib tug qauv ua cov hmoov tshuaj tshwjxeeb no rau Nws xwb? Qhov tseeb peb yuav tsum rov nug yus tus kheej: Vim licas tibneeg ho xav siv yam uas tus Tswv muab tseg tshwjxeeb rau Nws? Tibneeg tej kev txawj ntse tsis totaub txog tus Tswv txojkev npaj thiab Nws lub siab. Peb tsuas yog nco ntsoov hais tias tus Tswv yog tus uas kav txhua yam, Nws yog tus Tswv uas tsim txhua yam thiab Nws muaj hwjchim siv tej khoom uas Nws ua raws li Nws siab nyiam. Tiamsis tej kevcai uas tus Tswv muab yog ua kom muaj nqis rau Nws haivneeg. Ib zaug ntxiv zaj uas hais txog tibneeg poob kev txhaum qhia rau peb paub txog peb qhov chaw nyob kom peb ua neeg raws nraim li tus Tswv txoj kevcai uas Nws qhia.
Ib qhov ntxiv, cov pa tshuaj tsw qab ncho mus saud yog pivtxog cov lus thov Vajtswv, ua Nws tsaug thiab kev qhuas fij rau tus Tswv. Txhua yam tshwjchim, meejmom yuav tsum muab rau Vajtswv Vaj Peb Leeg. Nimno, peb tau hnia ntau yam pa tsw qab uas tus Tswv tsim nyob hauv ntiajteb no. Cia li ua tus Tswv tsaug thiab ua tib zoo tshuaj lub neej, kom peb tsis txhob ua neeg tawvncauj lossis txeeb tus Tswv lub tshwjchim uas tsimnyog yog Nws li.
Koj puas tau kev kaj siab thaum uas yus ua raws li tus Tswv txoj kevcai lawm?
Thov Vajtswv,
Vajtswv, nyuam yaus ua Koj tsaug kawg nkaus li vim Koj tsim ntau yam pa tsw qab heev nyob hauv lub ntiajteb no rau nyuam yaus hnia! Thov tus Tswv Koj pab rau nyuam yaus nco ntsoov, hwm tus Tswv thiab ua lub neej mloog Koj lus zoo ib yam li cov hmoov tshuaj tsw qab ncho mus txog Koj lub zwmtxwv. Amees.
Nyeem Vajluskub hauv peb lub xyoo: Phau Ntawv Nkauj 101:1-102:17
Kênh Youtube BHKTHN:
